Read Kok Borok ESEKIEL 31 Bible Online

ESEKIEL 31 - Kok Borok bible

ESEKIEL 31

¹Nokha bisi chisani taltham talni puilani salo Subraiyung ano hai hwnwi sa kha,

²Borokni sajla Ijipni habugra Pharaono tei bini bororokno sa di. Nwng bwswk se phan gwnang! Nono sabo bai su sinai?

³Asiriya nwng Lebanonni Sidar buphang haino tongmani, naithok-naithok bedekrok bai bolongo saklom khe tonmani; bini chukmani chumui-o se khu-ui si-o.

⁴Twi abono torsa rw-o, ha bisingni twi bono loksa rw kha, Bono kitingwi twimarok yorjak, bini aroni twisa yormarok hapharni bebak buphango twi rwui rohoro.

⁵Aboni bagwi abo hapharni tei kubun buphangrokni slái lok kugo; bini bwlái bedekrokbo bángo tei twi kwbáng manmani bagwi bini bedekrokbo lok bai-o.

⁶Bebak nokhani toksarok aboni bedekrogo bothop thum bai-o. Bolongni yabrwirok aboni saklomo bwsa khlai-o. Bebak dopha kotorrok bini saklomo lengla phai-o.

⁷Bini tormani bai tei bedekrok lokma bai bwswk se naithok; tamni hwn khe bini yarwngrok kuthuk, twi manthokma-o sógwijak

⁸Kaitorni bolongo o sidar buphang hai tei kaisa sidarno phano suthai kwrwi eba painroknibo bedekrokbo bo bai baksa kwrwi, tei ahai’-no kubun buphangrokni bini hai bedek báng ya, Kaitorni bolongo abo hai tei naithok buphang se kwrwi.

⁹Ang abono kwbángma bedek buprarok bai naithok khlai kha. Kaitorni tháiblwng Edeno bebak buphangrok abono músú kha.

¹⁰Aboni bagwi Subraiyung Kaitor hai hwnwi sa-o, “Tamni hwn ba abo torwi lokmani chumui-o khu-ui kha. Abo chukmani bagwi kung chuk kha.

¹¹Ang bono dopharokni bisingo phan gwnang kukni yago yapharnai, bini samung tangmani tẃi’-no yak rwjaknai; bini samung hamyani bagwi bono rwkhlai rohor kha.

¹²Buini hani dopha hamya bororok abono tanwi khibiui klang kha. Hachukrogo tei harungrogo bini bedekrok klai kha. Bini bedek kwbairok twi rukungrogo klai tong bai kha. Ha sakani bini saklomo tongnai dopharok bono khibiui tháng bai kha.

¹³Nokhani bebak toksarok a buphang báijago tong phai lai anw tei bolongni yabrwirok aboni bedekrogo tong phai lainai.

¹⁴Tabukni simi twi rukungni buphangrok chukmani sak sak kung chuk yana tẃi khe tei bedekrokbo chumui ta khu si thung, twi kwbáng man phano abórokbo aswk ta chuk si thung. Abórok bebak’-no ha bisingo thwiblang bororok bai baksa hakhoro thángnairok bai baksano thwinani bagwi chongjak.”

¹⁵Subraiyung Kaitor hai hwnwi sa-o: “Bono mangkhoro tubumani a salo ang twimuk kuthukno bini bagwi kapma bai khe muthup kha bini twimukno kwcha rw kha, bini twi-twisarok mwthak kha. Ang Lebanonno bini bagwi kap rw kha, hapharni buphangrokno ransa rw bai kha.

¹⁶Ang hakhoro thángnairok bai baksa kwthwini ha-o bono rohor phuru, bini báiwi klaimani khorang bai dopharok ma kwlwi bai kha; Edenni bebak buphangrok tei jotoni slái kaham kuk tei twi rukungo tongnai Lebanonni buphangrok kwthwirokni ha bisingo tongthokjak bai kha.

¹⁷Bórokbo seng bai butharjaknairok bai baksa morke-o tháng bai kha tei bórokni saklomo tongnai bórokni pal dopharok bo bai baksa’-no ma komor bai kha.”

¹⁸Eden tháiblwngni buphangrokni bisingo nwng hai chẃngsacha tei kotor to da tong? Hai phano tabuk nwng kwthwini ha-o Edenni buphangrok bai baksa khiklaijaknai; nwng seng bai butharjaknai sakur rajak yarok bai baksa ma thwinai. Omo wng kha Pharao tei bini bororok se hwnwi Subraiyung Kaitor sa-o.