Read Kok Borok ESEKIEL 27 Bible Online

ESEKIEL 27 - Kok Borok bible

ESEKIEL 27

¹Subraiyung ano hai hwnwi sa kha:

²Borokni sajla, Turni bagwi kapsimang kap di,

³Turno sa di, twijlangni hapma lama bupra tongnai tei twijlang rukungo tong bainai bepar thwngnai bororokno, Subraiyung Kaitor hai hwnwi sa-o: Tur nwng hai hwnwi sa-o “Ang kubui kubui’-no naithok.”

⁴Nini nok khe twijlango se, nono snamnairok nono naithok khe snam kha.

⁵Bórok Senir hachukni pain buphang bokhongni bagwi na kha. Bórok Lebanonni Sidar buphangno rung kwcharni thongla khlai kha.

⁶Bórok chokphung snamnani bagwi Basanni uk buphangno na-o. Bórok Saiprasni pain buphang bai achukthai snamo tei abono mayung bua bai khop kha.

⁷Nini rungno kochok rwna bagwi swngmani rí naithok khe bwthái tisajak, Ijip hani se: Hakchal tong twtwi’-no omo sini hor jago nini ríni núkhúng kwkhrang tei phantok bubarni abo Saiprasni se.

⁸Nini rung choknairok khe Sidon tei Arbado tongnairok. Nini tang kwrwng bororok khe nini rungtor choknairok.

⁹Rung kotorno tangnairok khe tang kwrwng Biblosni bororok. Twijlangni bebak rungtorrok tei choknairok bórok nini aro bepar thwng laina phai bai-o.

¹⁰Parsia, Lidiya tei Libyarok nini aro sengkrak wngwi mon bai-o. Bórok nini chokdeualo bórokni phuirok tei bokhorokni khorok katijaknairokno khachi lai-o. Bórok se nono mwkhang chẃng rw-o.

¹¹Arbadni sengkrakrok nini chokdeualrok mwrwgo tei Gamadni bororok khe nini nok kuchuk mwrwgo, bórokni phuirokno nini chokdeualo khachi lai-o, bórok se nono naithok rwui tongo.

¹²Nwng Tarsiso bepar thwngwi rukphai, sor, tin tei sisarok nini kwbángma manwirok bai khe paiwi na kha.

¹³Jaban, Tubal tei Mesego nwng bai bepar thwng lai kha; bórok nini manwirok tei pitolni manwirok bai khe rung choknai selengrokno slái lai-o.

¹⁴Bet-togarmani bororok, bórokni samungni korairok, chobani korairok tei koraichirkarokno nini manwirok bai slái lai kha.

¹⁵Rodiani[16] bororok nwng bai bepar thwng lai kha, twijlang rukungo tongnairok nini manwi painairok bórok mayung bua tei buphangrok nini manwirokno slái-o.

¹⁶Nini kwbángma manwirok tongmani bagwi Siriyarok nwng bai bepar thwng lai-o: Bórok morokma holongrok, phantok bubarni rí, bumul naithokma, rí kaham, twijlangni naithok manwi tei kubun naithok holongrok nwng bai slái lai-o.

¹⁷Juda tei Israil nwng bai bepar thwng lai-o; bórok gom,[17] Olib thok, piya bwtwi tei bakhorrok slái lai-o.

¹⁸Damaskosni bororok nini kwbángma snamjak manwirok tongmani bagwi tei kwbángma naithok naithok manwi tongmani bagwi nwng bai bepar thwng lai-o; Helbonni arak tei Jaharni mera buikhumu bai bepar thwng lai-o.

¹⁹Dan tei Jabanrok aro-uro tháng laiwi nini manwirokno pai lai-o. Sor kaham tei bakhorrok nini manwi bai slái lai-o.

²⁰Dedanni bororok korai phikungo bojaknai rí nwng bai bepar thwng lai-o.

²¹Arabia tei Kedarni tẃiphangrok nwng bai mera bwsarok, merarok tei punrokno nini manwirok bai bepar thwng lai-o.

²²Seba tei Rama nwng bai bepar thwng lai-o. Bórok nini manwirok bai khe holong kahamrok tei rangchak tei kaham bakhorrok slái lai-o.

²³Haran, Kane tei Eden, Seba, Asur tei Kilmadni bororok bórokni manwirok bai khe nwng bai bepar thwng lai-o.

²⁴Norokni hati habarogo, bórok naithok rírok, phantok bubarni rí, bumul gwnang rí, naithok bumul supjak ha-o bojaknai tei buduk bai rapjak tei budukrok bai kwrak khe khajakrokno phalo.

²⁵Tarsisni rung kotorrok nini bepar thwngnairokno rwka-o. “Hakhe nwng manwirok bai kupulung wngjak, tei twijlangrokni kwcharo mwchangjak.

²⁶Nini rung kotor choknairok nono twi kwbángma tẃi tubu-ui phai-o. Tamo khe salkabaini nokbar twijlang kwcharo nono swklwk rw kha.

²⁷Nwng aswk bepar thwngwi rang-rí ajimanirok, nini bebak rung kotor choknairok, nini rung kotorni tangnairok tei bepar thwngnairok, rung kotoro tong bainai sengkrakrok bebakno twijlango kwlwgwi tháng kha. A salo aro tongnairok bebakno twijlang kuthugo kwlwgwi tháng bai kha.

²⁸Hakhe rung kotor choknairokni chirikma khorang bai twijlang rukung jangrijaknai.

²⁹“Rung kotor choknairok bórokni rungrok yakar bai kha; tei rung choknairok bai rungni bororok bebakno twijlang rukungo bacha lai phai kha.

³⁰Bórok nini bagwi chirigwi kap lai kha; bórokni bokhorogo hadlwi phul lai kha tei thapla saka-o goirok lai kha.

³¹Bórok nini bagwi bokhorok siljaknai tei rí soroi kan lainai; bórok bwkha nangwi nini bagwi kap lainai.

³²Bórok nini bagwi khá nangwi kapsimang kap lainai; ‘Tur hai kamiyung bubo tong, twijlang kwcharo sabo sokomorjaknai tong?

³³Nini bepar thwngnairok twijlangni phai phuru, nwng borok kwbángmano bwkha peng rw kha. Nini rang-rírok bai tei manwi kaham kwbángma bai khe habugrarokno gwnang khlai kha.

³⁴Tamo khe nwng twijlang kuthukma-o kwlwgwi tháng kha nini aswk tongmarok tei nini rung choknairok, nwng bai baksa kwlwk bai kha.

³⁵“ ‘Twijlang rukungo tong bainai bororok nono nugwi mwlang cha bainai; bórokni habugrarok belai’-no kirijak bainai tei bórokni mwkhang sitra sinai.

³⁶Dopharokni bisingo bepar thwngnairok nini manjakmano nugwi phupui-phaphai sa lai kha, nwng kirimasingcha wng sinai tei nwng tong glak kha.’ ”