Read Kok Borok ESEKIEL 18 Bible Online

ESEKIEL 18 - Kok Borok bible

ESEKIEL 18

¹Subraiyung ano hai’-no hai sa phai phi kha:

²“Israil hano tẃiwi ‘Buma-buphasong khe ba angur kwkhwi chá kha, yang bwsarokni khe ba bua khwi kha!’ hwnwi phrwngmung kók sa sajakmani abo tamo hwnma klai?

³Ang kwthang tong sak hwnwi, Subraiyung Kaitor sa-o, norok bai Israilo o kók phrwngmung tei sajak glak kha.

⁴Bebak bororokni langma le ani se, buma-buphani tei bwsani langma le ani se. Sumsok khlainai borok bo ma thwinai.

⁵“Khoroksa borok kaham bo sói khe samung kaham khlai khe,

⁶bo Israilrokni mwtairokno khulum ya khe tei mwtairokni thani-o yapharjak manwirokno chá ya hwn khe bini noksa-nok arini bwrwino dera rw ya khe tei rí súmani jora-o khoroksa bwrwi bai phano thu ya khe,

⁷bo buino kusup ya hwn ba buini manthaino kiphilwi rw-o khobo khok ya. Kwrwino chá rw-o tei kwrwino rí rw-o hwn khe,

⁸bo rangni bwsa manmani bai lakai rw ya tei bo samung hamya-o yak rw ya tei sói khe bebak borokni bagwi buj khlai-o.

⁹Ani raidano tẃi tong khe tei ani bujrokno sói khe tẃi khe bono sói buj tẃi-o. Bo se borok kaham tei bo kubui’-no kwthang tongnai hwnwi Subraiyung Kaitor sa-o.

¹⁰“Rom di, tumungno khoroksa swk borokni bwsla khoroksa sikhok tei borok butharnai wng khe tei kubun samung hamyarok tang khe,

¹¹tamo khe bupha omo hairok mungsa samungrokno khlaima kwrwi. O bwsa hathái-o mwtairokni thani barokmano chá-o tei buini bihikno dera rw-o,

¹²kwrwirokno tei chúk yarokno bandi-o tei khogo tei buini manthaino rw ya, takjak mwtairokno khulumui selengmasingcha samung khlai-o,

¹³swkang’-no rang na-o tei rangni bwsa kwbáng mannani bagwi lakai rw-o, a borok thangwi da tongno? Bo kwthang tong glak. Bo bebak selengmasingcha samungrokno tang kha; hakhe bo ma thwinai, bini cha ya khlaimani thẃi bini bokhorok saka’-ono klainai.

¹⁴“Tumungno, o borokni bwsla khoroksa, bo buphani bebak sumsok khlaimarokno nuk kha, tamo khe abo hai khlai ya wng khe,

¹⁵bo hatháini takjak mwtairokni thani yapharjakno chá ya tei Israilrokni takjak mwtairoknobo mokol kai li ya eba buini bihiknobo dera rw ya;

¹⁶bo khoroksano phano sátok li ya, lakairokbo kwcha rw li ya, buini manthaino kiphilwi rw-o, phan khebo segwi na ya tamo khe ma chá yarokno chá rw-o, kanna rí kwrwirokno rí rw-o;

¹⁷bo samung cha ya-o yak rw li ya, eba kwbáng mannani bagwi lakai rw ya eba khok ya. Bo ani kerongrokno tẃiwi tei ani dagimarokno khna-o; bo buphani sumsokni bagwi thwi glak, bo kubui’-no kwthang tongnai.

¹⁸Tamo khe bini bupha sak sakni sumsokni bagwi ma thwinai, tamni hwn khe bo buino sikiri-sokoro khe rang na kha, bini takhukni’-no khok kha, bini bororokni bisingo cha ya hwnmani samungno khlai kha; bini sumsokni bagwino bo ma thwinai.

¹⁹“Phiya ba norok hai hwnwi sẃngo, ‘Tamni bagwi buphani sumsok bai bwsla ba manjak ya wngna klai?’ Bwsla sói samung kaham tei chamani samungno khlai kha. Bo ani raidarokno hus khe tẃi kha, aboni bagwi bo kubui’-no kwthang tongnai.

²⁰Sumsok khlainai borok bo ma thwinai. Buma buphani sumsok bai bwsla manjak glak; eba khe bwslani sumsok bai buma bupha manjak glak. Borok kaham bini bujsóini bagwi sokat kaham mannai tei borok hamya khe bini samung hamyani bagwi bini majrano mannai.

²¹“Tumungno khoroksa swk borok bini sumsok yakarwi bebak bini samung hamya tangmarokno yakarwi bebak ani raidarokno tẃi khe tei chamani samungno kaham khe tang khe, bo thwi glak, bo kubui’-no thwi glak.

²²Tamni hwn ba bórokni sumsokrokno tei muitu khlaijak glak kha, samung kaham khlaima bai’-no bo thangnai.

²³Ang borok hamyarok thwimano chajago hai da? Hwnwi Subraiyung Kaitor sa-o. I’nhi, abo hai ya, tamni hwn ba bo bwkha kiphilwi mwthangjak thung hwnwi se nai-o.

²⁴Tumungno borok kaham samung kaham tangma yakarwi borok hamyarok samung khlaimani hai khlai khe bo kwthang tongwi mannai de? I’nhi, bo aswk samung kaham khlaibumarok kaisa phano muitu khlaijak glak, bini samung hamya tei sumsok bai ma thwinai.

²⁵“Phiya ba norok hai hwnwi sa-o, ‘Subraiyung khlaimani abo cha ya.’ O Israilrok ani kók khna di, Ani samung cha ya diba? Norokni samungrok se cha yana bla?

²⁶Khoroksa borok samung kaham tangma yakarwi samung hamya khlai khe, bo bini samung hamya khlaimani bai ma thwinai.

²⁷Borok hamya khoroksa samung hamya khlaima yakarwi samung sói kaham khlai khe bo bini langmano mwthangwi mannai.

²⁸Tamni hwn ba bo khá siui bebak hamya khlaimani kiphil khe; bo kubui’-no thangnai, thwi glak.

²⁹Phiya ba Israilrok hai hwnwi sa lai-o, ‘Subraiyung khlaimani lama le cha ya.’ O Israil bosongrok ani khlaima lama da cha ya? Nini khlaima lama se cha ya ahai ya diba?

³⁰“Abo bai’-no o Israilrok, ang norokno borok thwgwi sakni samung tangma hai’-no buj thumnai hwnwi Subraiyung Kaitor sa-o. Bebak samung hamya khlaimani kiphil di, wng ya khe samung hamya bai’-no ma thwinai.

³¹Norok samung hamya khlaima bebak’-no yakar bai di tei norok sakni bagwi bwkha kwtal bai uansukma kwtal khlai di. O Israilrok, norok tamni bagwi thwinai?

³²Khoroksa phano thwi lang thung hwnwi ang nai ya, hwnwi Subraiyung sa-o, hakhe bwkha kiphilwi thang si di.”