Read Kok Borok ESEKIEL 3 Bible Online

ESEKIEL 3 - Kok Borok bible

ESEKIEL 3

¹Bo ano hai hwnwi sa kha, “Borokni sajla ang nono yapharmano nwng chá di, o swijak bijap doljakno chá di, hakhe Israil bororokni thani thángwi saui di.”

²Hakhe ang khua khe bo swijak bijap doljakno chá di hwnwi rw kha.

³Bo ano hai hwnwi sa kha, “Borokni sajla, ang rwmani swijak bijap doljakno cháui ok pung di.” Hakhe ang abono chá kha, abo piya bwtwi bai baksa’-no kwtẃima.

⁴Bo ano hai hwnwi sa kha, “Borokni sajla, Israil bororokni thani thángwi ani kókrok bórokno saui di.

⁵Tamni hwn ba nono kók kutuk sanai bororokni thani rohor ya, phiya ba Israil núkhungo se rohoro.

⁶Nwng romwi man ya buini hani kwbángma kók kutuk sanai bororokni thani-o ya, ang abo hai bororokni thani rohor khe bórok nini kókno khna bainai.

⁷Tamni hwn ba Israil bororok nini kókno khna bai glak, tamni hwn ba bórok ani kókno suda khunju kan ya gwja, tamni hwn ba bebak Israil bororok gwdna kwrak tei khá si ya gwja.

⁸Nai di, ang bórokni mwkhangni slái nini mwkhangno tei bórokni murkuni slái nini murkuno kwplai snam anw.

⁹Ang nono holongni slái phano teibo kwrak kuk khe snamnai, nwng bórokno kisa phano ta kiri di tei bórokno nugwi khá ta thwi di, tamni hwn ba bórok khe kebengnairok.”

¹⁰Bo teibo ano hai hwnwi sa kha: borokni sajla, ang nono samani bebak kókrokno nini khunju bai khna di tei bwkha-o chu-ui narwk di.

¹¹“Subraiyung Kaitor ahai hwnwi sa-o” hwnwi buini ha-o khajagwi tong bainai nini bororokni thani thángwi ahai hwnwi saui di; bórok abono khna thung eba khna ya thung.

¹²Hakhe Kaitorni Phola ano kuchugo tisa khe ani uklogo khorang kotor khe hai hwnwi samano khna kha, “Bini tongthai kuchugo Subraiyungni chẃngsacha lobjak thung.”

¹³Ang bwkrang kangnwi nang laiwi pungmani khorang khna kha tei malkhungni gorgori khorang hai khe, phirangni khorangbo khna kha

¹⁴Hakhe Kaitorni Phola ani thani phaiwi ano tisaui tlang kha, ani bwkha hamya twtwi ma tháng kha. Phiya ang Subraiyungni phankrak phanno romwi man kha.

¹⁵Ang Tel-abibni Kebar twima rukungo khajak bororok tong bai ma-o phai kha, ang aro bórok bai nokha salsni uanaui ma tong kha.

¹⁶Nokha salsni salni páithago Subraiyung ano hai hwnwi sa kha,

¹⁷“Borokni sajla, ang nono mwrwknai chong kha, ang nono sa phuru khe nwng bórokno ma khorainai.

¹⁸Ang borok hamyano, ‘Nwng ma thwinai’ hwnwi sa phuru nwng bono khoraiwi bini langmano mwthang ya khe, a borok hamya bini sumsokni bagwi ma thwinai, phiya ba bo thwimani nono se ber anw.

¹⁹Phiya ba nwng a borok hamyano khoraiwi a borok lama hamyani khá kiphil ya khe bini sumsok bai bo ma thwinai, nini langma khe mwthangjaknai.

²⁰Khoroksa borok kaham bo uphilwi sumsok khlai khe tei ang bono birmano khiklai khe, bo ma thwinai, tamni hwn ba nwng bono khorai ya, a borok bini sumsok bai’-no ma thwinai tei bo samung kaham khlaimarokno muitu khlaijak glak, tamni hwn ba bo thwimani ang nono se bernai.

²¹Phiya ba nwng borok kahamno sumsok ta khlai di hwnwi khorai khe tei bo sumsok khlai ya wng khe, bo sói’-no thangnai, tamni hwn ba bo khoraimano khna kha tei nwng nini langmano mwthango.”

²²Subraini phan ani saka-o tongmano ang saui man kha tei bo ano hai hwnwi sa kha, “Bacha di, harungo tháng di, ang aro nwng bai kók sa anw.”

²³Hakhe ang bachaui harungo tháng kha, aro ang Subraiyungni chẃngsacha Kebar twima rukungo nukmani hai khe nuk kha; hakhe ang ha-o mwkhang ma bomson kha.

²⁴Hakhe Kaitorni Phola ani thani-o hap phaiwi ani yakung bai bacha rwui bo ano hai hwnwi sa kha, “Tháng di, nini nogo thángwi dugar soui tongwi di.

²⁵O borokni sajla, nwng dwkhwi bai khajak anw, hakhe nwng bororokni thani thángwi man glak.

²⁶Ang nini bwslaino raksa rwnai, hakhe nwng o kebengnai bororokno kulwi se man glak.

²⁷Hakhe ang nwng bai kók sa phuru khe, ang nini búkhúk phiyogwi rwnai tei nwng bórokno hai hwnwi sa di, Subraiyung Kaitor hai hwnwi sa-o, kók khnanai borok khe khna thung tei khna ya khe ba ta khna thung, tamni hwn ba bórok wng kha kebengnairok.”