Read Kok Borok ESEKIEL 30 Bible Online

ESEKIEL 30 - Kok Borok bible

ESEKIEL 30

¹Subraiyung ano hai hwnwi sa phi kha,

²Borokni sajla Subraiyung Kaitor hai hwnwi sa-o, hwnwi kók diyari sa di; “Kirimasingcha sal sók phaiwi tongo!”

³Subraiyungni sal sampha kha. Chumui bai koboljak sal a jora khe Kaitorno poito khlai yarokni bagwi wngnai.

⁴Ijipni saka-o seng klainai tei Ithiopia belai khe sátokmung mannai, bini rang-rírok segwi tlangjak bainai tei bini thongrok swbaijaknai.

⁵Ithiopia, Libya, Lidiya, Kubni sengkrakrok tei ani bororokni bisingobo baksa Ijip bai baksa butharjak bainai.

⁶Subraiyung hai hwnwi sa-o: Migdolni simi Sein jora bebak Ijip bai yak thansa wngnairok, choba-o butharjaknai tei Ijipni kung chuknai sengkrak sokomorjak bainai, hwnwi Subraiyung Kaitor sakhlai-o.

⁷Bórok bukcha harokni bisingo bukcha kuk wngnai tei bórokni kamiyungrokbo kamiyung khibijakrokni bisingo khibijak kamiyung wngnai.

⁸Ijibo ang hór phnangwi khe tei bebak bini sengkrakrok butharjak bai phuru khe ang se Subraiyung hwnwi bórok saui mannai.

⁹A salo ang Ithiopiano sikirinani bagwi rung kotor bai tẃitunrokno rohornai tei bórok belai khe kirima cha bainai. Nai di, abo kubui’-no phaiwi tongo!

¹⁰Subraiyung Kaitor hai hwnwi sa-o, “Ang Babilonni habugra Nebukadrejarni yak tẃi khe Ijipni bebak rang-rírokno pái rw suknai.

¹¹Bo tei bini sengkrak jotoni slái dopha cha ya kukno hani sokomornani bagwi tubunai, bórok Ijipni saka-o seng tisanai tei ha kwthwi bai kupulung wngnai.

¹²Ang Nil twimano ran rwnai tei borok hamyani yago hano phalwi rwnai. Buini hani bororok bai khe o hano bebak bukcha khlai bainai; ang Subraiyung o kók sa-o.”

¹³Subraiyung Kaitor hai hwnwi sa-o, “Ang Mophni takjak mwtairokni tei mangtangrokno sokomornai, ha Ijibo tei bugra tong glak tei ang Ijipni ha gwnangwi kirima hap rwnai.

¹⁴Ang Pathrosno borok bukcha khlainai tei Joano hór phnangwi rwnai tei Thebesno khe majra rwui sátoknai.

¹⁵Ang Ijipni kamiyung kwrakma Pelusiumni salka-o ani jolima lukhlainai tei Thebesni rang-rírokno sokomornai.

¹⁶Ang Ijibo hór phnangwi rwnai tei Pelusium belai ayuk-muyuk ma wngnai. Thebes nokbar kotor bai khe tlangjaknai tei Moph khe sal brúm bwkha yogwi ma tongnai.

¹⁷On tei Pibesetni sikla seng saka klai kha; tei bwrwirok khe khajagwi tlangjak bai kha.

¹⁸Ang aro Ijipni phanno swbai khe Tapanheso mwnakma wngnai tei bini phanni bagwi kung chukmabo páinai. Bo chumui bai kholopjaknai tei bebak bwsajwksong khaui tlangjak bainai.

¹⁹Abo hai khe ang Ijipno majra rw phuru khe, ang se Subraiyung hwnwi bórok saui mannai.”

²⁰Chwng buini ha-o khajagwi tongmani nokha bisi chisani tal yaphangni sal chisnini salo Subraiyung ano hai hwnwi sa kha,

²¹Borokni sajla, ang Ijipni habugra Pharaoni yaktwkno swbai kha; seng romwi man phina tẃi khe abono khoroksa phano ham rw phinani bagwi rírok khaui rw ya kho.

²²Aboni bagwi Subraiyung Kaitor hai hwnwi sa-o, “Nai di, ang Ijipni habugra Pharaono kebengnai. Ang bini yaktwk kongnwino’-no swbaiwi rwnai, kwbai kongnwi bai baksa kahamnobo swbaiwi rwnai tei bini yakni sengno swkraiwi rwnai.

²³Ang Ijiprokno bebak dopharokni bisingo tei bebak ha gwnangwi piring-poroi khlai rohornai.

²⁴Hakhe ang Babilonni habugrani yakno kwrak khlainai tei bini yago ani sengno yapharnai. Phiya ba ang Ijipni habugrani yakno khe swbainai tei bo bai malai khe, bini arirokni bwskango thwina nai tongnai hai khe ma kengainai.

²⁵Hakhe ang Babilonni habugrani yakno kwrak khlainai tei Pharaoni yakno khe klai rwnai. Ang Babilonni habugrani yago ani sengno yapharwi bo Ijipni bwkhak pholokma nuk khe, ang se Subraiyung hwnwi lukurok saui mannai.

²⁶Ang Ijiprokno bebak dopharokni bisingo tei bebak gwnangwi piring-poroi khlai rohornai. Hakhe, ang se Subraiyung hwnwi bórok saui mannai.”