Read Kok Borok ESEKIEL 26 Bible Online

ESEKIEL 26 - Kok Borok bible

ESEKIEL 26

¹Nokha bisi chisa-o talni puilani salo Subraiyung ano hai hwnwi sa kha:

²Borokni sajla, Turni bororok Jerusalemno tẃiwi hai hwnwi sa kha, “O! báiwi pái kha, bororokni bagwi duglam tongmani swbaijak kha. Abo ani se wng si-o, tabuk omo haino bukcha wngjak, ang se hamcha sinai.”

³Aboni bagwi Subraiyung Kaitor hai hwnwi sa-o, “O Tur! Ang nini ari wng kha tei twijlangni kwbángma twi aphal hai khe ang kwbáng dopharokno nono kebengna bagwi tubunai.”

⁴Bórok Tur kamiyungni chokdeualrokno swbainai tei nok kuchukrokno swbai bainai; ang aroni bebak ha kahamrokno tlangwi thángnai tei holongdaprok simi khe klangnai.

⁵Twijlang kwcharni a ha-o a romnairok bórokni chei phwrannai, tamni hwn khe, ang Subraiyung Kaitor hai hwnwi sa-o; Tur dopharok bai tanthar-súthar khlaijaknai wngnai

⁶tei aro kami khaui tongnairokno bórok seng bai buthar bainai. Hakhe bórok ang se Subraiyung hwnwi saui mannai.

⁷Tamni hwn khe Subraiyung Kaitor hai hwnwi sa-o: Nai di, ang Turno swprakna bagwi salgra bwkhakni habugra kotor kuk Babilonni habugra Nebukadrejarno tubunai. Bo kwbángma sengkrakrokno tubu-ui salgrabaini phainai, korairok tei korai malkhungrok bai khe kwbángma sengkrakrokno tubu-ui phainai.

⁸Bo aro kami khaui tongnairokno seng bai buthar bainai; bo nono kebengwi kaisa nok kwrak tangnai tei chokdeualni saka-o ha rúngwi lama snam anw tei nono kasu-ui phui tisasanai.

⁹Tei bórokni chokdeualno swbainani bagwi kwrwng bororokno daginai tei bórokni sorni manwirok bai khe nini nok kuchukrokno swbainai.

¹⁰Bini korairok aswk khe bángnai abórokni hadlwi bai norokno kobolnai. Nini chokdeual chobani korairokni khorang bai, sengkrak kwbángmani khorang bai, korai malkhungni khorang bai hap phai phuru khe ma kwlwinai.

¹¹Bini korairok bebak norokni laharrokno kádul bainai; tei norokni bororokno seng bai buthar bainai tei nini thongla kwrakrok ha-o klaiwi tháng bainai.

¹²Bórok norokni rang-rí tei manwi kaham kahamrokno segwi na bainai, bórok norokni chokdeualrokno swbainai tei nok kahamroknobo swbainai tei norokni holongrok, buphangrok tei harok twijlango khibiui rw bainai.

¹³Ang norok tongthogwi rwchap laimano mwthaknai, chongprengni khorangbo tei khna glak kha.

¹⁴Ang nono holongdap simi se khlainai, nwng chei phwranjak thai se wngnai; nwng tei snamwi tisajak phir glak kha, tamni hwn khe, ang Subraiyung o kókno sa-o, hwnwi Subrai Kaitor sakhlai-o.

¹⁵Subraiyung Kaitor Turno hai hwnwi sa-o: Twijlang rukungo tongnairok nini klaimani khorangno khnaui tei kwsa gwnangrokni kengai laima khorang tei norokno tanthar-súthar khlai phuru kwlwi lai glak diba?

¹⁶Hakhe twijlang rukungo tong bainai bugrarok bórok achukthayungni ma nongkhor bainai; bórokni rírok ma khuknai, rí bumul gwnangrok ma khuk bainai, kiri twtwi rí ma kan lainai; bórok ha-o achuk lainai, kirijak lai kwlwi máng tong lainai tei nono nugwi mwlang cha lainai.

¹⁷Bórok omo hai khe nini bagwi kapsimang kap lainai tei sanai: O sinijaknai kamiyung nwng bahai khe sokomorjak kha,[14] twijlang rukungni bororok nini yapha-o se tongmani! Twijlango nwng tei nini bororok se muphunwi tongmani; twijlang rukungo tongnairok bebakno nwng kiri rw bai kha!

¹⁸Nwng báiwi klaimani salo twi kwcharni harok kwlwi bai kha; aroni bororok nwng mokmano nugwi kirima hap kha.

¹⁹Subraiyung Kaitor hai hwnwi sa-o, ang nono kamiyung bukcha, borok tongjak ya kamiyung hai khe khlai phuru khe, Ang nini aro twijlang kuthukmano tubu phuru khe tei twi kwbángma nono kholop khe,

²⁰hakhe bisi kwbángma swkango kuthugo thángnairok bai baksa khe tongnani bagwi nono khiklai rohornai. Ang nono mol brúm komornairok tongmani ha tola-o tong rwnai, aro kwthwi bororok bai ma tongwinai, hakhe nwng tei kwthangrok tongmani ha-o tongthai[15] man phlai glak eba tongthaibo man glak.

²¹Ang nono kirimasingcha khe pái rwnai. Nwng tei tong glak. Bororok nono rutuk phano tei nono man glak! Hwnwi Subraiyung Kaitor sa-o.