Read Kok Borok KAPSIMANG KAPMA 1 Bible Online

KAPSIMANG KAPMA 1 - Kok Borok bible

KAPSIMANG KAPMA 1

¹Salsa kamiyung borok bai kupulung tongmani tini bwswk se siring sorok! Bo salsa dopharokni bisingo kotor wngwi tongma se bo tabuk bwswk khe randijwkma hai ma wng kha! Bo salsa angkorrokni bere habugrani sajwk hai tongmani tabuk khe seleng hai wng kha.

²Bo hopung muisubuk chaui kabwi bini khangaro twi yor tẃi muktwi klai-o; bono hamjaknairokni bere khoroksa phano bono bwkha methepnai kwrwi kha; bumarijwksongbo bono bandi kha, bórok bebakno bini kebengnai ari wng kha.

³Judabo buini ha-o khaui sátok-pitok khe seleng snamjakna bagwi tlangjak kha; bo tabuk buini dopharokni bisingo ma tongwi kha, tei bini lenglathai se kwrwi kha; bono riphriknairok bini birmanni jora-o bono choprogwi sekpro kha.

⁴Siyonni lamarok swlwgwi kabo, tamni hwn ba ter khlaina bagwi khoroksa phano aro phai li ya gwja; aboni dugayungrok khibijak bái kha, bini ochairok kengai lai-o; bini bwrwi siklarok bwkha yokjago tei bwkha nangjagwi kap lai-o.

⁵Bini kena arirok bini bugra wng kha, bono kebengnai arirok hamcha-o chasa-o, tamni hwn ba Subraiyung bono bini sumsok kwbángmani bagwi digi-sigi-o khiklai kha; bini bwsarokno bini kena arirok romwi tlangjak bái kha.

⁶Siyonni bwsajwkni bebak suarrok kwma bái kha. Bini ojamarok ada cháthai kwrwini mwswi hai wng kha; bórok bórokno riphriknairokni aroni phan kwrwi beljak khe kháro.

⁷Jerusalem bini dukhu-birmanni salrogo bini swkang phuruni chẃngsachani kókrokno muitu manjago. Bini bororok digi-sigi-o klai phuru aro bono chubanai khoroksa phano kwrwi kha, bini kenarok bo báikhrubwi klaimano nugwi thesra kari lai-o.

⁸Jerusalem belai sumsok kotor khlai kha aboni bagwi bo buini mwnwimung se wng si-o; bono bórom khlainairok bono khibi kha, tamni hwn ba bórok bono sak srwng srwng bukcha khe nuk kha; bo baithangbo kengai-o, tei mwkhang hui kha.

⁹Ulo tamo wngno abono bo uansuk yaui uaijaui tongmung sitra tongwi bini rígnaino tena khlai kha; bo klaima le belai kirimasingcha, Bono bwkha kwchang rwnai kwrwi kha; bono khoroksabo khakchang rwnai kwrwi. “O Subraiyung, ani digi-sigino naikhlai nai si di, tamni hwn ba kebengnai arirok kwplai wng kha!”

¹⁰Kebengnai arirok bórokni joto kaham manwirokni saka yak rw kha; bo buini dopharokno bini háyá kwtharo suda hap phaimano nuk kha, aile a bororok nini bororokni bodolo ha suda se hapma ya.

¹¹Bini joto bwsarok kengaiwi chámung naituk lai-o; bórok chámung cháui phan khanani bagwi bórokni manwi kahamrokno phal lai-o. O Subraiyung nai di, ang bwswk se chúk ya wng kha.

¹²“Ani gana tẃi lái phainai norokni thani le omo mungsa phano ya de? Naiwi nai di, Subraiyung belai khe jolimani salo ang sátokma swk khe tei sátokjaknai da tong?

¹³“Bo kuchuk sakani hór khiklai kha; abo ani bekreng bisingo suda thángwi sógwi kha; bo ani lama-o chei swngwi rw kha; bo ano uphil rw kha ano sapung mwlang cha rwui lengsa rw kha.

¹⁴“Ani sumsokrokno bo ani bangora-o Jual hai khe kha kha; bo bini yak bai abono phánwi kha kha; abono ani gwdna saka-o boksaui ani phan kwrwi khlai kha. Ang kebengwi kasu-ui man ya abo hai bororokni yago se ano Subraiyung yaphar si-o.

¹⁵“Subraiyung ani bebak phan gwnang sengkrakrokno ani bwskango khibiui rw kha; bo ani sikla sengkrakrokno kádulna bagwi jora kaisa chong kha; Subraiyung Judani bwrwi siklano angur káchrep tẃi khe káchrep kha.

¹⁶“Omorokni bagwi ang kabo; mokolni muktwi kochok kha; ano bwkha bacha rwui bwkha methepnai ang bai chal kha; ani bwsarokbo khibijak bái kha tamni hwn ba kena arirok se kwplai wng kha ba.”

¹⁷Siyon bini yak pholoksa-o, tamo khe khoroksa phano bono bwkha methepnai kwrwi; Jakobni arini bororok Jakobno kebengwi bachaui bini kena ari wng thung hwnwi Subraiyung dagiui rw kha; Jerusalem bórokni thani kaisa kwthar ya manwi hai wng kha.

¹⁸“Subraiyung bujsói khlainaisa, ang bini kókno kebengjak kha; o bororok khna di, ani tektono nai di; ani chwla siklarok tei bwrwi siklarok buini ha-o khaui tlangjak bái kha.

¹⁹“Ani hamjakmarokno ang ring kha tamo khe bórok ano bandi kha; kamiyungo ani ochairok tei tẃiphang okrarok phan khanani bagwi chámung rutuk lai phuru komor bái kha.

²⁰“O Subraiyung ang bwswk se bwkha báijak nai di; ani bwkha bisingo tekto nang kha ani tei tongkhrai kwrwi kha tamni hwn ba ang belai khe kók khna li ya ba. Lama-o khe seng butharo; nok bisingo khebo thwina simi.

²¹“Ang bahai khe kengai kha khna di; ano bwkha methepnai khoroksa phano kwrwi; ani kena arirok ani jwngjalni kókrokno khna kha; nwng khlaimano nugwi bórok tongthokjago. Nwng kók sakhlaima tẃi a salno sók phai rw si di, tei bórokbo ang manjak tẃi khe manjak thung.

²²“Nwng bórokni bebak cha yarokno nuk si thung; hakhe ano ani sumsokrokni bagwi ano khlai tẃi khe bóroknobo khlai si thung; tamni hwn ba ani kengaima báng laha tei ani bwkhabo lengpro súk kha.”