Read Kok Borok ESEKIEL 11 Bible Online

ESEKIEL 11 - Kok Borok bible

ESEKIEL 11

¹Kaitorni Phola ano tisaui tlangwi salka bwkhago naharjak Subraiyungni noktharni salkani duglamo tubu kha, aro borok khorok nwichiba tongo, bórokni bisingo Ajurni bwsla Jasania tei Benaiani bwsla Pelatia dophani khoroknwi ojamarokbo tongo.

²Kaitor ano hai hwnwi sa kha, “Borokni sajla, o bororok se hamya chap laiwi kamiyungo samung hamya phrwngo.

³Bórok sa lai-o, ‘Nok tangnani jora wng ya kho diba? kamiyung khe sóngjaknai kárai hai tei chwng khe ba muihan hai se wng bai kha.’

⁴Abo bai’-no tabuk, borokni sajla, bórokno kebengwi kók diyari sakhlai si di.”

⁵Subraiyungni Phola ano kobolwi bororokno hai hwnwi sa di hwnwi sa kha, “Subraiyung hai hwnwi sa-o, Israilni bororok norokni uansukma tei bwkhani kókno ang saui mano.

⁶Norok kamiyungo borok kwbángma butharwi laharrogo kwthwi bai kupulung khlai kha.

⁷Abo bai’-no Subraiyung Kaitor hai hwnwi sa-o, norok buthar baimani bororok khe muihan hai se tei o kamiyung khe muitwk hai wng kha tei norok o kamiyungni norwi rohorjak bainai.

⁸Norok khe sengno kiri bai-o tamo khe ang norokni saka-o seng tubunai hwnwi Subraiyung Kaitor sa-o.

⁹Ang o kamiyungni norokno kariui rohorwi buini hani bororokni thani-o yapharnai tei bórok norokno majra rwnai.

¹⁰Norok Israilni hani ari-o seng bai ma thwi bainai. Hakhe ang se Subraiyung hwnwi norok saui mannai.

¹¹O kamiyung norokni muitwk wng glak tei norok aroni muihan wng glak ang norokno Israilni hani ari-o se majra rwnai.

¹²Hakhe ang se Subraiyung hwnwi norok saui mannai, tamni hwn ba norok ani lama-o him lai li ya gwja tei ani raida tẃi tong lai li ya, phiya ba norokno kitingwi tong bainai dopharokni raidano se tẃi lai tong lai si-o.”

¹³O kók nang phai kha, ang kók diyari sakhlaiwi tong phuru khe Benaiani bwsla Pelatia thwi kha. Hakhe ang ani mwkhangno ha-o bomwi hai hwnwi chirigwi kap kha, “O Subraiyung Kaitor Israilni yógwi tong rwknairokno bebak da buthar bai sinai?”

¹⁴Subraiyung ano hai hwnwi sa kha,

¹⁵borokni sajla, nini takhukrok, buini ha-o khajagwi tongnairok bebak Israil bororok tei Jerusalemo tong bainairok hai hwnwi sa-o, “Bórok Subraiyung bai hakchalma-o tháng bai kha, chini bagwi se o hano rwjak kha.”

¹⁶Abo bai’-no hai hwnwi saui di, “Subraiyung Kaitor hai hwnwi sa-o, ang bórokno hakchalma-o rohorwi buini ha-o piring-poroi khlai phano, bórok thángmani ha-ono ang bórokni tongthar wngnai.”

¹⁷Aboni bagwi bórokno hai hwnwi sa di, “Subraiyung Kaitor hai hwnwi sa-o, ang norokno dopharokni bisingni tei buini hani tei uáisa thum phinai tei Israil hano norokno yaphar phinai.

¹⁸Bórok kiphilwi phai khe, bórok bebak hamya manwirokno tei mangtangrokno ma khibi bainai.

¹⁹Hakhe ang bórokno kaisa bwkha kwtal rw anw tei aro phola kwtalno rwnai; ang bórokni holongni bwkhano norwi bahanni bwkhano rwnai.

²⁰Hakhe bórok ani dagima kók khnanai tei ani raidarokno tẃinani khir-khir wngnai; bórok ani bororok wng bainai tei ang bórokni Kaitor wngnai.

²¹Tamo khe samung hamya tangnairok bai mwtai khulumnairokno, bórokni samungno bórokni bokhorok saka-o klai rwnai, hwnwi Subraiyung Kaitor sa-o.”

²²Hakhe cherubrok bórokni bwkrang phehel kha tei gorgorirok abórok bai baksa tháng kha, Israilni Kaitorni chẃngsacha bórokni saka-o khe tong phai kha.

²³Subraiyungni chẃngsacha kamiyungno yakarwi salka bwkhakni hachugo thángwi bathagwi kha.

²⁴Imang-mukthang khe Kaitorni Phola ano tisaui tlangwi ha Babilono tubu kha. Hakhe ang imang nukmani páiwi tháng kha.

²⁵Hakhe ang buini ha-o khajagwi tong bainairokno Subraiyung ano bebak phunukmarokno saui khna rw bai kha.