Read Kok Borok ESEKIEL 29 Bible Online

ESEKIEL 29 - Kok Borok bible

ESEKIEL 29

¹Chwng buini ha-o khajagwi tongmani bisichini talchini salchinwini salo Subraiyung ano hai hwnwi sa kha:

²Borokni sajla, nwng Ijipni habugra Pharaoni bwkhak nahar di tei habugra bai ha Ijipni bagwi kók diyari sa di.

³Subraiyung Kaitor hai hwnwi sa-o, hwnwi sa di, “Ha Ijipni bugra Pharao, nai di, ang nini ari se, nwng Nil twima-o makhimai kotorma hai, ‘Nwng sa-o, Nil twima nini se;’ ani bagwi se ang snamo”

⁴Tamo khe ang nini chenglai-o biching kwcha rwnai tei twimani árokno nini bophoro kwcha rwnai. Ang nono twimani twini hakungo tisasanai tei twimani árok nini bophoro kwcha bainai.

⁵Ang nono tei twimani bebak árokno hasing panthoro khibiui rohornai; nwng hai’-no ha-o klaiwi tongnai tei nono khochanaibo tong glak eba phobnaibo tong glak. Ang nono yabrwirokno tei toksa toktẃirokni chámung wngna bagwi rw kha.

⁶Hakhe Ijibo tongnai bebak bororok, Ang se Subraiyung hwnwi saui mannai. Israil nini thani chubachu san phuru khe nwng mungsa chúk ya chwkapni borok hai se.

⁷Bórok nini yak rom phuru khe, nwng swbai-o tei bórokni phairukung swbai-o tei bórok nini aro sak bera khe nwng bórokni phikungno kóisa rwui rw-o.

⁸Aboni bagwi Subraiyung Kaitor hai hwnwi sa-o: Nai di, ang nini thani-o seng tubunai tei abo borok tei yabrwirokno butharnai.

⁹Ha Ijip bukcha wngnai. Hakhe ang se Subraiyung hwnwi bórok saui mannai. “Tamni hwn khe nwng hai hwnwi sa-o, ‘Nil twima ani se tei abono ang se snamo.’

¹⁰Aboni bagwi’-no nai de, ang nini tei twimarokni kena ari wngnai tei Midgolni simi Sein jora, hakchalma Ithiopiani ha ari jora ha Ijipno katswi bukcha tei khibijak khlainai.

¹¹Bororok eba yabrwirok mungsa phano ayang tẃi him glak. Nokha bisi brwichi jora aro borok bai tongjak glak.

¹²Ang Ijipno bukcha khlainai tei omo tei kubun bukcha dopharok bai kitingjak wngnai. Bini kamiyungrok bukcha tei khibijak wngwi tei kubun bukcha kamiyungrok bai khe kitingjagwi nokha bisi brwichi jora tongnai. Ang Ijipsarokno hakchal harogo piring-poroi khlainai.

¹³“Subraiyung Kaitor hai hwnwibo sa-o: Bisi brwichini ulo khe ang Ijipsarokno oroi-poroi khe tongwimani buini dopharokni aroni thumwi nogo tubu phinai.

¹⁴Ang bórokno khajagwi tlangjakmani hani kiphilwi tubu phinai tei bórokno sói bórokni ha Pathroso kiphilwi tubunai tei aro bórokni ha phan kwrwi ha wngnai.

¹⁵Abo jotoni slái phan kwrwi kuk wngnai tei kubun dopharokno tẃither man glak. Ang bórokno aswk samung nang ya khlainai tei bórok nai phano kaisa dophano phano kong rwui man glak.

¹⁶Israilrok tei bini thani chubachuni bagwi khá bera glak. Ijipni manjakmano nugwi’-no Israilrok chubachuni bagwi bórokni thani-o thángmani bwswk cha ya wng kha muitu wngnai. Hakhe, ang se Subraiyung Kaitor hwnwi Israilrok saui mannai.”

¹⁷Buini ha-o khajagwi tongnai nokha bisi nwichisnini yaphang talni puilani salo Subraiyung ano hai hwnwi sa kha:

¹⁸Borokni sajla, Babilonni habugra Nebukadrejar Tur bai choba nang lainani bagwi kwrak khe tiyar wng kha; bebak sengkrakrok bokhorok siljak kha tei bórokni bangora thupu-ui hanthor kha kha tamo khe bo bai bini sengkrakrok Turni thani bórokni kolomtwi khiklai samung khlaimani manthaino man ya.

¹⁹Aboni bagwi’-no Subraiyung Kaitor hai hwnwi sa-o, “Nai di, ang ha Ijipno Babilonni habugra Nebukadrejarni yago yapharnai. Bo aroni bebak rang-rírok segwi tlang bainai tei abo bini sengkrakrokni samungni manthai wngnai.

²⁰Ano monmani bagwi ha Ijipno bono yaphar kha, tamni hwn ba bo ani bagwi samung tang kha, hwnwi Subraiyung Kaitor sa-o.”

²¹A salo, ang Israilno kwplai khlainai tei bororokni thani-o kók sa rwnai. Hakhe ang se Subraiyung hwnwi bórok saui mannai.