Read Kok Borok ESEKIEL 20 Bible Online

ESEKIEL 20 - Kok Borok bible

ESEKIEL 20

¹Chwng buini ha-o khajagwi tongmani nokha bisisnini talbani salchini salo Israilni baksa tẃiphangrok Subraiyungni thani-o kók sẃngnani bagwi ani thani-o phai laiwi ani bwskango achuk lai phai kha.

²Hakhe Subraiyung ano hai hwnwi sa kha,

³“Borokni sajla, Israilni tẃiphangrokno sa di, Subraiyung Kaitor hai hwnwi sa-o, ‘Norok tamni ani thani phai lai? Kók biti sẃngnani da phai lai?’ Ang kwthang tong sak, Subraiyung Kaitor hai hwnwi sa-o, ang norok bai kók sẃngjak glak.”

⁴Nwng bórokno buj thumnai da? Borokni sajla nwng bórokno buj thumnai da? Hakhe nwng bórokni nuchusong hamya samung khlaimarokno muitu khlai rw bai di,

⁵tei bórokno sa di, Subraiyung Kaitor hai hwnwi sa-o, “Ang Israilno chong chongmani salo, Ang Israilni bwsarokni thani-o yak tisaui swmai tang kha tei ha Ijibo bórokni thani-o nukjagwi hai hwnwi sa kha: ang norokni Subraiyung Kaitor.”

⁶A salo ang bórokno ha Ijipni phiyógwi tubu-ui bórokni bagwi Ang chongmani dut tei piya bwtwi yorjak tei jotoni slái kaham kuk ha-o tubunai.

⁷Hakhe ang bórokno hai hwnwi sa kha, “Norok bebakno bini mokol bwskango selengmasingcha takjak mwtairok tongmano khibiui rw bai di tei sak sakno Ijipni takjak mwtai bai ta dera rw di. Ang’-no norokni Subraiyung Kaitor.” Hamyarokno khibiui rohor bai di tei norokni sakni Ijipni mwtairok bai ta dera rwjak bai di hwnwi sa kha, tamni hwn ba ang se norokni Subraiyung Kaitor.

⁸Hai phano bórokno kebeng lai kha tei ani kók khna li ya. Bórok bebak’-no bórokni mokol bwskangni selengmasingcharokno khibi lai li ya tei Ijipni mwtairoknobo khibi li ya gwja. Hakhe ang ha Ijibo’-no ani jolima bórokni saka-o khiklainai tei ani thamchino nang rwnai.

⁹Tamo khe ani mung se bórok tongmani ha-o aroni bororokni thani ani mung hamya wng anw hwnwi khlai li ya, tamni hwn ba bórok tong laimani bororokni bwskango se ang bórokno Ijipni phiyógwi tubu-o.

¹⁰Hakhe ang bórokno ha Ijipni phiyógwi tubu-ui hasing panthoro tubu kha.

¹¹Ang bórokno ani dagimarokno rw kha tei raidarokno phrwng kha tei abo hai khe kók naui tong khe bórok thangnai.

¹²Teibo ang bai bórokni bisingo kaisa mari hai khe Sabatnobo rw kha tei ang Subraiyung se abórokno kwthar khlai-o hwnwi saui man bai thung.

¹³Phiya ba Israilrok hasing panthoro ano kebeng kha. Bórok ani kók sama tẃi tong li ya; ani bujno khibi kha, abo hai khe tongnai borok bo kwthang tongnai tei ani sabatno dera rw kha. Hakhe ang bórokni thani-o ani jolima rohorwi bebak sokomorwi pái sinai hwnwi sa kha.

¹⁴Tamo khe ani mung se dopharokni thani-o hamya wng anw hwnwi khlai li ya. Tamni hwn ba ang bórokno Ijiprokni mokol bwskango se phiyógwi tubuma ba.

¹⁵Teibo ang hasing panthoro yak tisaui, bórokno yapharmani dut tei piya bwtwi yorjak, bebak hani slái kaham kugo tubu glak hwnwi swmai tang kha.

¹⁶Tamni hwn ba bórok ani kerongrokno khibi kha tei ani dagimarokno khna lai li ya tei ani sabatnobo sak nang li ya tei bórokni bwkha mwtairokni thani se kochomjak.

¹⁷Hai phano ang bórokno khairok kha tei ang bórokno sokomor li ya eba hasing panthoro sokomorwi pái li ya.

¹⁸Ang bórokni bwsarokno hasing panthoro khorai kha; norokni chuchusongni raida tẃi ta him lai si di, bórokni tongmung tẃibo ta tong lai si di tei bórokni mwtairok bai norok ta dera rwjak bai di.

¹⁹Ang Subraiyung se norokni Kaitor, ani raidarokno tei ani bujrokno tẃi di tei abórokno khlai di.

²⁰Sabat salno kwthar khe tẃi di, hakhe omo nwng bai ang swmai tang laimani mari wngnai tei ang se nini Subraiyung Kaitor hwnwi nwng saui mannai.

²¹Tamo khe o bosongrokbo hai’-no kebeng lai kha; bórok ani dagimarokno tẃiwi tong li ya, ani kerongrokno khir khir khe khna li ya, hai phano abo hai tong khe bórok thangnai tei ani sabatno swbai kha. Hakhe ang bórokno sokomornai tei hasing panthoro ani thamchino lukhlainai hwnwi sa kha.

²²Tamo khe ang bórokno Ijipni phiyógwi tubumano nuk bainai dopharokni bwskango ani mung hamya wng anw hwnwi se ani yakno tisa li ya.

²³Tei yak tisaui hasing panthoro swmai tang kha, bebak dopharokni bisingo tei bebak haktor gwnangwi piring-poroi khlai bainai.

²⁴Tamni hwn ba bórok ani kerongrokno khna bai li ya, ani dagimarokno tẃiwi tong li ya tei Sabatno swbaiwi bórokni nuchusongni mwtairokno hamjak lai kha.

²⁵Hakhe ang bórokno raida hamyano yaphar kha tei mwthangwi man ya dagimarokno rw kha.

²⁶Ang bórokni yapharma bising tẃi’-no bórokno dera rw kha; bórokni chwla bwsa okrano ratharwi yaphar rw kha. Omo bórokno majra rwnani bagwi tei ang se Subraiyung hwnwi bórokno saui man rwnani bagwi se khlai-o.

²⁷Abo bai’-no, borokni sajla, Israilrokno hai hwnwi sa di, Subraiyung Kaitor hai hwnwi sa-o, “Abo hai khe’-no bórokni nuchusong ano khibiui ani mungwi hamya sa lai kha.”

²⁸Ang bórokno rwnani hwnwi swmai tangmani ha-o bórokno tubu phuru, bórok hathái kuchukrok eba bwlái kupulung buphang kwkhrangrok nuk khe bórok aro ratharwi yapharmungrok yaphar lai kha, bórokni yapharma bai ano joli rw kha tei satrai sók lai kha tei nungmungrokno yaphar lai kha.

²⁹Hakhe ang bórokno hai hwnwi sẃng kha, “Norok thángmani ha kuchukrok[7] tamo?” Hakhe aphuruni simi ha kuchuk hwn jago.

³⁰Hakhe tabuk Israilrokno sa di, Subraiyung Kaitor hai hwnwi sa-o: “Nuchusong dera tẃi khe nwng buda selengmasingchano rwktharwi sakno dera rwnai?”

³¹Tamni hwn khe norok nwsarokno ratharwi hóro yapharmung yapharwi yapharo. Norok tabukbo norokni takjak mwtairok bai gwdalwi sakno dera rwui tong kho. Hakhe ang norok bai kók sẃngjagwi tongnai hai da? Ang kwthang tong sak norok bai sẃngjak ya hwnwi Subraiyung Kaitor sa-o.

³²Nini bwkha-o uansukmani hai uáisabo wng glak, norok buini borok hai wngnai tei kubun hani dopharok buphang tei holongrokno monnairok haino monnai wngnai.

³³Subraiyung Kaitor hai hwnwi sa-o, “Ang kwthang tong sak, ang phankrak yak bai tei ani bebak phan bai jolima bai khe norokno tẃidulnai.

³⁴Ang norokno piring-poroi khe tongwimani hani joliui ani phan kwrakma phan bai khe thumwi tubunai.

³⁵Ang norokno bororokni hasing panthoro tubunai tei aro ang norokno bwskang dak-dak khe jera nanai.

³⁶Ang norokni chuchusongno Ijipni hasing panthoro jera namani hai kheno noroknobo jera nanai, hwnwi Subraiyung Kaitor sa-o.

³⁷Ang norokno mera lekha tẃi khe lekhanai tei ang bai swmai tangmano khna rwnai.

³⁸Ano kebengnairokno tei sumsok gwnangrokno ang norokni bisingni nornai tei tabuk bórok tongmani hani bórokno tlangnai tamo khe ang bórokno Israil ha-o hap rw glak. Hakhe norok ang se Subraiyung hwnwi saui mannai.

³⁹“Subraiyung Kaitor hai hwnwi sa-o: Israilrok, norok sak sakni mwtairokno khulum di. Tamni hwn ba tabuk ang hus khe rw-o tei ulo ani kókno ma khnanai tei norok mwtairokni thani-o yapharmung bai ani mung kwtharno ma dera rw glak.

⁴⁰“Tamni hwn khe, a ha-o ani hachuk kwthar, Israilni hachuk saka-o, Subraiyung Kaitor hai hwnwi sa-o: Bebak Israil bororok ano ma khulumnai; aro ang norokno yachaknai tei norokni yapharmungrokno, norokni kaham kuk yapharma tháiskang bai kwthar yapharmungrokno yachaknai.

⁴¹Norok piring-poroi khe tongwimani hani ang norokno tubu-ui kwrẃngsa khlai phuru khe norok sógwi yapharmani hilirokno yachaknai tei dopharokni bwskango norok ano kwthar khe nuknai. Ang norokni chuchusongni thani rwnani hwnwi swmai tangmani Israil ha-o norokno tubu khe norok Ang se Subraiyung hwnwi saui mannai.

⁴²Ang nini chuchusongno rwna hwnwi ani yak tisaui swmai tangmani a Israil ha-o norokno tubu phuru khe, hakhe norok ang se Subraiyung hwnwi saui mannai,

⁴³norok aro bebak hamya khlaiwi sakno dera rwmarokno muitu wngnai tei hakhe norokni a samung hamya khlaima bai sak sak’-no selengnai.

⁴⁴Nini samung hamya tangmano eba nwng cha ya samung tangna naiwi ang nwng bai samung tang ya tamo khe ani mungni bagwi se tangmano nuk khe hakhe ang se Subraiyung hwnwi saui mannai.”

⁴⁵Subraiyung ano hai hwnwi sa kha:

⁴⁶“Borokni sajla, salgrabai bwkhago nahar di. Salgrabaino kebengwi kók diyari sa di tei salgrabaini bolongni bagwi kók diyari sa di.

⁴⁷Salgrabaini bolongno Subraiyungni kókno khna di. Subraiyung Kaitor hai hwnwi sa-o, nai di, ang nini bisingo hór bacha rwnai, abo nini bebak buphang kwthang tei kwthwino kham rwui páinai, a hórjlaino khoroksa phano butharwi man glak, abo bai salgrabaini simi salsibaini bebak bororokno khampraui páinai.

⁴⁸Hakhe bebak bororok nuknai ang Subraiyung se hór phnang kha, abono butharwi man glak.”

⁴⁹Hakhe ang hai hwnwi sa kha, “O Subraiyung Kaitor, ‘Bórok ano haino kothoma se sa-o hwnwi hwn lai-o.’ ”