Read Kok Borok ESEKIEL 10 Bible Online

ESEKIEL 10 - Kok Borok bible

ESEKIEL 10

¹Hakhe ang naiwi nuk kha núkhúngni saka-o cherubrokni bokhorok saka-o khe Saphir holong kwkhrangni snamjak achukthayung hai nuk kha.

²Bo rí kuphur chumjakno hai hwnwi sa kha, “Cherubni tolani gorgori kwcharo tháng di, hokhi kwchẃng khe khamwi tongmano nini yak bai yakasa khochaui naui kamiyung gwnangwi abono saharwi rwui di.” Bo abo hai khlaimano ang nuk kha.

³Cherubrok khe nokni salgrabai bwkhak bacha laijak, a bororok noksingo habwi tháng khe noksingo chumui bai kupulung wng kha.

⁴Tei noksingo Subraiyungni chẃngsacha bai chẃngsaui tong kha. Nokthar chẃngsachani chumui bai kupulung wng kha tei noktharni nokhlarok Subraiyungni chẃngsacha bai kwchẃng wng bai kha.

⁵Phan gwnang Kaitor kók sama khorang hai khe cherubrokni bwkrangrokni khorang hakchal phataro tong twtwi khna hor kha.

⁶Hakhe omo hai wng kha rí kuphur kanjakno “Cherubni tola-o tongnai gorgori kwcharni hórno naui di” hwnwi dagi khe bo thángwi gorgori gana-o bachaui kha.

⁷Cherub aro tongmani hórni bwkhak yak pholok kha, bo kisa hokhi bothrai yak bai khocha kha tei rí kuphur kanjak borokni yago abono ton kha, bo abono naui phataro tháng kha.

⁸Cherubrokni bwkrangrokni bisingo khe borokni yak hai khe nukjago.

⁹Ang nai ba, aro cherubrokni gana-o kaibrwi gorgorirok tongma nuk kha, kaisa cherubni gana-o kaisa kaisa gorgori tongo, gorgorirok khe kwchẃng holong kaham hai se.

¹⁰Gorgori kaibrwbrwi’-no sol lai bai-o, abo kaisa gorgorini bisingo tei kaisa gorgori hai se.

¹¹Bórok kutulwi tháng khe uphil ya khe babaibrwi bwkhak tháng lai kha, bwskangni gorgori naharwi tongmani phaisingo’-no rwktharwi tháng lai kha tei kiphil li ya.

¹²Bórokni bwskangrok phikungrok, yakrok, bwkrangrok bebakno gorgorirokni haino mokolrok bai kupulung.

¹³Ang khna kha o gorgorirokno swkangni mung hai khe “Gorgorino” hwnjago.

¹⁴Cherub matheni’-no mwkhang tháibrwi khe tongo, kaisa khe cherubni mwkhangno kosol tei kaisa khe borokni mwkhang tei kaisa khe singhoni mwkhang tei kaibrwi-o khe tolingni mwkhang.

¹⁵Hakhe cherub kuchuk bwkhak kasasa kha. O cherubrokno’-no ang Kebar twima rukungo nukmani.

¹⁶Cherubrok kutul khe gorgorirokbo haino abórok bai baksa thángo. Cherubrok hani birsana bagwi bwkrang phehel phano gorgorirok aroni kak lai ya.

¹⁷Cherub bathak khe gorgorirokbo bathago, cherub tháng khe gorgorirokbo abórok bai baksa thángo, tamni hwn ba cherubrokni phan abórokni bisingo tongo.

¹⁸Hakhe Subraiyungni chẃngsacha nokthar duglamni ongkhorwi tháng kha tei cherub tongmani saka-o bachaui kha.

¹⁹Ang naiwi nuk kha cherubrok bórokni bwkrang phehelwi hani birsa kha tei gorgoribo abórok bai baksa tháng kha. Bórok Subraiyungni noktharni salka bwkhakni duglamo bachaui kha tei Israilni Kaitorni chẃngsacha bórok bai baksa tong kha.

²⁰Kebar twima rukungo nukma hai’-no ang Israilni Kaitorni kháma-o khe cherubrok tongmano nuk kha tei ang abórokno cherub hwnwi saui man kha.

²¹Bórok matheni’-no mwkhang kaibrwi, bwkrang kangbrwi tei bórokni bwkrangrokni bisingo khe borokni yak hai tongo.

²²Bórokni mwkhangrok khe ang Kebar twima rukungo nukmani mwkhangrokno kosol. Bórok bwskang naharwi’-no tháng lai kha.