Read Kok Borok ESEKIEL 12 Bible Online

ESEKIEL 12 - Kok Borok bible

ESEKIEL 12

¹Subraiyung ano hai hwnwi sa kha,

²“Borokni sajla, nwng kebengnai bororokni bisingo se tongo. Bórokni mokol tong phano nuk ya, bórokni khunju tong phano khna ya, tamni hwn ba bórok kebengnairok se.

³Aboni bagwi bórokni sajla, nwng khaui buini ha-o tlangjakna bagwi nini tong kwrwi manwirokno tiyar khlai di, hakhe nwng sal kwthang kwthangno bórokni mokol bwskango bini aro thángwi phunuk di tei bórok kók khna ya phano omo bai khe saui manna phano tongo.

⁴Buini ha-o khaui tlangjakmani hai khe sal tongsani’-no bórokni bwskango sanjani jora-o buini ha-o khaui tlangjaknai borok hai khe tháng di.

⁵Bórokni bwskango nini manwino tẃiwi chokdeualno khurwi aboni bising tẃi láiwi tháng di.

⁶Bórokni bwskango nini pojarokno nini bangora saka-o boksaui na di, hakhe sijak ya tẃi khe abono tlang di tei nini mwkhangno kholop di hakhe nwng ha nukhlai glak, tamni hwn ba nwng khlaimani abo Israilni bagwi mari wngnai.”

⁷Ang Subraiyung bai dagijakmani hai’-no khlai kha. Ang ani pojarokno sal kwthango’-no buini ha-o thángna bagwi kariui tubu kha tei sanja-o khe ani yak baithangno chokdeual khur kha tei ang tepsa khe tháng kha, bórokni bwskango’-no ani pojano phairukung saka-o khe tlang kha.

⁸Teini phungo Subraiyung ano hai hwnwi sa kha,

⁹“Borokni sajla, Israil núkhungni kebengnai bororok, nwng tamorok khlai trwng hwnwi sw da sẃng lai?”

¹⁰Bórokno hai hwnwi sa di, “Subraiyung Kaitor hai hwnwi sa-o, o kothoma khe Jerusalemni tẃiphangrok tei aro tong bainairokni bagwi se.”

¹¹Bórokno sa di, ang norokni bagwi kaisa mari phunukmani se, ang khlaima hai’-no bórok khlaijaknai, bórok buini ha-o khaui tlangjak bainai.

¹²Tẃiphangrok sakni pojano bangora saka-o boksaui tepsa khe chokdeual khurwi abo tẃi lái thángnai, hakhe bo ha nukhlai ya tẃi khe mwkhang kholopnai.

¹³Ang bini saka-o chei swngwi khẃi-o kwcha rwnai tei ang bono ani khẃi-o romwi tlangnai; ang bono Kolodiasarokni ha Babilono tubunai, hai phano bo abono nuk glak; tei bo aro’-no thwinai.

¹⁴Tei ang bo bai tongnai, bororokno bebak bwkhago’-no oroi-poroi khlaiwi rohornai, bono chubanairok, sengkrakrok, bórokno butharnani bagwi seng tẃiwi rutuknai.

¹⁵Ang bórokno buini dopharokni bisingo tei buini ha-o oroi-poroi khlaiwi rohor khe, Ang se Subraiyung hwnwi bórok saui mannai.

¹⁶Tamo khe ang bórokni bisingo baksano chobani, asarini tei bokni yakni phiyóknai; hakhe bórok kubun dopharokni bisingo tong phuru abo samung hamya hwnwi saui mannai. Hakhe ang se Subraiyung hwnwi saui mannai.

¹⁷Teibo Subraiyung ano hai hwnwi sa kha:

¹⁸Borokni sajla, nwng chá phuru khe ninang twtwi chá di tei nung phuru khe kwlwiwi uana twtwi khe nung di.

¹⁹Hani bororokno sa di, Subraiyung Kaitor Israil hani Jerusalemo tongnairokno hai hwnwi sa-o. Bórok kiri twtwi chámung ma chá anw tei kwlwi twtwi ma nung anw tamni hwn ba oro tongnairok jotono ur nangjak máng gwjani bagwi bórokni ha bukcha khlaijaknai.

²⁰Borok kupulung tongmani kamiyungrok sokomorjak bainai tei a ha bukcha wngwi páinai, hakhe norok ang se Subraiyung hwnwi saui mannai.

²¹Subraiyung ano hai hwnwi sa kha,

²²borokni sajla, ha Israilno tẃiwi bororok phrwngmung kók tongmarok tamo wng kha, “Jorarok lái thángo hai phano kók diyari sakhlaijakmarok nang phai li ya?”

²³Aboni bagwi bórokno hai hwnwi sa di, “Subraiyung Kaitor hai hwnwi sa-o, ang o phrwngmung kókrokno mwthaknai tei Israil ha-o bororok a phrwngmung kókrokno tei khursa glak.” Tamo khe bórokno sa di jora sampha kha bebak kók diyari sajakmarok nang phainai.

²⁴Tamni hwn khe Israil bororokni bisingo tei tatal khe imang nukmung tei tatal khe sama kók diyari tong glak.

²⁵Tamo khe Subraiyung tamo khlainai abono ang sanai, abo dwk yaui’-no nang phainai, o kebengnai núkhungrok nini jora’-ono, ang sama hai kheno khlainai hwnwi kwplaisa Subraiyung sakhlai-o.

²⁶Subraiyung ano hai hwnwi sa kha:

²⁷“Borokni sajlano nai di, Israil núkhungrok hai hwnwi sa lai tongo, ‘Bo phunukjakmani abo nangnani sal kwbángma tong kho, kók diyari samarok nangnabo hakchal kho.’

²⁸Aboni bagwi bórokno hai hwnwi sa di: Subraiyung Kaitor hai hwnwi sa-o, ani kókrok tei nang yaui tháng glak, phiya ang kók sama hai’-no khlaijaknai, hwnwi Subraiyung Kaitor sa-o.”