Read Kok Borok ESEKIEL 24 Bible Online

ESEKIEL 24 - Kok Borok bible

ESEKIEL 24

¹Chwng buini ha-o khaui tlangjakmani bisichukuni talchini salchi salo Subraiyung ano hai hwnwi sa kha:

²Borokni sajla, tinini salno swiwi narwk di, tinini hai salo’-no Babilonni habugra Jerusalemno segwi na kha.

³Ano kebengsaui bachanai bororokno o rwngthomano sa di; Subraiyung Kaitor hai hwnwi sa-o hwnwi bórokno sa di; Kaisa sóngmani twkno hóro bera di, tei aro twibo lu di.

⁴Aro muihan kahamrok ton di bebak bophon kahamrok, yaphungni bahan tei phairukungni tei yakungni bahan tei bekreng kahamroknobo ton di.

⁵Mera naithokni bahan na di, aboni tola-o buphangrok[10] ton di, twi muthung di, bekreng tei bahanno sóng di.

⁶Aboni bagwi Subraiyung Kaitor hai hwnwi sa-o, “Borok butharnai kamiyung, nwng swraimung nangjak, abo twk sor khijak sóngjaknai manwi hai, abo sú se sújak phlai ya. Bahan bophon bophon khochaui najak kha, phonsa phano karjak li ya.

⁷Kamiyungo borok butharjak kha, tamo khe thẃi ha-o khlai man li ya aro hadlwibo kholobwi man li ya: Abo pháng-pháng holongdap saka-o kwsar kha.

⁸Ang a thẃino aro’-no kabu kha, abono aro hui man ya, aro’-no abo jolima bai yagul sunani nai-o.”

⁹Aboni bagwi Subraiyung Kaitor hai hwnwi sa-o, “Borok butharnai kamiyung nwng swraimung nangjak! Ang sak baithang’-no bol thumwi rúngnai.

¹⁰Teibo bol tubu di! Hór sup di! Bahanno sóng di! Bwtwino bakhor dalwi ruk di![11] Bekrengrokno sógwi pái di!

¹¹Tabuk pitolni manwi bukchano hórjlai-o boksa di. Hakhe abono tung rw di, aboni sor khijakrok kham bai khe kaham wng phinai.

¹²Hai phano sor khimanirok hór bai sógwibo[12] kwmaui tháng glak.

¹³Jerusalem, nini samung hamya bai nwng dera kha, ang nono kwthar khlainani naiwibo nono kwthar khlai man glak, ani jolima nini saka-o klai rw ya sak nwng kwthar se wng glak kha.”

¹⁴Ang Subraiyung Kaitor hai hwnwi sa-o, “Ang khlainani jora sók phai kha, ang kiphilwi tháng li ya tei bwkhabo slái glak, nono tei khábo khairok li ya. Nini samung tẃi’-no nono jera nanai.”

¹⁵Subraiyung ano hai hwnwi sa kha;

¹⁶borokni bwsa, ang uáisa bai’-no nini bwkhani borokno tlangwi tháng anw. Nwng bwkhabo ma kham glak, mabo ma kap glak tei mokolni muktwi ma sokor glak.

¹⁷Nini swlwk mabo ta khnajak di, kwthwini bagwi kapmani hai khe ta kap di. Nini bokhorokno khorok rí sor di, yakungo yaklap ká di, kwthwini bagwi chámung ta chá di.

¹⁸Phungo ang bororok bai kók sa lai tong lai-o, aboni sanja-o ani hik thwi kha. Teini salo ang sajakmani hai’-no khlai kha.

¹⁹Bororok ano hai hwnwi sẃng kha, “Tamni nwng omo hai wngwi ma tong?”

²⁰Hakhe ang bórokno hai hwnwi sa kha, “Subraiyung ano sa kha:

²¹Subraiyung Kaitor hai hwnwi sa-o, ‘Nai di, ang nini phanni yaphangno, mokol bai naina muchungmano; ani háyáno kwthar ya khlainai; tei nwng klangwi thángmani sajwk-sajlasong khe butharjak bainai.

²²Hakhe ang khlaima hai’-no norokbo khlainai. Norok mwkhang kholop lai glak eba kwthwirokni bagwi chámung chá glak.’

²³Nini bokhorokno khorok rí sórjak tongnai tei yakungo yaklap tongnai, nwng bwkhabo kham glak tei kabo kap glak, tamni hwn ba nini sumsokni bagwi twrwk twrwk kwmaui thángnai tei khoroksa tei khoroksano ma sokrom lainai.

²⁴Hakhe Esekiel norokni thani-o kaisa mari wngnai, ang khlaima hai norok bebak’-no ma khlainai. Omorok wng khe, ang se Subraiyung Kaitor hwnwi norok saui mannai.’

²⁵“O thwiblang borok, ang bórokni aroni bórokni kung chukjaknai nokthar kwrak, bórok naithokjakmani tei thángna hamjakmani abono rosaui páinai. Ang bórokni sajwk-sajlasongno tlangwi páinai.

²⁶A salo baksa yóknai borok nini thani-o phaiwi sa phainai,

²⁷a salo kók sanani phan man phinai tei kók saui man ya wng glak. Hakhe se nwng bórokni thani-o kaisa mari wngnai tei ang se Subraiyung hwnwi bórok saui mannai.”