Read Kok Borok KAPSIMANG KAPMA 2 Bible Online

KAPSIMANG KAPMA 2 - Kok Borok bible

KAPSIMANG KAPMA 2

¹Kaitor bahai khe jolijagwi Siyonni sajwkno chumui bai kobolwi ton kha! Bo Israilni chẃngsachano nokha sakani ha saka-o khiklai rohor kha; bo jolijakmani salo bini yakung boksa thaino muitu khlai li ya.

²Kaitor Jakobni bebak tongthairokno khairok yaui sokomor bái kha; bo thamchi kajagwi Judani sajwkni nok kwrakrokno swbai bái kha bo bini thamchi bai bini hano tei habugrarokni bóromno ha-o khiklaiwi rw kha.

³Bo belai khe jolijagwi Israilni bebak phanno sukhrubwi swbai kha; bo bini yagra yakno bórokni kena arirok phai phuru rosaui na kha; bebak tẃi jlai-jlai khe khamnai hórjlai hai khe Jakobni bisingni bo khamwi bachasa kha.

⁴Bo kena ari hai khe bini badukhung thonsa kha, kebengwi bachanai hai khe bini yagra yak bai abono romwi chak kha; bo, chwng kung chugui tongmani Siyonni bwsajwkni nokni bebak bororokno buthar kha; bo bini thamchino hór hai khe lukhlai kha.

⁵Subraiyung kena ari hai wng kha; bo Israilno sokomor kha. Bo bini bebak noyungrokno sokomor kha, bini nok kwrakrokno báikhrup rw kha, tei Judani sajwk muisubuk chaui ma kapmano teibo báng rw kha.

⁶Bo bini kainokno tháiblwng swbai tẃi khe swbai kha, bo bini kuthum laima nokno swbai kha; Subraiyung Siyonni terno tei sabatno mwthagwi pái kha, habugra tei ochaino bo belai khe jolijak kha.

⁷Subraiyung bini baithangni háyáno khibi kha tei noktharno yakar kha; bo kebengnai arirokni yago bini nok kwrakrokni chokdeualrokno yapharwi rw kha; Subraiyungni nogo terni salo khorang kotor khnama hai khe khna kha.

⁸Subraiyung Siyonni chokdeualrokno swbaina bagwi bwkha chap kha; bo mari boui pái kha; bo bini yak bai abono sokomor ya wng glak kha; bo nok kwrakno tei chok deualno muisubuk cha rwui kap rw kha; abórokni phan kwrwi kha.

⁹Bini dugayungrok baiwi ha-o kwlwk kha; bo bini thonglarokno swbaiwi khibi kha; bini habugra tei bwsarok buini dophani bisingo khaui tlangjak kha; kerongrokbo kwrwi kha, bini diyarirok Subraiyung bai imang-mukthangbo phunukjak li ya.

¹⁰Siyonni sajwkni okra chakrarok ha-o siring siring khe achuk kha; bórok khorogo hadlwi phulwi solani rí kano; Jerusalemni bwrwi siklarok bórokni bokhorok ha-o súkpáiwi tong lai-o.

¹¹Ani mokolrok bai kabwi simi se ma tong si-o; ani bisingobo ayuk-muyuk khe tekto nang kha; ani bororok komorma bagwi tei absa kwlwirok kamiyungni lamarogo klaiwi lengwi tongma bagwi ani bwkha se ha-o klai thángma hai wng si-o.

¹²Bórok bumano “Chámung-nungmung le buro?” hwnwi sẃng lai-o, ahai hwnwi sẃngwi bórok kamiyungni lamarogo lengwi klai-o, bumani khuri-o khe klaiwi thwi-o.

¹³O Jerusalemni sajwk, ang nini bagwi tamo sanai, tamo bai nono su-ui mannai? O Siyonni bwrwi siklajwk, ang nono bubo hai khe saui bwkha kwchang rw sinai? Nini kwsa le twijlang swk tor laha sabo nono ham rwui man sinai?

¹⁴Nini diyarirok nini banta tatal tei bandinai imang-mukthangrok nuk kha; bórok nono phiyók phina bagwi nini cha yarokno phunugui rw ya, tamo khe bórok nini bagwi nugwi kók diyari samarok tatal tei lama koró rwnai máng se.

¹⁵Lama tẃi láinairok bebakno nono naisigwi yapha tam lai-o; bórok Jerusalemni sajwkno nugwi thesra kariui mwnwi lai-o tei bokhorok jangriui sa lai-o, “Omo de a katswi naithok tei hayungni tongthok kuk kamiyung hwnwi hwnjaknai?”

¹⁶Nini bebak kena arirok nono kebengwi kók sa lai-o; bórok thesra kari lai-o bua hul laiwi hai hwnwi chirigwi sa-o, “Chwng bono monogwi pái kha! Chwng o salno’-no naisingwi tongmani; tabuk khe chwng o salno man laha!”

¹⁷Subraiyung bini uansuk tẃi’-no khlai kha, bo ragdama sakhlai tẃi’-no khwbo khlai kha; sal kwbángma swkang sama tẃi’-no bo khairokma kwrwi khlaiwi sokomor kha; bo nini kena arirokno nono tẃi tongthok rw kha tei nini kena arirokni phan báng rw kha.

¹⁸Subraiyungni thani chirigwi sa di, o Siyonni sajwkni chokdeual! Nini muktwi hor sal twi yor khlai tẃi yorkhlai si thung! Nwng hopung sapung kapma ta thák si di!

¹⁹Bacha di, horo, hor loksak kap di! Nini bwkhano Subraiyungni bwskango lukhlaiwi rw di! Lama bángmasing ok khuiwi lengwi klai tongnai nini bwsarokni langma mwthangna bagwi nini yak surcha si di.

²⁰O Subraiyung, naisik di, uansugwi nai si di! Nwng ba omo sabono khlai kha? Buma ba tamo bórokni ogo achainai chwraino da chá sinai? Diyari tei ochai ba tamo nok kwtharo da butharjaksinani?

²¹Chwrai tei chakrarok lamarogo se klai tong bái si-o; ani chwla sikla tei bwrwi siklarok seng bai tantharwi butharjak bái kha; nwng jolimani salo khairokma kwrwi khe bórokno buthar bái kha.

²²Nwng ani kena arirokno tero kobok tẃi khe bebakno ringwi tubu kha; tei Subraiyungni jolimani salo khoroksa phano yógwi tháng li ya; ang bammani tei naikini khlaiwi tubumano ano kebengnai arirok sokomor bái kha.