Read Kok Borok ESEKIEL 22 Bible Online

ESEKIEL 22 - Kok Borok bible

ESEKIEL 22

¹Subraiyung ano hai hwnwi sa kha,

²borokni sajla, nwng bono buj thumnai da? Nwng borok butharnairokni kamiyungno buj thumnai da? Hakhe bini bebak selengmasingcha samungni kókrokno sa di.

³Nwng hai hwnwi ma sanai; Subraiyung Kaitor hai hwnwi sa-o; nwng wng kha omo hai kamiyung, aro tongna hwnwi phainairokno butharwi sakni hamyano tubu-o. Mwtai tagwi nwng sak sakno dera rw-o.

⁴Norok borok butharmani bai cha ya wng kha tei norok takmani mwtairok bai’-no norok dera rwjak bai kha; abo bai nini jorano sampha rwui tubu kha. Aboni bagwino ang nono dopharok bai hamya sa rwnai tei bebak ha nini thani-o mwnwimung khlainai.

⁵Gana-o tong bainai tei hakchalo tong bainai jotonono mwnwi bainai. Nini mung hamyani bagwi nono mwnwi lainai, chili-lupa kupulung kamiyung.

⁶Nai di, bebak Israilni tẃiphangrok sak sakni phanno borok butharna-o se thepa lai si-o.

⁷Norokni o jora-o buma-buphano bórom khlai li ya gwja, norokni bisingo buini hani bororok khe kusupjago tei bupha kwrwi bai randijwkrokno bandi lai-o.

⁸Norok ani kwthar manwirokno sak nang lai ya tei ani sabatnobo swbai lai-o.

⁹Norokni bisingo baksa borok butharnani bagwi tatal sa-o; baksa borok hatháini háyárogo mwtairokni thani yapharjak manwirokno chá lai-o tei uaija lai-o.

¹⁰Baksa borok buma matoi bai thu lai-o, baksa ba rí súmani jora-o soi ya twtwi bórok bai thu lai-o.

¹¹Baksa buini bwrwi bai thu lai-o tei baksa khe bahamjwkno sak tangwi dera rw-o, baksa bini bukhuk kotoino bo bai thuna bagwi romphre-o.

¹²Norokni bisingo baksa rang cháui borok butharo, baksa khe sakni borok Israilni thani-o rang kwbáng mannani bagwi solok rwui gwnang kha-o tei norok ano pogwi tháng bai kha, hwnwi Subraiyung Kaitor sa-o.

¹³Nai di, abo bai’-no norok cha ya khe ajimani tei norokni bisingo borok butharmani bagwi ani yak bai norokno swpraknai.

¹⁴Ang norokno majra rwmani jora-o norok bwkha torwi da tongwi manno tei norokni yak kwrak khe tisaui de manno? Ang Subraiyung sa-o tei ang’-no abo khlainai.

¹⁵Ang norokno bebak dopharokni bisingo piring-poroi khlainai tei ha gwnangwi’-no koproi rwnai. Norokni samung hamyarokno mwthak súk sinai.

¹⁶Dopharokni mokol bwskango norok sak sakno dera rwnai; hakhe se norok bebak’-no ang se Subraiyung hwnwi saui mannai.

¹⁷Subraiyung ano hai hwnwi sa kha,

¹⁸borokni sajla Israilrok ani thani-o simbuk hai tei mungsa chúk li ya, bórok bebakno hór bai rukphaino sók khe aboni bikhi pitol, tin, sor tei sisa hai wng bai kha mungsa-o chúk li ya.

¹⁹Aboni bagwi Subraiyung Kaitor hai hwnwi sa-o; norok joto mungsa-o chúk li ya simbuk hai wng bai kha, ang norokno Jerusalemo kwrẃngsa khe thum bainai.

²⁰Bororok rukphai, pitol, sor tei sisano hóro sógwi gele rwnani bagwi thapa chẃngjago rw-o. Abo hai khe’-no thamchi bai khe bórokno Jerusalemo thumwi gele rwnai.

²¹Ang norokno kwrẃngsa khe thumnai tei ani kirimasingcha jolima hór bai khe kobon rwnai tei aro’-no gele rwui pái sinai.

²²Rukphai hórkango gelema hai khe noroknobo aboni kwcharo gele rwnai; hakhe bórok ang Subraiyung se bórokni saka-o jolima lukhlai rw kha hwnwi saui mannai.

²³Subraiyung ano tei uáisa hai hwnwi sa kha,

²⁴borokni sajla hani bororokno sa di, bórokni ha kwthar ya eba jolimani salo uatwi kwrwi wngnai.

²⁵Bórok singho hai khe muirok uátharwi butharnani naima hai khe hamya khlaina bagwi chap lai-o. Bórok borokrokno monok kha; bórok rang-rírok, manwi kahamrok na kha; tei kwbángmano randijwk snam kha.

²⁶Bini ochairok ani kerongrok swbai kha tei kwthar manwiroknobo bórom khlai li ya. Bórok kwthar bai kwtharyano khak li ya, eba bórok derajak bai derajak yano phér laijak khe phrwng ya tei bórok Sabat salnobo sak nang lai li ya. Hakhe bórokni thani ani mung sitra wng kha.

²⁷Bórokni tẃiphangrok mui romwi chánai geguma hai máng se. Bórok gwnang khanani bagwi bororokno hai’-no butharo.

²⁸Bororok chwndwi kuphur bai nok lepe rwui nok kholopmani hai khe diyariroknibo bórokni sumsokrokno kholop lai-o. Bórok tatal nukmung nugwi tatalno Subraiyung Kaitor hai hwnwi sa-o hwnwi sa lai-o, ayang le Subraiyung bórokno samani se kwrwi.

²⁹Hani bororok kusup lai-o, bandi lai-o tei khok lai-o tei bórok bigrarokno, kwrwirokno cha ya khlai-o; phatarsarokno cha ya khe kusubo.

³⁰Hakhe ang mwthangwi manna tẃi khe bórokni bisingo chokdeaual tisanani bagwi tei hani bororokni wngwi ani kwcharo bachana bagwi borok khoroksa naitukmani. Hai phano ang khoroksano phano man li ya.

³¹Abo bai’-no ang bórokni saka-o ani jolima lukhlai rw kha; ang jolimani bai hór bai bórokno sokomor bai kha; bórokni samung bai’-no bórok manjak bai kha, hwnwi Subraiyung Kaitor sa-o.