Read Kok Borok ESEKIEL 17 Bible Online

ESEKIEL 17 - Kok Borok bible

ESEKIEL 17

¹Subraiyung ano hai hwnwi sa kha:

²“Borokni sajla, kerang kothoma tháisa snam di tei Israil bororokno nwng rwngthoma bai khe kók sa di,

³Subraiyung Kaitor hai hwnwi sa-o hwnwi bórokno sa di: Toling kotorma masa bwkrang kolokma tei juda juda bumul gwnang bwkrangno phehelwi birwi Lebanon ha-o phaiwi sidar buphang bosokno swbaiwi na kha.

⁴Bo a buphangni bosokno swbaiwi na kha tei abono bepar thwngnairokni ha-o tlangwi tháng kha; bo abono bepar thwngnairokni kamiyungo tonwi kha.

⁵Hakhe bo a hani kisa bwchlwino tlangwi ha kaham tei twi manthok thani-o sam buphangno kái tẃi khe káiwi rwi kha.

⁶A buphang rotom sa kha tei kwlwisa angur buphang wng kha. A bedekrok bini bwkhak naharwi tor kha tei bini yarwng kuthukma wng kha bini bedekrok tei bwláirok kupulung wng kha.

⁷“Phiya aro kotorma bwkrang kuarma tei buikhumu kwbángma toling tei masa tongo; nai di o angurni yarwng bini bwkhak sukhlai tháng kha tei bini bedekrok bini phaisingo pholokjak kha, twi lujagwi manna tẃi khe bedek pholokjagwi tháng kha.

⁸Bedekrok kwbángma wngnani, bwthái tháinani tei jotoni naithok angur wngnani bagwi ha kaham, twi kwbángma tongmani-o káijak kha.

⁹Nwng bórokno sa di hwnwi, Subraiyung Kaitor sa-o; o angur ha da hamno ba? Bo abono phuichaui bwtháirokno swkraiwi bwláirokno ran rwui pái glak diba?

¹⁰Nai di, abo káijak kha hai phano thangwi tornai diba? Salkani nokbar kotor swprak phai khe abo ranwi tháng glak diba? Abo a káimani tháiblwngo’-no mwranwi thángnai.”

¹¹Hakhe Subraiyung ano hai hwnwibo sa kha,

¹²Tabuk o kebengnai núkhungrokno sa di; omorok tamo hwnmani saui man ya diba? Bórokno sa di, nai di Babilonni habugra Jerusalemo phaiwi habugrano tei bini tẃiphangrokno bo bai baksa Babilono tlangwi tháng phi kha.

¹³Hakhe bo habugrani núkhungni borok khoroksano tlangwi bo bai swmai tangwi kók kha lai kha. Bo a hani tẃidulnairoknobo tlangwi tháng kha.

¹⁴Hano, khorok bom rwui tonnani bagwi tei bachaui man li ya khlai rwui a swmai tangwi kók kha laimani hai khe tongwi simi tongnani bagwi tlang kha.

¹⁵Tamo khe Judani habugra bono kebengwi korairok tei kwbángma sengkrakrok mannani bagwi Ijibo borok rohor kha. Abo bai bo chanai diba? Bo abo bai samung tangwi yóknai diba? Bo kók kha laimano swbaiwi yógwi mannai hai da?

¹⁶Sói-sói, ang Subraiyung kwthang tong sak hai hwnwi sa-o, o habugra bo Babilono ma thwinai tamni hwn ba bono habugra chá rwnaini kók kha laimanobo sak nang li ya tei kók kha laimano swbai kha.

¹⁷Eba Pharao bini phan gwnang sengkrakrok bai tei borok kwbángmano tẃiwi choba-o mungsabo khlai man glak, butharnani bagwi twi theui chokdeual snam kha hai phano chubaui man glak.

¹⁸Bo swmai tangwi kók kha laimano swbai kha. Bo yak bai swmai tangwi kók rw kha hai phano abo hai khe tang kha, bo tei yógwi se man glak.

¹⁹Abo bai’-no Subraiyung Kaitor hai hwnwi sa-o: Ang kwthang tong sak, swmai tangwi kók kha laimano sak nang li ya tei kók rwmano swbaimani bagwi ang bono majra rwnai.

²⁰Ang mui kwrwngrokni chei swngwi bono romnai. Ang bono Babilono tlangwi thángnai tei aro tlangwi sátogwinai tamni hwn ba, bo ani kók narwk li ya.

²¹Bini sengkrak kaham kukrok choba-o butharjak bainai tei kwthang tong rwknairok khe bebak phaisingo piring-poroi wng bainai. Hakhe ang Subraiyung Kaitor hai hwnwi sa-o hwnwi saui mannai.

²²Subraiyung Kaitor hai hwnwi sa-o: “Ang sidar buphang kolok kukno bini bosok kwlwino nanai, tei abono swbainai. Ang abono hathái kuchuk saka-o khe káinai.

²³Ang abono Israilni hathái kuchugo káinai, tei abo bedekrok rwnai, tei bwthái tháinai tei Sidar naithokma wngnai. Bebak toksa-toktẃirok aro tei bini saklomo tong phai bainai.

²⁴Hakhe hapharni bebak buphangrok saui mannai, ang Subraiyung buphang kuchukrokno hache rw kha tei hache buphangrokno khe kuchuk khlai kha. kwkhrangrokno khe mwran rw kha tei mwranjakrokno khe khwrang rw kha. Ang Subraiyung kók sama hai’-no khlai kha. Ang Subraiyung hai hwnwi sa-o, ang samani hai’-no ang khlainai.”