Read Kok Borok ESEKIEL 2 Bible Online

ESEKIEL 2 - Kok Borok bible

ESEKIEL 2

¹Bo ano hai hwnwi sa kha, “Borokni sajla, nini yakung bai bacha di, ang nono kók sa anw.”

²Bo ano kók sa khe, Kaitorni Phola ani bisingo hap phai kha, ani yakung bai bacha rw kha tei ang kók samani khna phi kha.

³Bo ano hai hwnwi sa kha: Borokni sajla, ang nono Israil dophani thani, ano kebengnai dophani thani rohoro, bórok tei bórokni nuchusong ano kebeng kha, tabuk jora kebeng laiwi’-no tong kho.

⁴Bororok belai khá si ya tei anobo bórom khlai ya gwja; ang bórokni thani se nono rohoro tei nwng bórokno hai hwnwi ma sanai, “Subraiyung Kaitor hai hwnwi sa-o,

⁵bórok nini kókno khna thung khna ya thung kebengnairok aswk khe’-no bórokni bisingo khoroksa diyari tongo hwnwi saui man bainai.”

⁶Tamni hwn ba, nwng borokni sajla; bórokno ta kiri di, bórok samanobo ta kiri di. Atakereng tei busurok nini thani tong phano, phiya nwng yóng chwknairokni bisingo ma tong phano, bórokni kókrokno ta kiri di, bórok naisikmano nugwi bwkha ta bái di, tamni hwn ba bórok wng kha kebengnairok se.

⁷Nwng bórokni thani ani kók se ma sanai, bórok khna thung khna ya thung, tamni hwn ba bórok wng kha kebengnairok.

⁸“Tamni hwn ba, nwng borokni sajla, ang nono samani kókno se khna di, bórok hai nwng kebengnai ta wng di; nini búkhúk khuaui ang rwmano chá di.”

⁹Ang nuk kha, kaisa swijak bijap doljak yago tẃijak ano yak phologwi rohor kha.

¹⁰Bo abono ani bwskango phehel kha abo babainwi-o swijak tei aro kapmani, bwkha nangmani, bwkha ui-ui wngmani swijak tongo.