Read Kok Borok KAPSIMANG KAPMA 4 Bible Online

KAPSIMANG KAPMA 4 - Kok Borok bible

KAPSIMANG KAPMA 4

¹Rangchak bahai khe chwna ya wngwi tháng, aswk kwchẃng rangchak kaham bahai bálai tháng! Kwthar holongrok bebak lamarogo se saharjagwi tong si-o.

²Siyonni bwsa kahamrokno salsa rangchak kaham bai se sujagwi tongmani, tamo khe tabuk hani twk taknaisani twkrok hai khe se khlaijak si-o!

³Pheuang se bwsano abuktwi cha rw-o, tamo khe ani bororokni le khairokma se kwrwi kha, bórok hasinglwngni tok mangingang hai se wng si-o.

⁴Absa kwlwirok bwslai ransajagwi kanswka-o kwphaui thángjak bái kha; chwrairok chámung san lai-o, tamo khe khoroksa phano bórokno chámung rwnai se kwrwi.

⁵Salsa chámung kaham chánai-nungnairok se tabuk lama jangalrogo se hángchaui tong si-o; rí morok chaksru-sru kannai-chumnairok se tabuk burung khe botok-botok thapla-o se klai tong si-o.

⁶Borok khoroksa swk bai yak kosonjak yaui’-no achomsani bisingono sokomor yaui páijaknai a Sodomni slái se chini bororokni sumsok le báng kuk si-o.

⁷Bórokni tẃiphangrok kothor kwsapni slái phano kuphur, dutni slái’-bo kuphur; twiyung tolani holong hai bórokni chẃngmani, bwkhnai khe holong Saphir hai.

⁸Tabuk khe bórokni bumkhang khormaini slái se som si-o; bórok lamarogo siniui man li ya. Bórokni bukurrok rampraui bekreng bai se swrabwi tháng si-o; abo buphang hai khe se ranwi raksa si-o.

⁹Ma chá yaui ma thwimani slái choba-o seng bai tanjagwi butharjakma se hamo, kheto panthorni mai-khul kwrwi wngwi ok khuiwi thwiwi tong bai kha.

¹⁰Khairokma gwnang bumarokni yak se tabuk sakni bwsarokno se sóngwi chá lai si-o; ani bororok bórokni komorma jora-o bórokni bwsano se chámung khlai si-o.

¹¹Subraiyung bini thamchi tungjakmano tikhlai baisuk kha; bini joliui tungphlamano lukhlai kha, bo Siyono hór phnang kha tei aboni yaphangno sógwi pái bai kha.

¹²Jerusalemni dugayung tẃi khe kenarok eba kebengnairok hap phaiwi man anw hwnwi ha sakani habugrarok tei swngcharni tẃiphangrok poito khlai ya.

¹³Omo bini diyarirokni sumsokni bagwi tei ochairok cha ya khlaima bagwi se wngo, tamni hwn ba bórok aro borok kahamrokni thẃi kochok rw kha.

¹⁴Bórok mokol phularok hai khe lamarogo ayang-uyang wng lai-o, bórok thẃi bai khe aswk khe sumsok bángma bagwi bórokno khoroksa phano tangna nai li ya gwja.

¹⁵Bororok bórokno, “Hakchal wng di, kwthar yarok! chal di! chal di! Chwngno ta tang di!” hwnwi chirigo. Hakhe bórok orondi chaui berainai wng kha; Dopharok bórokno “Bórok oro tei tongwi man glak” hwnwi sa lai-o.

¹⁶Subraiyung baithang se bórokno piring-poroi khlai-o, bo bórokno tei naikhlai glak kha; ochairok bórom phunukjak ya okra-chakrarokbo sak nangjak ya.

¹⁷Ereng ereng chwng mokol logwi naisigwi tongwi mokol ruai kha; chwngno mwthangwi man ya abo tẃi dopharokno se chwng naisik lai máng tong kha.

¹⁸Bórok chini yapri songwi riphrikma bagwi chwng lamarogo phano nongkhorwi man li ya; chini páithak jora belai sederwi phai kha; chini sal pái se tong kha; tamni hwn ba chini páithakni sal phai laha.

¹⁹Chwngno riphriknairok nokhani tolingni slái se kodo gwja; bórok chwngno hatháirogo riphrigo, bórok hasinglwngo chwngno huijagwi naisingwi tong lai-o.

²⁰Subraiyungni chongthar chongjak, chini rangma bo se bórokni uarai hakhoro klai kha, yang chwng le bono se, “Chwng bini saklomo khe dopharokni bisingo tongnai” hwnwi sa laimani.

²¹Ha Ujo tongnai o Idomni sajwk, khápang srangwi tongthok di; tamo khe nonobo a khuri rwjaknai; nwng pheknai tei kanmung-chummung kwrwi srwng-srwng ma wngnai.

²²O Siyonni sajwk, nwng nini sumsokni manthai majrano man bái kha, bo nono buini ha-o seleng khlaiwi ton glak kha; tamo khe o Idomni sajwk, bo nini cha yarokni majra berwi sátoknai tei nini sumsokno pháng-pháng khe phunuknai.