Read Kok Borok ESEKIEL 21 Bible Online

ESEKIEL 21 - Kok Borok bible

ESEKIEL 21

¹Subraiyung ano hai hwnwi sa kha,

²borokni sajla, Jerusalem bwkhak nahar di tei ha kwtharno khoraiwi kók sa di, ha Israilno khoraiwi kók diyari sa di.

³Israil hano sa di hwnwi, Subraiyung Kaitor hai hwnwi sa-o, “Nai di, ang nono kebengnai tei ani seng naui borok kaham bai borok hamyarokno seng bai tanwi páinai.

⁴Tamni hwn ba ang nini aroni borok kaham bai borok hamyano nornai. Abo bai’-no bebak borokni bagwi ani seng salgrabaini simi salsibai jora nongkhorwi thángnai.

⁵Hakhe ang Subraiyung se ani sengkhokni seng tikhlai-o hwnwi saui mannai tei abono sengkhogo da phi glak.”

⁶Aboni bagwi borokni sajla bwkha báiwi kengai di tei abo bai’-no nwng lukuni bwskango mok di. Lukuni bwskango kengai di.

⁷Bórok nono “Tamni ma kengai hwnwi sẃng khe?” Norok hai hwnwi sa di, “Tamni hwn khe ang khnamani hai’-no wngna nai tong kha. A jora sók phai khe bebak bororokni bwkha kiriui gelenai tei bebakni yak’-no bel bainai. Bebak bororokno kirima chanai; bebakni yáskúno belwi twi hai wngnai. Bórok bokhorok kitingnai tei bórokni yáskú ma kwlwi bainai. Nai di, abo phai tongo tei abo wng sinai’-no,” hwnwi Subraiyung Kaitor sa-o.

⁸Subraiyung ano tei uáisa hai hwnwi sa phi kha,

⁹“Borokni sajla, kók diyari sa di, Subraiyung hai hwnwi sa-o, “ ‘Seng kongsa huljak kha tei chẃngsa rwjak kha!

¹⁰Kirimasingcha khe butharnani bagwi huljak kha, hór hai jilik rwnani bagwi chẃngsa rwjak kha! Seng bai khe kirimasingcha khe sátokjaknano nwng bwkha chajak ya.’ Tamo khe ani sajla Juda sor bai simi bujak phuru phano bwkha kiphil ya.

¹¹Hakhe seng samungo thepana bagwi chẃngsa rwjakna nangnai’-no; o sengno huljakma khe butharnaini yago yapharna bagwi se.

¹²O borokni sajla nwng chirigwi muisubuk chaui kap di; tamni hwn khe omo ani bororokni saka-o tei bebak Israilni tẃiphangrokni thani nang sinai. Bórok ani bororok bai baksa seng bai butharjak bainai. Aboni bagwi bwkha báiwi khaklap bu di.

¹³Chánaima sók phainai. Babilonni sengkrakrok bai naislerjaknai Judia-o tong glak” hwnwi Subraiyung Kaitor sa-o.

¹⁴“Aboni bagwino o borokni sajla nwng kók diyari sa di, yak bai yakno bu di, a sengno uáinwi eba uáitham swprak di. O seng wng kha butharnani bagwi borok kwbángma’-no butharna bagwi abo bórokno kitingjak.

¹⁵Hakhe ang bórokni bwkha gele rwnani bagwi tei thutai rwnani bagwi bórokni dugar mathe’-no sengni buchukno surjak. O sengno jilik jilik wngna bagwi huljak. Omo tannani bagwi tiyar khe yago najak.

¹⁶Sengrok tiyar wngjak! yagra bwkhak tan di! Yaksi bwkhak tan di, nini seng tháng tẃi’-no tan di.

¹⁷Angbo ani yak bai baksa khe swpraknai tei ani jolima hamnai; ‘Ang Subraiyung se o kókno sa-o.’ ”

¹⁸Subraiyung ano tei uáisa hai hwnwi sa phi kha:

¹⁹Borokni sajla, Babilonni habugra bini seng tẃiwi phainani bagwi lama twngnwino mari khlai di; a lama twngnwi’-no kwrẃngsani chengnai. Lampra-o khe kamiyungo thángma lamano sini rwnani bagwi thongla mari khe kái di.

²⁰Kaisa khe Ammonsarokni kamiyung Rabba-o sengrok thángna lamani mari kaisa khlai di; tei kaisa khe Juda hani hamchajak kamiyung Jerusalemo thángnani mari.

²¹Tamni hwn khe, Babilonni habugra lama buprani mari-o bachaui tongo. Bo diyari ka rwmani samungo thepaui tongo. Bo chakhlarok bai khe pat karwi nai-o tei bini takjak mwtairokno sẃngwi nai-o, bo ratharwi yapharma bwkhano cherwi biyango thángnai amjogwi nai-o.

²²Bini yagra yago khe kók mwtai, Jerusalemo tháng di hwnwi sanai. Bo aro chokdeual tei dugayung swbaijaknai manwino tubunai, butharna bagwi daginai, choba khlainani bagwi chiriknai, haplok chuksrosro tei nok kuchuk snamnai.

²³Tei abo bórokni thani tatal kók diyari wngnai, a swmai tangnairokni kókrok tatal wngma klainai; tamo khe bórokno tlangnani bagwi bórokni samung cha yarok muitu khlaijaknai.

²⁴Aboni bagwi Subraiyung Kaitor hai hwnwi sa-o; “Tamni hwn khe nini sumsok se muitu khlai rw-o, abo bai nini cha yabo nukjak kha; nini bebak samungo nini sumsokrok nukjak kha, nwng muitu khlaijaknai wng kha, nwng yago najaknai wng kha.

²⁵Tabuk, nwng Israilni kwthar ya tẃiphang, nini bagwi páithakni sal tei sátokjaknani jora sók phai kha.”

²⁶Subraiyung Kaitor o kókno hai hwnwi sa-o, “Norokni khorok rí sórma tei motok thupmarokno sokok di; norok chongma hai kaisa phano tong glak; koinenerok kuchugo tisajaknai tei kung kuchukrokno tikhlaijaknai.”

²⁷Swbaijaknai! Swbaijaknai! Ang abono swbaijak khlainai! Sói nokphang phai ya sak abo hai wngnai, ang abono bono rwnai.

²⁸Borokni sajla, nwng hai hwnwi kók diyari sa di, “Subraiyung Kaitor Ammonsarokni bagwi tei bórokni mwkhang khammano tẃiwi bórokno sa di. Seng kongsa, a seng sengkhokni tikhlaijak. Abo butharna bagwi tei sokomornani bagwi tiyar tonjak; jilik jilik khe chẃngsa rwjak;

²⁹bórok norokni bagwi nukmung nukmani tatal se tei norokno bandina bagwi tatal khe bwskangni kók sa-o. Norok borok cha ya sumsok gwnangrok, norokni gwdna-o seng berajaknai, bórokni buj thumjakna sal sók phai kha, páithakni sátokmungni jora sók phai tong kha.

³⁰Sengno bokhogo ton phi di. Norokno takma ha-o tei norokni achaimani ha-ono Ang norokno buj thumnai.

³¹Ani jolima norokni saka-o klai rwnai. Ani jolimani hórjlai bai norokno khampra rwnai. Tei ang norokno khairokma kwrwi sokomorna kwrwng bororokni thani yapharwi rwnai.

³²Norok hór chẃng rwna bagwi bol hai wngnai, norok a ha-ono thwinai, norok tei muitu khlaijak glak, tamni hwn khe, omo ‘Ang Subraiyung se sa-o.’ ”