Read Kok Borok ESEKIEL 25 Bible Online

ESEKIEL 25 - Kok Borok bible

ESEKIEL 25

¹Hakhe Subraiyung ano hai hwnwi sa kha:

²“Borokni sajla, Ammonsarokno naharwi kók diyari sa di.

³Ammonsarokno sa di, phan gwnang Subraiyung Kaitorni kókno khna di. Kwplaisa Subraiyung Kaitor hai hwnwi sa-o: Norok ani nokthar deramani nugwi, Israil ha bukcha wngmani tei Judairok buini ha-o khaui tlangjakmano nugwi ‘Cha kha cha kha’ hwnwi hwn lai-o.

⁴Aboni bagwi ang norokni salkani bororokni yago norokno yapharnai. Bórok norokni ha-o phaiwi batham khanai tei norokni bisingo, bórok tong phainai tei norokni bwtháirok tei dutrok nung bainai.

⁵Ang Rabba kamiyungno mangingang mwrwkmani panthor snamnai tei bebak Ammonsarokni hano khe merarokni lenglathai ha snamnai, hakhe ang se Subraiyung hwnwi norok saui mannai.

⁶Subraiyung Kaitor hai hwnwi sa-o, ‘Norok yapha khorop lai kha tei bársa kha, tongthok lai kha tei Israil hano hamya sa laiwi mwnwi lai kha.

⁷Aboni bagwi’-no ang norokni saka-o yak pholoknai tei norokno kubun dopharokni yago butharjaknani bagwi yapharnai; ang norokno bororok bai swkaknai tei norokno norokni hani sokomornai; ang norokno sokomornai, hakhe ang se Subraiyung hwnwi norok saui mannai.’

⁸“Subraiyung Kaitor hai hwnwi sa kha: Tamni hwn ba Seir hai hwnwi sa-o, nai di, Judarokbo kubun dopharok hai wng kha,

⁹aboni bagwi’-no ang Moab hani yasa babai phiyogwi rwnai, hakhe hano chẃngsacha khlainai Betjesimot, Bal Meon tei Kiriathaimno choprokjaknai.

¹⁰Ang Moabno[13] Ammonsarok bai baksa salkani bororokni thani-o bórokni wngna bagwi yapharnai, hakhe Ammonsong dopharok bai tei muitu khujak glak,

¹¹hakhe ang Moabno sátoknai, hakhe ang se Subraiyung hwnwi bórok saui mannai.

¹²Subraiyung Kaitor hai hwnwi sa-o; “Idomni bororok Judano khairokma kwrwi khe yagul su kha tei abo hai khe khlaimani bagwi belai’-no cha ya wng kha.

¹³Aboni bagwi Subraiyung Kaitor hai hwnwi sa-o: Ang ani yak pholoknai tei Idomni bororokni tei bini mal-matarokno butharnai. Ang abono bukcha khlainai tei Temanni simi Dedan jora bororok seng bai butharjak bainai.”

¹⁴Ang ani borok Israilrok bai Idomno yagul sunai, ang joliui thamchi tungma tẃi’-no bórok Idomni saka-o khlainai; bórok ani yagul sumano saui mannai hwnwi Subraiyung Kaitor sa-o.

¹⁵Subraiyung Kaitor hai hwnwi sa-o, “Philistiarok bwkha sitra bai khe khairokma kwrwi khe yagul su kha. Bórok belai khe naislermani bagwi Judano komor rwnani nai kha.

¹⁶Aboni bagwi Subraiyung Kaitor hai hwnwi sa-o: ‘Nai di, ang yak phologwi Philistiarokni saka-o yak rw tẃi-rw tẃi tei Keritsarokno tei twi rukungo tong rwknairokno bórok bai baksa khe sokomor bainai.

¹⁷Ang bórokno joliui yagul sunai jolima bai khe sátoknai. Hakhe bórokno abo hai khe yagul su phuru khe se; ang se Subraiyung hwnwi bórok saui mannai.’ ”