Read Kok Borok ESEKIEL 16 Bible Online

ESEKIEL 16 - Kok Borok bible

ESEKIEL 16

²Borokni sajla, Jerusalem selengmasingcha khlaimarokno saui man rw di,

³tei sa di, Subraiyung Kaitor Jerusalemno hai hwnwi sa-o: Nini yaphang tei achaimani Kanansarokni ha-o se; nini nwpha khe Amorsa tei nwma khe Hitisa.

⁴Nwng aroni phano, achai phuru nini omthai rajak li ya tei nono súchana bagwi twi tuku rwjak li ya, sóm bwtwi baibo phuljak ya tei rí baibo duljak li ya.

⁵Nono khoroksa phano khairogwi abo hai khlainai kwrwi kha, hakhe nwng panthor pháng-phángo se khibiui rwjak kha. Tamni hwn ba nwng achai phuruni simi khibijak.

⁶Ang nini gana tẃi láiwi tháng phuru, nono sakno thẃi bai buljak khe nuk kha pra-pra wngwi tongma nuk kha. Hakhe ang nono nini thẃi-o klaijak khe’-no thagwi tong di hwnwi sa kha.

⁷Ang nono panthorni buphang hai khe tor rw kha. Nwng tor kha lok kha tei nwng sikla wng kha tei nabo naithok kha. Nini khájarokbo tor kha tei nini bwkhnai lok kha, phiya ba nwng sago rí kwrwi sak lánga.

⁸Ang tei uáisa nini gana tẃi tháng phuru, nono naisigwi nuk kha, aphuru sói nini hamjak laina jora sók phai kha; hakhe ang ani bwkrang phehelwi nini sak lángano kholop kha. Tei ang nono kók rw kha phiya nwng bai swmai tang kha hakhe nwng ani wng kha; hwnwi Subraiyung Kaitor sa-o.

⁹Hakhe ang nono twi tuku rwui bebak nini thẃirokno sú-ui rw bai kha tei ang nono thok phulwi rw kha.

¹⁰Tei ang nono rabwi bumul tisajak rí-chum kan rwui rw kha tei mui bukurni yaklap ká rwui rw kha. Ang nono lilonni kahamni rí tei tosorni rí bai kholop kha.

¹¹Ang nono gwina-ganthi kan rwui rw kha, yaktwgo mathiya kan rw kha tei kotogo khe mala bwtang soraui rw kha.

¹²Tei nini bukungo longphu tei khunju-o uakhum kan rwui rw kha tei khorogo naithok motok thubui rw kha.

¹³Abo hai khe nwng rangchak, rukphai kan rwui mwchang rwjak kha tei kaham lilonni rí bumul sarjak tei tosorni rí kano. Nwng auang kaham tei piya bwtwi tei thok chá-o. Nwng belai naithok wngwi Isiri hai wng kha,

¹⁴Nini naithokma dopharokni bisingo belai khe mung tor kha, tamni hwn ba nwng kubui’-no naithok. Nini naithokma wng kha kubui ang se nono aswk naithok khe snam kha; hwnwi Subraiyung Kaitor sa-o.

¹⁵Tamo khe nwng nini naithokma-o se bwkha bera-o tei nini mung tormani bai nwng sak phalnai se wng si-o tei nini gana tẃi thángnairok bai mathe’-no tong si-o.

¹⁶Nini baksa rírokno tei naithok kanmungrokno naui se háyárokno naithok rwnani bagwi thepaui kha tei arobo nwng baligwi kha. Omo hai w se wngnani tongmani ya tei w bo wngma ya.

¹⁷Nwng ang rwmani rangchak tei rukphaini gwinarokno naui, abórok bai khe chwlarokni mangtang snamwi hamya samungo gwdalwi manna tẃi khe khlai kha.

¹⁸Nwng nini rí bumul gwnangrokno naui bórokno kholop kha tei ani thok tei satraino bórokno yaphar kha.

¹⁹Tei ang nono ani chámung kahamno thok tei piya bwtwi satrai motomrok rwmano nwng bórokni thani-o yaphar kha, hwnwi Subraiyung Kaitor sa-o.

²⁰Tei nwng sak phalma bai simi asi yók li ya, ang rwmani nini sajwk sajlaroknobo takjak mwtairokni thani-o chámungni bagwi ratharwi yaphar kha.

²¹Nwng ani bwsarokno takjak mwtairokni thani-o hóro sógwi yaphar kha.

²²Nwng aswk selengmasingcha samung hamya khlaimani tei balikmani bisingo nwng chwrai tong phuru rí kwrwi, sak lánga tongmani kókno tei thẃini kókno muitu man li ya.

²³Subraiyung Kaitor hai hwnwi sa kha, “Norok bwswk se hamya sitrano. Norok bwswk se hamya khlai lai kha.”

²⁴Norok sak sakni bagwi bwswk surina nokrok tang lai kha tei bebak kamiyungrokni lahar buprarogo háyárok snam lai kha.

²⁵Norok lahar mathe’-no buprarogo háyá snam lai kha. Nini naithokmungno selengmasingcha khlai kha, norokni sakno lama tẃi lái thángnairokni thani bedok kha, aboni bagwi nini uaijamani sumsok teibo báng rwk báng rwk wng kha.

²⁶Norok Ijipni bororok baibo sak gwdalwi tong lai kha, belai ganani bororok baibo sak gwdal lai kha, a sak gwdalmani sumsokrokni bagwi ano belai’-no joli rw kha.

²⁷Nai di, aboni bagwi’-no ang ani yak phologwi nini kisa harokno tlangwi thángnai tei norokni o naislernairokni thani mechennai, Philistiani bwrwirok suda norokni tongmungno nugwi ma lachinai.

²⁸Norok sak asi yók yani bagwi Asiriyarok baibo sak gwdal kha. Norok bórok bai thu kha chá kha, hai phano norok sak kochom li ya.

²⁹Teibo norok norokni sak phalmungno bepar thwngnairokni ha bángsak bororok bai’-no tong lai kha, Kolodiani bororok bai tong lai kha hai phano norok khá kochom lai li ya.

³⁰Sói sói’-no nini bwkha belai’-no kebel, hwnwi Subraiyung Kaitor sa-o. Norok lachima kwrwi sak phalnairok khlai tẃi’-no khlai kha.

³¹Norok lama bupra thwgwi’-no mwtaini háyárok tang lai kha tei lahar matheno mwtai nok tang lai kha. Hai phano norok tei kubun sak phalnairok hai ya tamni hwn khe norok rang se na ya.

³²Norok khe tongmung sitra tongnai bwrwi, sakni bwsai bai thu yaui sini ya chwlarok bai se thu-o.

³³Sak phalnai bebak bwrwirokno khe bui rang ma rw-o, phiya norok khe norokno hamjaknairokno se rang rw-o tei bebak phaisingni nini thani-o phaiwi thu lainani bagwi solok naharo.

³⁴Norok tei kubun sak phalnairokno sol ya, tamni hwn khe norokno khoroksa phano sak phalnai snam ya. Norokno rang rwna nangma-o se norok sak sak se rang rw-o.

³⁵O sak phalnaijwk tabuk, Subraiyungni kókno khna di!

³⁶Subraiyung Kaitor hai hwnwi sa-o, “Tamni hwn khe nini selengmasingcha lukhlaijak kha tei nwng nini hamjakmani bororok bai tong laimani bagwi sak lánga nukjak kha tei nini selengmasingcha takjak mwtairokni bagwi tei nini bwsarokno butharwi bórokni thani-o yaphar kha.

³⁷Aboni bagwi’-no nai di, ang bebak nono hamjaknairok tei nwng tongthokjakma bororokno tei nono naislernairokno thumnai. Ang bórokno nini thani-o tubunai, ang nini rírokno khengnai hakhe bórok nini sak lángano nuknai.”

³⁸Tei ang nono káijak phuruni swmaino swbainai bwrwi hai khe tei thẃi khiklainairokno buj thumnai hai khe buj thumnai; ang nono jolima bai tei músúma bai khe nini saka-o thẃi kochok rwnai.

³⁹Ang nono bórokni yago yapharnai tei bórok nini háyárokno tei khulummani nokrokno swbai bainai. Bórok nini rírokno chir bainai tei rangchak-ríchakrokno segwi na bainai tei nono sak lánga khe, bukcha khe klangnai.

⁴⁰Bórok lukurokno joli rwui nono holong bai khitarnani bagwi tubunai tei seng bai norokno helepna bagwi tubunai.

⁴¹Bórok nini nokrokno hór bai sókchanai tei kwbángma bwrwirokni bwskango nono majra rwnai. Ang nini sak gwdalwi sumsok khlaimano mwthaknai tei nwngbo buino rang rw glak.

⁴²Hakhe ani jolima hamnai tei ang kwchang kwchang wngnai. Tei nono jobo joli glak nabo naisler glak.

⁴³Tamni hwn ba nwng nini sikla phuruni kókno muitu manjak li ya tei nini samung bai ano thamchi ka rw kha; abo bai’-no ang nini samungni manthaino nini bokhorok saka-o bera kha, hwnwi Subraiyung Kaitor sa-o. Omo hairokno karwibo nwng teibo uaijaui selengmasingcha tongmung tong ya diba?

⁴⁴Nai di, “Buma hai’-no bwsajwkbo wng kha,” hwnwi nono kók khitarwi sanairok bebakno omo hai khe sa anw.

⁴⁵Nwng nini nwmani sajwkno wng súk kha, bo bwsai bai bwsarokno mwkhang sók kha, nwng hwn khe nibijwksongni kubui hanok’-no wng súk kha, bwsai bai bwsarokno mwkhang sóknai, nini nwma wng kha Hitisa tei nini nwpha khe Amorsa.

⁴⁶Nibi okra khe Samariajwk, bini sajwk bai khe nini salsibai bwkhago tongo tei nini hanok khe bwsajwk bai nini salgrabai bwkhago Sodomo tongo.

⁴⁷Hai phano nwng bórokni lama-o simi him li ya eba bórok hai selengmasingcha simi khlai li ya, tamo khe srapsani bisingo nwng bebago’-no bórokni slái se teibo kwbángma hamya khlai kuk kha.

⁴⁸Ang kwthang Subraiyung Kaitor hai hwnwi sa-o, “Nini hanok Sodom tei bini bwsajwksong se nwng bai nini nwsajwksong khlaimani swk se khlai ya kho.

⁴⁹Nai di, nini hanok Sodomni sumsok khe omo hai: Bo bai bini bwsajwksong kung chuk kha tamni hwn ba bórokni chámung kupulung tongo tei tongthokma bai tong kha, phiya ba bórok bigrarok tei kwrwirokno chuba li ya.

⁵⁰Hakhe Sodom tei bini bwsajwksong belai khe kung chuk kha tei ang naislermani samungno se bórok khlai si-o. Abo bai’-no ang bórokno ani bwskangni norwi ani muchung tẃi’-no khlai kha.”

⁵¹Samaria nwng sumsok khlaimani khaksa phano khlai ya, tamo khe norok bórokni slái phano kwbáng kuk hamya khlai kuk kha, nini samung bai nini hanok khe nini slái kaham kuk khe nukjak kha.

⁵²Tabuk khe nwng lachima ma soi sinai, nini sumsokrok nini hanoksongni slái se sitra kuk, bórok nini slái ham kugo. Aboni bagwi bwkha-o lachi si di tei mung hamyano ruju si di, tamni hwn khe nwng nini bukhukno kaham khe phunuk kha.

⁵³“Ang bórokni khaui tlangjaknairokno tei Sodom tei bwsajwksongno tei Samaria bai bwsajwksongno tei bórokni bisingo ang norokni khaui tlangjaknairoknobo kiphilwi tubu phuru khe,

⁵⁴hakhe nini mwkhang khamna tẃi tei nini bebak samungni bagwi lachima manma bai bórok bwkha methep kha.

⁵⁵Nini bukhuksongrok, Sodom bai bini bwsajwksong tei Samaria bai bini bwsajwksong swkango tongmani haino wng phinai, nwng bai nini sajwksongrokbo swkango tongma haino wng phinai.

⁵⁶Nwng nini bukhuk Sodomno nwng kung chuk phuru nini búkhúk bai bini mungno khursa ti li ya

⁵⁷tei nini samung hamya nukjak yani swkango tabuk Idomni bwrwirok tei bórokni samni bororok nono lachi rw kha. Philistiani bwrwirok suda nono lachi rw kha. Nono kitingwi tongnai tei naislernairokbo nono lachi rwnai.

⁵⁸Nini belai samung hamya khlaimani bagwi tei ang naislerma samungno khlaima bagwi se nwng o majra mano, hwnwi Subraiyung sa-o.

⁵⁹“Subraiyung Kaitor hai hwnwi sa-o: Nwng khlaimani hai’-no angbo nono khlainai,

⁶⁰tamo khe nwng sikla phuru ang nono kók rwmano ang narwknai tei ang nwng bai kusung kusungni bagwi swmai tangnai.

⁶¹Nini bukhuk okrarok bai bukhuk kusurokno kiphilwi man phuru khe nwng nini samung hamya khlaimarokno muitu wngnai tei ma lachinai. Tamo khe ang bórokno nini sajwk wngnani bagwi rwnai, hai phano nwng bai ang swmai tangmani bagwi ya.

⁶²Tei ang nwng bai tei uáisa swmai tang phinai. Hakhe ang se Subraiyung hwnwi nwng saui mannai.

⁶³Nwng samung hamyarok tangmano muitu wngnai tei ma lachinai. Ang bebak samung hamya khlaimani bagwi súchaui mwthang phuru khe lachiui búkhúk suda phiyogwi man glak, hwnwi Subraiyung Kaitor sa-o.”