Read Kok Borok ESEKIEL 19 Bible Online

ESEKIEL 19 - Kok Borok bible

ESEKIEL 19

¹Kaitor ano Israilni tẃiphangrokni kapsimang kap di hwnwi sa kha,

²tei sa di, nwma bubo hai singho tongmani? Singho bwrwi tongmani: Bo tei chwla singhorokni bisingo tongwi bini bwsarokno tor rw kha.

³Bo bini bwsa masano tor rw kha tei bo sikla wng kha tei mui romna srwng kha tei bororokno romwi chá kha.

⁴Dopharok bini kókno khna kha tei hakhoro khiklai bono rom kha, tei biching bai khaui ha Ijibo sopreui tlang kha.

⁵Bini bwkhani khatungmani abo nang li ya wng khe’-no, bo bini tei masa bwsano naui sikla sók rwui tisa kha.

⁶Bo tei kubun singhorok bai tong te tong te sikla singho wng kha. Abo mui romna srwng kha, bo bororokno romwi chá kha.

⁷Bo bórokni nok kwrakrokno swbai kha tei bórokni kamiyungrokno bukcha khlai kha. Ha tei aroni bebak bororok bini pungmani khorang khnaui kirijak bai kha.

⁸Hakhe bono kitingjak bebak hasteni dopharok kebengwi bacha lai kha, tei bini bagwi bórokni chei swng lai kha; bo bórokni uarai-o khe romjak kha.

⁹Bórok biching bai khe khaui bono cheikhogo khe chobwi ton lai kha tei Babilonni habugrani thani-o tubu kha, Israilni hatháirogo bini pungmani khorang tei khna ya wngna bagwi bórok bono sorni cheikhogo chobwi tubu kha.

¹⁰Nini nwma twisa rukungo káijak angur buphang hai. Twi kwbángma tongmani bai bedekrok kwbángma tei bwtháirok bai kupulung.

¹¹Bini bedekrok kwrak, bugrarokni raidangni bagwi chúgo. Angur torwi nokha-o khunani nai kha; a angur tei kubun bedek kubungmarokni bisingo kolokma wng kha. Abo kolok kuk tei bedekrok kwbángma wngmani bagwi mokolo klai-o.

¹²Hai phano abo joliui phuichajak kha, tei ha-o khiklai rwjak kha. Salkani nokbar bai bini bwthái ranwi tháng kha. bini bedek kwrakrok báiwi thwi bai kha, tei hór bono kham rwui pái kha.

¹³Tabuk abo hasing panthoro twi kwrwi, ha kwrano káijak kha.

¹⁴Aboni bedek deksa-o hór nangwi bwtháirok kham bai kha. Tei aro bedek kwrakrok kwrwi kha, bugrani raidangni snamna bagwibo kwrwi kha. “Omono kapsimangni kapma tei kapsimangni kapmung wng kha.”