Read Kok Borok JIRIMIA 6 Bible Online

JIRIMIA 6 - Kok Borok bible

JIRIMIA 6

¹Mwthangjaknani bagwi khár di, o Benjaminni bwsa bwtwirok. Jerusalemni khár di! Tekoa-o totro tam di! Bet-hakheremo hór mwchẃngwi saui man rw di. Salgrabaini digi-sigi tei sokomornai phaina naiwi tongo.

²Siyonni bwsajwk bwrwi naithok tei lotẃtẃi, ang bono sokomornai.

³Mera mwrwknairok bórokni mera bodolno tubu-ui aro phainai bórok bono kitingwi bórokni ríni nok swngnai: Bórok sak sakni sula-o merarokno mwrwknai,

⁴“Bórok bai choba nang lainani tiyar wng di! Phai di, chwng salo’-no swpraknai!” “Chini ham li ya, sal thángwi tong kha, sanja wng twtwini sampili lok kha!”

⁵“Phai di, chwng horo swprak lainai tei bini nok kwrakrokno swbai lainai.”

⁶Aboni bagwino suarirokni Subraiyung hai hwnwi sa-o: “Norok buphangrok tanwi abo bai Jerusalemni chokdeualno kitingwi hapung snam di, o kamiyungno majra berwi sátokjakna nangnai; aro sátok-tekto bai pung súk kha.

⁷Twikhor bini twino kwkwrwk khe tonma hai abo hai kheno bo bini hamyarokno srang rwui tono: Bu lai-tok lai tei swbai laimarokno simi se khna-o, kulum tei kwsarok hai máng nugo.

⁸Hus wng di, o Jerusalem, wng ya khe ang joliui nini aroni thángwi páinai; tei nono borok tongjak ya bukcha khlainai.”

⁹Suarirokni Subraiyung hai hwnwi sa-o: Bórok tong rwknai Israilrokno angur santi tẃi khe santinai; khoroksa angur khaknai langa-o angur khagwi da tẃi se khlainai.

¹⁰Sabono ang sanai tei sabono ba hus khe rwnai, saborok ba khnanai? Nai di, bórokni khunju muthupjak, Subraiyungni kókrok bórokni thani busu hai se; omono bórok chajak ya.

¹¹Phiya ba ang le belaino Subraiyungni jolimani bai kupulung; ang jolima holiui man ya. Omono laharo lukhlai chwrairok tong thani tei siklarok kuthumlaithani lukhlai rwui di. Bihik tei bwsai khoroknwino’-no tlangjaknai. Chakra bororok tei belai umor gwnangrokbo yók glak.

¹²Bórokni nokrokno buini yapha-o yapharjaknai, bórokni hapharrok tei bihiksongrokno bebakno ani yakno o ha-o tongnairokni saka-o phologwi rw khe bebakno buini wng bainai, hwnwi Subraiyung sa-o.

¹³Bórokni bisingo kotor kotoi bebakno cha ya lama tẃi ajina mokol chẃng lai-o: Diyarirok, ochairok bebakno bandinai máng.

¹⁴Bórok ani bororokni kwsarokno khe kisa khe nuk kha. Khakchangma kwrwi’-ono, “Khakchango, khakchango,” hwnwi sa-o.

¹⁵Bórok lachimasingcha khe tong kha tei selengmasingcha samung khlai kha: Hai phano se bórok lachi ya, bórok lachina rwng li ya, bórok mwkhangbo chaksa ya; aboni bagwino bórokbo a klainairok bai baksa klainai; ang bórokno sátok phuru bórok khiklai rwjaknai, hwnwi Subraiyung sa-o

¹⁶Subraiyung hai hwnwi sa-o: Lampra-o bacha di tei naiwi lama kwchamni kókno sẃng di, nai di, biyang lama kaham tong; a lama tẃi himwi nini bwkhano lengla rw di. Phiya bórok hai hwnwi sa-o, “Chwng a lama tẃi him glak.”

¹⁷Ang norokno totroni khorang khna rwna bagwi norokno mwrwknaisanobo chong kha. Phiya ba bórok, “Chwng khna glak,” hwnwi sa lai kha.

¹⁸Aboni bagwino bórokni tamo wngna nai tong, o dopharok, lukurok khna di tei si si di.

¹⁹“Khna di, ha saka tongnairok: Ang o bororokni thani digi-sigi tubu-ui tongo, omo bórokni chapmarokni bwthái, tamni hwn khe bórok ani kókrokno khunju kan li ya; tei ani phrwngmarokno khibi kha.

²⁰Sebani tubumani a satrai motom eba hakchalma hani a kwtẃima kuruk tamo chúknai? Norokni sógwi yapharmani yachakjakna chúk ya, phiya norok ratharwi yapharmanobo ang khá phurjak ya.”

²¹Aboni bagwi Subraiyung hai hwnwi sa-o: “Nai di, ang o bororokni bwskango kebengmung tono, aro buphasong thutaima hai bwsarokbo thutainai; noksa-nok ari bororok tei bini kichingsong khe komornai.”

²²Subraiyung hai hwnwi sa-o: “Nai di salgrabai bwkhakni hani bororok phaiwi tongo; ha páithakni phan gwnang dopha kaisa choba nang laina bagwi tiyar wngwi tongo.

²³O Siyonni sajwksong! Norokno kebengwi bórok badukhung tei kolongarok tẃijak, bórok bwkha kwthang tei khairokma kwrwi; bórok phaimani khorang twijlangni twi aphalni khorang hai, bórok korai kasaui choba nang laina bagwi tiyar wngjak sengkrakrok hai tiyar khe norok bai chobani bagwi phaiwi tongo.”

²⁴“Chwng bórokni mung kotorni kókrok khna kha; chini yakrok phan kwrwi kha; bwrwi sak kengna phuru ok sama hai, chini khá bo belaino kengaijak.

²⁵Hapharo ta tháng di eba lama-o ta him di: Arirok seng tẃijak, bebak bwkhakno kirimasingcha máng.”

²⁶O ani bororok, norok rí soroi kan di tei thapla saka goirok di; bwsa khoroksa susukni bagwi khá khamma hai khe khá kham di; achomsa khe sokomornai chini thani phainai.

²⁷Ang nono ani bororokno sininani bagwi tei bórokni lamano amjogwi nainani bagwi nono amjoknai tei snam phinai khlai kha.

²⁸Bórok bwkha kwrak, kebengnairok, kók khna ya, bórok pitol tei sor kwrak hai. Bórok bebakno samung hamya tango.

²⁹Phuchunga bai mar khe hór subo, sisa hór khamwi gele-o: Hai phano bórokno kwkrwk tei srai-srai khlai man ya, hwn ba borok hamyarok le norjak ya.

³⁰“Bórok khibijak rukphai hwnjago, tamni hwn ba Subraiyung bórokno khibi kha.”