Read Kok Borok ESEKIEL 28 Bible Online

ESEKIEL 28 - Kok Borok bible

ESEKIEL 28

¹Subraiyung ano hai hwnwi sa phi kha:

²Borokni sajla, Turni bugrano hai hwnwi sa di, Subraiyung Kaitor hai hwnwi sa-o: “Tamni hwn ba nwng belai khe kung chuk kha, tei hai hwnwi sa-o, ‘ang se mwtai, twijlangrokni kwcharo ang mwtairokni achukthayungo achugo,’ aile nwng borok se, mwtai ya, sakno mwtai bai baksa hwnwi bwkha-o chongwi tong phano nwng borok se,

³au, nwng Danielni slái elem gwnang kuk, nini thani-o mungsano phano huiwi tonwi man ya;

⁴nini rwngmani tei simani bai nwng sakno gwnang khlai kha, nwng rangchak tei rukphai thumwi sakni khatima nokno supung kha,

⁵nini bepar thwngni elem bai bepar thwngwi nwng kwbángma sak sakni bagwi rangchak-rukphairok aji kha tei gwnang wngmani bagwi nwng kung chuk kha,

⁶aboni bagwi Subraiyung Kaitor hai hwnwi sa-o: “Tamni hwn ba nwng mwtairok sima hai kheno sakno sijak tiro,

⁷nai di, aboni bagwi ang buini hani bororokno tei jotoni slái sitra kuk dopharokno nini thani tubunai, bórok bórokni seng bai khe nini naithokma elem tei chẃngsacharokno sokomor bainai.

⁸Bórok nono hakhoro khiklainai tei twijlang kwcharo butharjaknairok kirimasingcha khe butharma hai khe butharjagwi ma thwinai.

⁹Nono butharnairokni bwskango da nwng, ‘Ang mwtai se’ hwnwi sanai. Yang nwng le nono swpraknairokni thani mwtai ya thwiblang borok se.

¹⁰Nwng buini hani bororokni yago sakur rajakyarok thwima hai khe ma thwinai; tamni hwn ba Subraiyung Kaitor se o kókno sa-o.”

¹¹Subraiyung ano tei bo hai hwnwi sa phiu kha:

¹²“Borokni sajla, Turni habugrani bagwi kapsimang kap di tei bono sa di, Subraiyung Kaitor hai hwnwi sa-o: “Nwng se sói kahamni mari,[18] simung bai kupulung tei kubui’-no naithok,

¹³Nwng Kaitorni tháiblwng Edeno tongmani; nini kanmungrok bebak kaham holongrok khopjak, karnilian, topas, jaspar, kuphur, beril, oniks, saphir tei emarladni holongrok bai khopjak tei rangchak bai naithok khe gwina snamjakrok tongmani. Nono snammani salo’-no abóroknobo nini bagwi snamjago.

¹⁴Nwng khe mwrwkna bagwi chongjak Cherub hai; ang nono songcha kha; nwng Kaitorni hachuk kwtharo tongmani; nwng holong chẃngsajak bisingo uklok bwskang him kha.

¹⁵Nono snamjak phuruni simi nwng samung hamya tang ya kho sini belai borok kaham tongmani.

¹⁶Kubun harok bai bepar thwngmani bagwi bwkha sitra wngna srwng kha tei sumsok khlai kha. Hakhe ang nono sak nang li ya wngwi Kaitorni kwthar hatháini tikhlai rohor kha. Hakhe nono mwrwknai cherub holongrok chẃngsajak bisingni phan khe norwi rohor kha.

¹⁷Nwng naithokmani bagwi belai khe kung chuk kha. Nwng gwnang wngmani bagwi nini simungno dera rw kha. Aboni bagwi’-no ang nono ha-o khiklai kha, habugrarok nono nuk bai si thung hwnwi bórokni bwskango khiklai kha.

¹⁸Nini kwbángma sumsok bai tei bandima bai khe bepar thwngwi nini háyá kwtharrokno dera rw kha. Hakhe ang nini aro’-no hórjlai hór pasa rwui nono kham rwui páinai. Nono nuknairokni mokol bwskango thapla cha rwui páinai.

¹⁹Nono sininai bororok nono nugwi mwlang ma chanai; nwng kirimasingcha wngnai tei nwng kwma súgwi thángnai.”

²⁰Hakhe Subraiyung ano hai hwnwi sa kha:

²¹“Borokni sajla nwng Sidonni bwkhak naharwi bini bagwi kók diyarino sa di,

²²tei Subraiyung Kaitor hai hwnwi sa-o: “Nai di, Sidon, ang nini ari se; ang nini bisingo chẃngsacha wngnai; ang nini bisingo buj thumwi majra rw phuru khe tei ani kwtharno phunuk phuru khe ang se Subraiyung hwnwi bórok saui mannai;

²³tamni hwn ba ang nini thani-o bok rohornai, tei nini lahar kotoro thẃi kochok rwnai; nwng bebak bwkhago choprokjagwi seng bai butharjak bainai. Hakhe ang se Subraiyung hwnwi bórok saui mannai.”

²⁴“Israilrokno lachimasingcha khlainai tei kirik rwrai atakereng busu eba suplaui kwsa khlainai busurok hai bórokno kitingwi tongnai a arirok tei tong glak. Hakhe bórok ang se Subraiyung Kaitor hwnwi saui mannai.

²⁵“Subraiyung Kaitor hai hwnwi sa-o: Israilrokno bórok piring-poroi wngwi tong baimani thumwi tubu khe tei dopharokni bwskango ani kwtharno phunuk khe tei bórok ani seleng Jakobno yapharmani ha-o tong bainai.

²⁶Bórok aro kiri-kóró kwrwi khe tongwi mannai. Bórok nokrok tang lainai tei angurrok kái lainai; bórokno sátoknai bebak ganani dopharokno ang sátok phuru khe bórok kwchang kwchang khe tong lainai. Hakhe ang se Subraiyung Kaitor hwnwi bórok saui mannai.”