Read Kok Borok ESEKIEL 13 Bible Online

ESEKIEL 13 - Kok Borok bible

ESEKIEL 13

¹Subraiyung ano hai hwnwi sa kha,

²Borokni sajla, sakni bwkhani muchung tẃi khe kók sanai, Israilni diyarirokno hai hwnwi sa di, “Subraiyungni kókno khna di.”

³Subraiyung Kaitor hai hwnwi sa-o, diyari tatalrok bwswk se kirimasingcha, bórok sakni muchungmani kókno sa-o tei bórok mungsa-o phano nukmani kwrwi.

⁴O Israilni bororok, norokni diyarirok kamichang kwbai-o tong bainai siyalrok hai se.

⁵Subraiyungni salo choba-o bachaui tongwi manna tẃi khe norok Israilni bagwi chokdeual bo tang li ya tei aro bo tháng lai li ya.

⁶Bórok nukmarok tatal se tei tatal khe Kaitorni kókno sa-o, bórok sa lai-o, “Subraiyung hai hwnwi sakhlai-o,” yang le Subraiyung bórokno ro se rohor ya, hai phano bórokni kókrok nang phainai hwnwi sa lai-o.

⁷Norok nukmanirok tatal se tei tatal khe Subraiyungni kók hwnwi sa-o, norok hai hwnwi sa lai-o, “Subraiyung sakhlai-o,” yang le ang bórokno mungsa samani se kwrwi?

⁸Aboni bagwi Subraiyung Kaitor hai hwnwi sa-o, “Norok tatal khe nugo tei tatal khe Kaitorni kók hwnwi sa-o, ‘Abo bai’-no Phankrak Subraiyung ang norokno chajak ya hwnwi sakhlai-o.’ ”

⁹Tatal khe nuknai tei tatal khe Kaitorni kók sanai diyarirokno ang kebengnai. Bórok ani bororokni kuthum laima-o ma tong glak tei bórokni mungrokno, Israil bororokni bisingo bórokni mung swijak glak tei Israil ha-o bo habwi man glak, hakhe ang se Subraiyung Kaitor hwnwi norok saui mannai.

¹⁰Tamni hwn khe bórok ani bororokno khakchangma kwrwini jora-o bo bebak khakchang tongo hwnwi saui lama koró rw bai-o. Tei bororok ham tha ya khe chokdeual tang phuru-o bo, o diyarirok phaiwi haino kuphur chwndwi bai lepe phai kha.

¹¹Hakhe, o kaham khe tangjak ya chokdeualno lepenairokno sa di, abo báiwi klainai. Nokbar, uatwi phainai; kothor klainai, hakhe chokdeual báiwi klainai.

¹²Chokdeual báiwi klai khe bororok nono sẃngnai, kuphur bai lepemani abo tamo wng kha?

¹³Abo bai’-no Subraiyung Kaitor hai hwnwi sa-o, “Ang joliui nokbar kotor rohornai tei uatwi kwbángma phai rwnai, kothor kotormarok klaiwi chokdeualno swbainai.

¹⁴Norok chwndwi bai lepemani chokdeualno swbaiwi ha-o khiklai rwnai, hakhe aboni thonglarokno lukurok nuknai. Norokbo a chokdeual bai baksa komornai, hakhe ang se Subraiyung hwnwi norok saui mannai.”

¹⁵Hakhe ang chokdeualno tei abono chwndwi bai lepenairokni saka ani jolima khiklainai; hakhe ang nono sa anw a chokdeual phiya abono lepenairok

¹⁶tei Israilni diyarirok Jerusalemno tẃiwi kók diyari sanairok tei tong kwchang kwrwi twtwi tong kwchangni kókno imang-mukthang nugo hwnwi sanairokni saka ang abono khiklainai hwnwi Subraiyung Kaitor sakhlai-o.

¹⁷“Borokni sajla, norokni, bwrwirokni bere bórokni bwkhani uansukma bai kók sanairokni bagwi kók diyari sa di.

¹⁸Subraiyung Kaitor hai hwnwi sa-o: Norok danda-baji khlainairok tei kamchwlwi yaktwk bai tei buini mwkhang khapungnairok bwswk hamya sitra gwja, nwng ani bororokno khẃi bai romwi nwng sak sak khe yóknai hai da ma tong?

¹⁹Norok barli mochomsa tei auan mochomsani bagwi ani bororokni bwskango ano mwkhang sók kha. Thwina kwrwi bororokno butharwi tei thangna kwrwi bororokno mwthangwi, norok tatal kók khnanai borokrokno tatal kók bai khe bandi kha?

²⁰“Abo bai’-no Subraiyung Kaitor hai hwnwi sa-o: nai di, ang nini danda-baji phunugui bororokno imang cha rwui toksarokno rom tẃi khe rommano naislero, ang bórokno nini yakni sepleui toksa hai khe phiyóknai.

²¹Ang norok mwkhang kholopmano sichiknai tei ani bororokno nini yakni phiyóknai, bórok tei nini khẃi-o kwchanairokbo wng glak, hakhe ang se Subraiyung hwnwi norok saui mannai.

²²Borok kahamrokno nwng tatal kók bai bwkha swbai kha, ang bórokno bwkha swbai ya tei borok hamyarokno khe phan rw chru kha aboni bagwi borok hamyarok mwthangjakna bagwi lama hamyani kiphilwi phai li ya,

²³aboni bagwi nwng tei uphla-káphla imang nukmani eba diyari kan rwui man glak kha, tamni hwn khe ang ani bororokno nini yakni phiyóknai hakhe ang se Subraiyung hwnwi saui mannai.”