Read Kok Borok ESEKIEL 23 Bible Online

ESEKIEL 23 - Kok Borok bible

ESEKIEL 23

²Borokni sajla, aro bwrwima khoroksani sajwk khoroknwi tongmani;

³bórok siklani jora-o Ijibo tong lai phuru-o sak phal lai kha tei bórok chwlarokno bórokni khajano tang rw kha hakhe sikla kwthar wng li ya.

⁴Okrani mung khe Ohola[8] tei kusuni mung khe Oholiba.[9] Bórok khoroknwnwi’-no ani hik wng kha, Ohola khe Samaria hwnjago tei Oholiba khe Jerusalem, hakhe bórok sajwk sajlarok man lai kha.

⁵Ohola ani hik wngwi tong twtwi phano sak phal kha; tei bini hamjakmani chwla Asiriyani sengkrak khatung kha.

⁶Sengkrakrok phantok bumulni rí chum laijak, sengkrak bokhorokrok tei tẃiphangrok, bórok bebakno sikla naithok, korai saka-o kasa laijak.

⁷Omo hai khe bo bórok bai uaija lai kha tei bórok bebakno Asiriyani chwlarokno chajak lai kha; tei bórok chajakma bororokni takjak bebak mwtairok bai dera bai kha.

⁸Bo Ijibo balik bumani samungno yakar li ya. Bo sikla tong phuruno chwlarok bai thu kha tei bini khajano thwng lai kha tei bórokni muchungmani supung kha.

⁹Abo bai’-no ang bini hamjakmani borok Asiriyani thani yapharwi rw kha.

¹⁰Bórok bono swpragwi rí kwrwi khlai kha tei bini bwslasong bai bwsajwksongno tlang kha tei seng bai butharwi pái kha. Bini saka-o majra klai kha tei abo bwrwirokni khugo sajaknai khukni kók wng kha.

¹¹Bini bahanok Oholiba abono nuk kha hai phano bo teibo hamya wng kuk kha, Oholani slái’-bo kwbáng yak lai kuk kha.

¹²Bo’-bo Asiriyani tẃiphangrokno tei sengkrak bokhorokno, kanjak-chumjak sengkrakrok bai, korai-o kasajakrokno tei bebak chwla naithokrokno hamjak kha.

¹³Ang nuk kha bo’-bo sakno dera rw kha, bórok khoroknwnwi’-no abo hai khe tong lai kha.

¹⁴Hai phano bo tei kisa yak láiwi sak phalmungo tháng kha; bo Kolodiarokni tẃiphangrokni mangtang chokdeualo swijak tei kwchak phuljak nukmani bai se sotonjak kha.

¹⁵Bórokni bwchango chang khajaknai bai khajak tei bokhorogo rí khorok sórjak; bórok bebakno Babilonni korai kasanai Kolodiani tẃiphangrok hai máng.

¹⁶Bo bórokno nuk khe’-no bórokno manna muchungo tei Babilono bórokni thani bororokno rohoro.

¹⁷Hakhe Babilonsarok bini thani phai lai kha tei bo bai thu lai phai kha tei bórok bo bai thu laiwi bono dera rw lai kha; hakhe bo bórok bai dera rwjak kha tei kha hamya wngwi bórokni aroni kiphil kha.

¹⁸Bo dak-dak khe sak phal kha tei sakno sak lánga khlai kha. Ang bini bukhuk bai sakno chal rwma hai’-no bo baibo hakchal wng kha.

¹⁹Bwrwi siklani jora-o ha Ijibo tong phuru-o bo sak phal kha tei tabuk sikla jorani kókrokno muitu khlaiwi teibo lái kugui balik kha.

²⁰Bo belai khe sak kochomna bagwi koraichirka tei korai hai chwlarok bai thuna muchungjak kha.

²¹Nwng Ijibo tong phuru sikla jora-o samung hamya tangmano tang phina nai-o, aro chwlarok nwng bai thu lai kha tei nini khájarok thwng lai kha.

²²Hakhe tabuk Oholiba, Subraiyung Kaitor hai hwnwi sa-o, “Nai di, nwng sakno hakchal khlaiwi phaima nini hamjakma chwlarokno ang nono kebeng rwnai tei ang bórokno joli rwnai tei nono kebengwi bebak bwkhago bacha rwnai.

²³Ang bebak Babilonni, Kolodiani tei Pekod, Soa, Koa tei bórok bai baksa bebak Asiriyarokno tei sikla naithokrok, tẃiphangrok, sengkrak bokhorokrok, mung gwnang bororok bebak’-no korai-o kasa laijak.”

²⁴Tei Bórok korai malkhung bai khe malkhung kotor bai khe, chobani korairok bai khe sílai-pathamrok tei kwbángma sengkrakrok bai khe teibo borok kwbángma bai khe nono kebeng phainai; bórok sengrok, phuirok, khorok thupmarok bai khe nono gerep phainai. Ang nono bórokni yago sátokna bagwi yapharnai tei bórokni raida tongma tẃi nono majra rwnai.

²⁵Ang músú-ui jolimano nini saka-o klai rwnai, bórok jolima bai nini saka-o yak rwnai. Bórok nini bukungrok, khunjurokno rasunai tei tong rwknairok khe seng bai butharjak bainai. Nini sajwk sajlarokno khe romwi tlangnai tei kwthang tong rwknairok khe hór bai sókjak bainai.

²⁶Bórok nini rírok sichiknai tei nini kaham kaham uakhum-toyarokno na bainai.

²⁷Aboni bagwino ang nwng ha Ijipno tong phuru-o samung khlaimarokno tei sak phalmarokno mwthaknai. Hakhe nwng tei Ijiprokno mokol kaichomwi naisik glak tei Ijipno muitu khlai glak.

²⁸Aboni bagwino Subraiyung Kaitor hai hwnwi sa-o, “Nai di, nwng naislermani a bororokni yago tei nwng sak sak khibiui phaimani bororokni yago nono yapharnai.”

²⁹Bórok nono belai naislerma bai khe samung tangmani tei nwng baithang tangwi ajimarokno segwi na bainai. Tei nono sago rí kwrwi khe bukcha khe klangwi thángnai. Nwng sak phalmani dak-dak khe nukjaknai tei sak lánga khe sijaknai, nini samung hamya tei sak phalma-o mungnwnwi’-no nukjaknai.

³⁰Ang nono abo hai khlainai, tamni hwn khe, nwng dopharokno sak phalwi kha tei bórokni takjak mwtairok bai sakno dera rw kha.

³¹Nibi himmani lama tẃi’-no nwngbo him kha. Abo bai’-no ang bini khurino nono yapharnai.

³²Subraiyung Kaitor hai hwnwi sa-o, “Nwng nibini khurino ma nungnai, abo kobo kotor tei kubo kuthuk; nwng bórok bai mwnwijaknai tei kara thwngjaknai tamni hwn ba a khuri wng kha kupulung.

³³Nwng phek suknai tei dukhu kupulung mannai, nini bukhuk Samariani khuri abo komor rwnai tei bukcha khlainai.

³⁴Nwng pái rw súgwi thúng khe nungnai, abono swbaiwi abo bai khe nini khajano chikhlai rwnai hwnwi ang Subraiyung Kaitor sa-o.”

³⁵Abo bai’-no Subraiyung Kaitor hai hwnwi sa-o; “Norok ano pok kha tei ano uklogo khe ton kha aboni bagwi nini tongmung hamya tei sak phalmani bagwi nwng manjaknai.”

³⁶Subraiyung ano hai hwnwi bo sa kha, “Borokni sajla, nwng Ohola bai Oholibano buj thumnai da? Hakhe bórok selengmasingcha samung hamya khlaimano sakhlai di.

³⁷Bórok kubun chwla bai uaija kha, bórokni yakrogo khe thẃi nangjak; bórokni takjak mwtairok bai uaija lai kha, bórok ani bagwi manmani sakni bwsarokno suda mwtairokni thani ratharwi yaphar lai kha. Mwtairok bai chájakna bagwi hóro khiklai kha.

³⁸Phiya, bórok ani thani omo haibo khlai kha: a salo’-no bórok ani háyáno kwthar ya khlai kha tei ani sabatnobo sak nang ya wng kha.

³⁹A salo’-no bórok bwsarokno bórokni mwtairokni thani-o ratharwi yaphar kha tei ani háyá kwtharo habwi dera rw kha. Nai di, abo hai se bórok ani nogo khlai lai kha.

⁴⁰Bórok borok rohorwi hakchal hani bororokno phaina bagwi kobok hor kha, borok rohorjagwi bórokbo phai lai kha. Bukhuknwnwi’-no tuku lai kha tei mokolo naithok sil lai kha tei rangchak-ríchak kan lai kha.

⁴¹Norok achukthai kahamo achuk lai kha, bórokni bwskango songphang berajak saka-o ani satrai motomno tei ani thokno ton lai kha.

⁴²Bórokno kitingwi aro bororokni khorang khna kha; bodol dolsa bororokno hasing panthorni tubujak kha, bórok bwrwirokni yago mathiya soraui rw kha tei naithok motokbo bórokni khorogo thubui rw kha.

⁴³“Hakhe ang bono tẃi kók ma sa kha, bórok tabuk phano o sak phalwi rwjak bwrwi bai sak da gwdal tei bo’-bo bórok bai gwda gwdalno?

⁴⁴Hai phano bórok o bwrwini thani-o sak phalnairok tháng tẃi khe tháng lai kho; baliknaini thani-o uáinwi uáitham tháng lai-o. Bórok tongmung cha ya bwrwi Ohola tei Oholibani thani tháng lai-o.

⁴⁵Phiya ba borok kahamrok khe bórok uaijamano rwgwi tei borok butharmani bagwi bórokno cha ya ber suknai tamni hwn ba bórok sak phalo tei bórokni yago thẃi kupulung.”

⁴⁶Tamni hwn khe Subraiyung Kaitor hai hwnwi sa-o, “Bórokno sátokna bagwi tei butharna bagwi lukurokno ringwi tubu di.

⁴⁷Lukurok bórokno holong bai khitarnai tei bórokni seng bai butharnai tei bórokni chwla bwsa tei bwrwi bwsarokno tanwi buthar bainai bórokni nokrokno hór bai sók bainai.

⁴⁸Hakhe ang bebak ha gwnangwini samung hamyano mwthaknai, bórok samung hamya tangmani hai khe tei bwrwirok khoroksa phano tang ya na tẃi khe hus khlai rwnai.

⁴⁹Norokni samung hamyani bagwi tei takjak mwtairokno khulummani bagwi norokno manjak rwnai. Hakhe ang se Subraiyung Kaitor hwnwi norok saui mannai.”