Read Kok Borok ESEKIEL 14 Bible Online

ESEKIEL 14 - Kok Borok bible

ESEKIEL 14

¹Tabuk Israilni baksa tẃiphangrok ani thani-o phaiwi achuk lai phai kha.

²Subraiyung ano hai hwnwi sa kha,

³borokni sajla, o bororok bórokni bwkha-o mwtairokno achuk rw kha tei bórokni bwskango abórokno tonwi abo bai bórok sumsogo klai lai kha, ang bórok bai sẃngjagwi tongnai hwnwi de bórok ba chong lai?

⁴Abo bai’-no bórokno hai hwnwi sa di: Subraiyung Kaitor hai hwnwi sa-o, khoroksa swk Israil bini bwkha-o takjak mwtaino ton khe tei kebengnai hamyano bini bwskango ton khe phiya diyari khoroksa swkni thani tháng khe, ang Subraiyung se bórok kwbángma takjak mwtairokno khulummano bwkha-o muitu tonwi kók sanai.

⁵Takjak mwtairokni bagwi ano khibinairokno bwkha kiphil rwui tubu-ui manna tẃi khe ang omo hai khlai-o.

⁶“Aboni bagwino Israil núkhungrokno sa di: Subraiyung Kaitor hai hwnwi sa-o: Khá kiphil di! Takjak mwtairokni aroni tei norokni selengmasingcha samungrokno yakarwi phai si di.

⁷Israilni bisingo khoroksa swk eba khe Israil ha-o tong phainai buini hani borok ang bai kagwi thángwi bini bwkha-o takjak mwtairokno ton khe tei bini mokol bwskango kebengnai hamyarokno tonwi, khoroksa swk diyarini thani ani kók sẃngna tháng khe, ang Subraiyung sak baithangno bono sa anw.

⁸Ang a borokno naisik glak tei bono kaisa phunugui sajaknai tei holongni yakálam snamnai. Ang bono ani bororokni bisingni khagwi rohornai. Hakhe ang se Subraiyung hwnwi norok saui mannai.

⁹Khoroksa swk diyari phano bandiui tatal khe kók diyari sa rw khe, angbo a diyarino bandinai tei ang bono ani Israil bororokni bisingni sokomorwi páinai.

¹⁰Bórok bórokni cha yano ma rujunai diyari bai bini thani kók sẃng phainai khoroknwnwi’-no baksa khe cha ya wngma klainai.

¹¹Hakhe Israil bororok ano tei yakarwi tháng glak, eba bórok tei haino sumsok bai gwdalwi sak sakno rw glak. Hakhe bórok ani borok tei ang khe bórokni Kaitor wngnai, hwnwi Subraiyung Kaitor sakhlai-o.”

¹²Subraiyung ano hai hwnwi sa kha,

¹³borokni sajla, kaisa ha ano kebengwi sumsok khlai khe kók narwk yaui samung tang khe ang bono kebengwi tisanai, phiya bini chámungrokno mwthagwi asari tubunai, hakhe aroni borok tei mal-matarokno butharnai.

¹⁴A, borok khoroktham, Noa, Daniel tei Job aro tong phano, bórokni kaham bai bórok simi se thangnai, hwnwi Subraiyung Kaitor sa-o.

¹⁵Tumungno ang bolongni yabrwirokno o ha-o rohorwi bukcha khlai khe khoroksa phano yabrwirokni bagwi ayang tẃi tháng rak glak.

¹⁶O borok khorokthamrok aro tong bai phano, Ang Subraiyung Kaitor sa-o, bórokni chwla eba bwrwi bwsarokno suda mwthangjak glak, bórok simi se yóknai tei o ha khe bukcha wngnai.

¹⁷Eba tumungno ang o ha-o choba phnang khe tei eba bororokni saka tẃi sengrokno lái rw khe tei ang bórokni bororokno tei mal-matarokno butharnai.

¹⁸O borok khorokthamrok aro tong phano, Subraiyung Kaitor hai hwnwi sa-o ang tong sak, bórok bórokni chwla bwsa eba bwrwi bwsarokno phano mwthangwi man glak. Bórok sak sak simi se thangnai.

¹⁹Eba khe tumungno ang ha-o bok rohorwi jolima bai kwbángma bororokno tei yabrwirokno thẃi kochok rwui buthar khe,

²⁰Noa, Daniel tei Job aro tong phano Subraiyung Kaitor kwthang sakhlai-o, bórok bórokno bwsa chwla eba bwsa bwrwirokno suda se mwthangwi man glak, bórokni kaham bai bórok simi se thangnai.

²¹Aboni bagwino, Subraiyung Kaitor hai hwnwi sa-o, “Ang kaibrwi hamya kukrokno Jerusalemo rohor khe abo bwswk se hamya sitra wngno. Aroni bororok bai mal-matarokno butharnani bagwi rohornai.

²²Hai phano kisa swk bororok yógwi tong rwknai chwla eba bwrwi bwsarok aroni tikhlai narwkjaknai. Tei bórok nini thani-o phai phuru bórokni tongma chámano nuk khe ang Jerusalemo digi-sigi tubumani abo kahamno wng kha hwnwi nwng bwkha ma kwchang anw.”

²³Bórokni tongmung chámungno nugwi ang khlaimani abo haino ereng khlai ya hwnwi saui mannai, hwnwi Subraiyung Kaitor sa-o.