Read Kok Borok KAPSIMANG KAPMA 5 Bible Online

KAPSIMANG KAPMA 5 - Kok Borok bible

KAPSIMANG KAPMA 5

¹O Subraiyung, chini saka-o bwswk tamo klai kha naiwi nai si di; chini lachimasingcharokno naiwi nai si di!

²Chini man bantarok borok sini yarokni se wng si-o, chini nok-hukrok khe phatarsarokni wng kha.

³Chwng ma-pha kwrwi bwsarok wng bái kha, chini pha kwrwi kha; chini apha kwrwi kha; amasongbo randi wng bái kha.

⁴Chwng twibo pai se ma nungo; bolrokbo pai se ma sógo.

⁵Chini bangora-o horbak boksajak khe chwng him rwjak kha; chwng hángchaui leng kha, lengla rwjak li ya.

⁶Chwng nangma chámungni bagwi Asiriya tei Ijipni yago rwjak kha.

⁷Chini chuchusong sumsok khlai kha; bórok kwrwi kha, chwng khe bórokni cha yarokno ruju-ui ma tong kha.

⁸Selengrok se chini bugra wng si-o; chwngno khoroksa phano bórokni yakni phiyóknai se kwrwi.

⁹Hasinglwngo butharjakna kiri tw tẃi chini langmano dobo khiklaiwi se chwng chámung ma thumo.

¹⁰Chini bukur thapa hai khe tung kha, khampro rwnai asari nangwi abo hai wng kha.

¹¹Siyono bwrwirok tei Judiani kamiyungrogo bwrwi siklarok romphre-sophre khe dera rwjak kha.

¹²Habugrani tangphang okrarok yak khaui tonjak bái kha; okra-chakrarokbo bórom rwjak bai li ya.

¹³Sikla chaslokrokno juraboli khe gom phere rwjak kha; tei chwrairokno khe bol motha tẃi rwui yapri bel rw kha.

¹⁴Okra-chakrarok kamiyungni dugayungo achuk phai li ya, siklarokbo khnathok tammungrok tam li ya.

¹⁵Chini kháni tongthokma kwrwi kha; chini mwsamungrok wng thani kap laimungrok se wng si-o.

¹⁶Chini bokhorokni motok kogwi klai kha; chini le bwswk se kirimasingcha, tamni hwn ba chwng sumsok khlai kha.

¹⁷Omoni bagwi chini bwkhabo thwi kha, chini mokolbo nuktha li ya,

¹⁸tamni hwn khe Siyon hathái khibijak wng kha; pheuangrok se aro himgurung lai si-o.

¹⁹Tamo khe o Subraiyung, nwng mol brúmno tong phlai-o; nini achukthayungbo kusung kusung tong phlai tongo.

²⁰Nwng ba tamo chwngno mol brúmni bagwi chwngno pogwi pái lang, tamo yakar phlai ba rw lang?

²¹O Subraiyung nwng chwngno yachak phir si di! Hakhe chwng kiphilwi phaiwi man phirnai; chini salrokno swkang phuruni sal hai khe kwtal khlai ja phir di.

²²Nwng chwngno khibi súgwi da pái sinai? Nwng chwngno aswk kheno de jolijak lang?