Read Kok Borok JIRIMIA 52 Bible Online

JIRIMIA 52 - Kok Borok bible

JIRIMIA 52

¹Jedekia habugra chána cheng phuru bini umor wng kha nokha bisi nwichisa; tei bo nokha bisichisa jora tẃi Jerusalemo habugra chá kha. Bini bumani bumung Hamutal, bo wng kha Libna kamiyungni Jirimiani bwsajwk.

²Jehoiakim bebak samung khlai langma haino Jedekiabo Subraiyungni mokolo cha ya samungrokno khlai kha.

³Tamo khe Jerusalem bai Juda-o wngmarok Subraiyungni thamchini bagwino wng kha, bo bini bwskangni bórokno khitarwi rohor kha. Hakhe Jedekia Babilonni habugrano kebengwi bacha kha.

⁴Ulo bini habugra chámani nokha bisichukuni talchini salchini salo Babilonni habugra Nebukadrejar bai bini bebak sengkrakrok bai Jerusalemno kebengwi bachaui phai lai kha tei bono kitingwi gerebwi chokdeual songcha lai kha.

⁵Hakhe habugra Jedekiani bugra cháui tongmani nokha bisichisa jora tẃi kamiyung sengkrak bai gerepjagwi tong kha.

⁶Nokha talbrwini salchukuni salo, kamiyungo belai’-no chacharara wng kha, ha-o bororokni bagwi chámung nungmung mungsa phano kwrwi kha.

⁷Ulo kamiyungni kwrẃngsa tẃi lama snamjak kha tei bebak chobani sengkrakrok horo kamiyungni phataro ongkhorwi thángwi habugrani nokhlani ganani chokdeual kwnwini hap-lam tẃi khárwi tháng bai kha, aphuru Kolodiasong kamiyungno kitingwi kasu-ui tongo tei bórok khe Arabani harung tẃi tháng kha.

⁸Phiya ba Kolodiani sengkrakrok habugrani utung-utung khabrumwi thángwi Jerikoni harungo thángwi Jedekiano rom kha, aboni bagwi bini bebak sengkrakrok bini ganani piring-poroi wngwi tháng bai kha.

⁹Hakhe bórok habugrano romwi Hamat hani Ribla-o Babilonni habugrani thani tlangwi tháng kha, aro-o bono buj thumna dagi kha.

¹⁰Hakhe Babilonni habugra Jedekiani mokol bwskango’-no bini bwsajlasongno buthar kha tei Judani bebak tangphangroknobo Ribla-o buthar bai kha.

¹¹Bo Jedekiani mokolrokno ekhregwi pái kha tei aboni ulo Babilonni habugra bono sorduk bai khaui Babilono tlangwi tháng kha tei bo alongo thwi ya sak jora chobwi tonjak kha.

¹²Nokha talba talni, salchini salo Babilonni habugra Nebukadrejarni nokha bisi chichuku-o Babilonni habugrani sak mwrwknai bokhorok Nebujaradan Jerusalemo hap phai kha.

¹³Bo Subraiyungni nokthar tei habugrani noyung bai Jerusalemni bebak kotor kuchuk nokrokno sógwi pái kha.

¹⁴Hakhe mwrwknai sengkrak bokhorok bai tongnai Kolodiani bebak sengkrakrok Jerusalemno kitingwi khopjak bebak chokdeualrokno swbai bai kha.

¹⁵Hakhe mwrwknai sengkrak okra Nebujaradan karwi klangjak bigra kuk bororokno tei kamiyungrogo khibiui klangjakrokno Babilonni habugrani thani klangjakrokno tei samung kwrwngrokno khaui tlang bai kha.

¹⁶Tamo khe angur bari mwrwknani bai ha chuainani bagwi mwrwknai tang okra Nebujaradan bigra borokno narwk kha.

¹⁷Hakhe Subraiyungni nokni pitolni thongrok tei yakungrok, pitolni twijlang tei Subraiyungni nokni samung nangma manwirokno Kolodiasong swbai pái kha tei bebak pitolrokno Babilono tlangwi tháng kha.

¹⁸Bórok bamtwkrok, tharukrok, yakheprok, dangairok, tharukrok tei bórok samungo phnangmani pitolni manwirok tlangwi tháng bai kha.

¹⁹Habugrani sengkrak dagiphang tlangwi thángmarok wng kha; rangchak kaham tei rukphaini snamjak dangai bwsarok, hór tonma manwirok, kaslarok, bamtwkrok, chati-thopnarok, tharukrok,

²⁰a thong kongnwi, twijlang kaisa, twijlangni kháma-o pitolni snamjak mak chinwi musuk chwla habugra Solomon Subraiyungni nokni bagwi snammani. A pitolni manwirok bwswk hilik abo saui man ya.

²¹Phiya bini a thongrokni bokong kongsa kongsa chukmani wng kha mukchichar tei kitingwi mukchinwi tei yasi tháibrwi rwja-o; abo bisingo bugurung gwnang.

²²Aboni saka-o pitolni thong tongo; a thong kongsani bokhorok chukma wng kha mukba tei a thongni khorokno kitingwi pitolni sorduk tei pitol bai dalim bwthái hai naithok khe snamjak. Hakhe tei kongsa thongbo abo haino pitol bai dalim bwtháirok bai khe snamjak.

²³Aboni gana bwkhago tháichuku chidok dalim bwthái tongo; kiting khe dalim chabwi kitingwi khachik khe thái sara ká-o.

²⁴Habugrani sengkrak dagiphang ochai okra Seraiano tei ochai okrani yakchu Japhaniano tei khorokthamno bwthái bwchlwi nakma aroni romwi tlang kha,

²⁵bo kamiyungni choba nang laiwi sengkrak bokhorok khoroksano tei kamiyungo tongnai habugrani khorok sni kókbiti sanairokno tei hani bororokno choba phrwngnai bokhorokni swimungni samung tangnainobo romwi tlang kha; tei kamiyungo manjakmani borok khorok dokchinobo rom kha.

²⁶Hakhe mwrwknai bokhorok Nebujaradan bórokno romwi Ribla-o Babilonni habugrani thani tlangwi tháng kha.

²⁷Hakhe Babilonni habugra Hamat hani Ribla-o bórokno bu-ui buthar bai kha. Abo hai kheno Judani bororok sakni hani buini ha-o khaui tlangjak bai kha.

²⁸O bororok wng kha Nebukadrejar bai khaui tlangjaknairok: Nokha bisisni o khorok thamchisai tei nwichitham Judairokno tlang thángo;

²⁹Nebukadrejerni nokha bisichicharo bo Jerusalemni khorok char-ra tei thamchinwino khaui tlang kha.

³⁰Nebukadrejarni nokha bisi nwichithamo mwrwknai bokhorok Nebujaradan khorok snira tei khorok brwichiba Judairokno khaui tlang kha. Tlangjakrok bebagwi khorokbrwisai tei dokra ká-o.

³¹Abo khe Judani habugra Jehoiakin khaui tlangjakmani nokha bisi thamchi-snini talchinwi-o, talni nwichibani salo Babilonni habugra Ebilmerodak bugra chámani puilani bisi-o Judani habugra Jehoiakimni bokhorok tisa kha tei bono alongni phiyók kha.

³²Bo bono khairokma kókthái sa kha tei bo bai baksa Babilono tongnai habugrarokni achukthairokni slái phano bono kuchugo achuk rw kha.

³³Aphuru Jehoiachin bini alongo tong phuruni rí-chumrokno khibi kha. Hakhe bini thangsungo sal brúm brúmno habugra bai baksa achugwi chá lang kha.

³⁴Bini thangsungo Babilonni habugrani dagima bai bono sal brúm brúmni nangma jora tẃi rwjago, bo kwthang tong sak jora tẃi bini sal brúm brúmni nangma chámung-nungmung sal thwgwi’-no rwui phaijago.