Read Kok Borok ESEKIEL 1 Bible Online

ESEKIEL 1 - Kok Borok bible

ESEKIEL 1

¹Ang Esekiel khaui tlangjakmani nokha bisi thamchini tal brwini sal bani salo, Kebar twima rukungo bui bai baksa tlangjaknairok bai tong phuru Kaitor ano chuknoha phiyogwi phunukmungrok phunuk kha.

²Habugra Jehoiachin khaui tlangjakmani nokha bisikbani talbani talo,

³Kolodiasarokni ha Kebar twima rukungo Subraiyung Busini bwsla ochai Esekielno kók sa kha. Subraiyungni yak bini saka-o tongo.

⁴Ang naisaui nai ba salsibai bwkhakni nokbar kotor sibwi phaima nuk kha, chumui bisingo belai khe pohor kwchẃngma wngjak tei aboni kwcharo hór bisingo pitol chẃngsama hai khe chẃngsaui tong kha.

⁵Aboni bisingo khe borokno kosol khe mak brwi mal kha;

⁶abórokni kaisa kaisani mwkhang tháibrwi tei bwkrangbo kangbrwi kangbrwi tongo.

⁷Bórokni yakungrok khe keplengma, bórokni yak khe musukrokni hai, abo pitol hujak hai chẃngsajak.

⁸Abórokni bwkrang tola-o yakbo tongo, abo borokni yakno kosol, abo babaibrwi’-ono tongo. A kaibrwirokni mwkhangrok tei bwkrangrok tongo.

⁹Bórokni bwkrangrok kaisa bai tei kaisa buchugo nang laijak. Bórok kutulwi tháng lai khe bwskang naharwi thángo tei uphil lai ya.

¹⁰Bórokni mwkhangrok khe obo hai: bwskangni khe borok bumwkhang, yagra bwkhakni khe singho mwkhang, yaksini khe musuk mwkhang tei uklokni khe toling mwkhang.

¹¹Bórokni mwkhangrok abo hai se. Bórokni bwkrangrok saka-o pheheljak, kaisa kaisani bwkrang kangnwi khe tongo, kaisani bwkrang tei kaisani bai nanghor laijak tei kangnwi bwkrang khe bórokni bwsakno kholopjak.

¹²Bórok thángna hwnwi chong tẃi’-no bwskang naharwi thángwi mano tei uphil lai ya.

¹³Yabrwirokni bere chẃngmani hórkangni hórjlai tei homchang kwchẃngmano kosol aro hór phai-o thángo wng wngwi tongo. Aroni[1] belai chẃngsajak tei jilikma nongkhorwi thángo.

¹⁴Jilikma hór budul hai khe a yabrwirok thángo phai-o wngwi tongo.

¹⁵Ang a yabrwirokno naiba, bórokni[2] gana-o kaisa kaisa khe kaibrwi gorgori ha-o nangjak.

¹⁶A gorgorirok khe ahai; khrangji-ji holong kahamrok hai chẃngsajak, bebak gorgori tháibrwirok tháisa bai tei kaisa sol lai-o. Tháisa tháisa gorgori bisingo tei tháisa gorgori hai khe snamjak.

¹⁷Abórok malwi tháng lai khe babaibrwi bwkhak’-no uphil yaui thángwi mano.

¹⁸Tháibrwi a gorgorirokni bomol tongo tei bokongrok sungchajak tongo; phiya gorgori bomolo mokolrok tongo.[3]

¹⁹Yabrwirok kutulwi tháng lai khe, gorgorirokbo abórok bai baksa thángo, yabrwirok hani saka-o kasa khe, gorgorirokbo kasa-o.

²⁰Muchungma’-ono a yabrwirok thángo tei gorgorirokbo abórok bai thángo, tamni hwn ba bórokni muchungma gorgori-o se tongo.

²¹Yabrwirok kutul khe a gorgorirokbo kutulwi thángo, bórok thir khe bathagwi tong khe abórokbo thir khe bathagwi tongo, bórok hani saka-o kasa khe abórokbo kasa-o, tamni hwn ba yabrwirokni muchungma gorgori-o se tongo.

²²Yabrwirokni bokhorok saka-o núkhúng khungchili hai khe pheheljak, abo kristal hai khe chẃngbirijak tei kothor hai phursajak.

²³Núkhúngni tola-o bórok bórokni bwkrang kangnwi phehel laijak, kangsa tei kangsani bwkhago pheheljak, abórok kaisa kaisani bwkrang kangnwi bai bwsak kholopjak.

²⁴Bórok tháng bai khe, ang bórokni bwkrangrokni sarino twi kwbángma kutuk laima hai khe, phan gwnangni khorang hai khe, kwbángma sengkrakrokni khorang hai khe khna kha. Bórok bathak phuru khe, bórokni bwkrangrokno tikhlai-o.

²⁵A malrok tongmani sakani kaisa khorang phai kha. Bórok bathak phuru khe bwkrangrokno tikhlaiwi tono.

²⁶Bórokni saka-o achukthayung hai tongo. Abo holong kwkhrangno kosol. A achukthayung khe borokno kosol.

²⁷Aboni saka-o ang sal chẃngsajak hai tei hór hai khe nuk kha, bwchangni khama-o khe hór hai bono kitingwi chẃngsajak.

²⁸Uatwini salo nokha saka-o chokhrengni bumul hai, abo hai khe se bono kitingwi chẃngsajak. Ang abo hai khe Subraiyungni chẃngsacha nuk kha, hakhe ani mwkhang ma bomson kha, hakhe ang khoroksani kók samani khorang khna kha.