Read Kok Borok ESEKIEL 32 Bible Online

ESEKIEL 32 - Kok Borok bible

ESEKIEL 32

¹Nokha bisi chinwini tal tei chinwini puilani salo Subraiyung ano hai hwnwi sa kha,

²Borokni sajla, Ijipni habugra Pharaoni bagwi kapsimang kap di tei bono sa di: Nwng dopharokni bisingo singho sikla hai tei twijlangni makhimai hai se twi pupak rw-o tei nini yakung bai khe twi rumu rw-o.

³Subraiyung Kaitor hai hwnwi sa-o, ang borok kwbángma rwi rohorwi chei swng rwui nono romnai tei twini hakungo tisanai.

⁴Ang nono butharna bagwi hakungo tisanai. Nokhani tokrok nini aro birkhlai bainai tei ha gwnangwini bolongni yabrwirokno nini thani kuthum rwnai.

⁵Ang hachukrokni saka-o nini bahan khiklainai tei nini mang kwthwirok bai harungrok kupulung khlainai.

⁶Ang nini thẃino ha saka-o kochok rwnai tei hatháirogobo kochok rwnai; tei twisarokbo kupulung wngnai.

⁷Ang nini chatino buthar phuru khe, ang nokhano kholopnai tei athukirirokno mwnak rwnai; ang salno chumui bai kobol rwnai tei talbo chẃng glak.

⁸Ang nokhani bebak kwchẃng pohorno mwnak khlainai tei nini hano mwnak rwnai hwnwi Subraiyung Kaitor sa-o.

⁹Sini ya nuk ya dopharokni bisingo tei harogo, ang norokni saka-o komormungno tubumani nuk khe, kwbángma bororokni bwkhano hamya khlainai.

¹⁰Borok kwbángma’-no nono nuk khe ma kwmam anw, ang ani sengno bórokni bwskango kol phuru khe habugrarok nono kirima chaui ma kwlwi bainai, nwng klaimani salo bebak’-no sak sakni langmani bagwi kiri bainai.

¹¹Subraiyung Kaitor hai hwnwi sa-o, “Babilonni habugrani seng nini saka-o sók phainai.

¹²Dopharokni bisingo phan gwnang kuk tei hamya kukrokni seng bai khe nini bororok butharjak bainai. Bórok Ijipni kung chukmano mwthaknai tei bini bebak bororok sokomorjak bainai.

¹³Ang nini yabrwirokno twi kwbángma gana-o tantharnai, aro bororokni yapribo, phiya yabrwirokni yapribo tei twi rumu rw phai glak.

¹⁴Hakhe ang bórokni twino kwchẃng khlainai tei twimarokno thok hai khe yor rwnai,” hwnwi Subraiyung Kaitor sa-o.

¹⁵Ang Ijipni hano bukcha khlai phuru khe tei harokno swkak bai khe tei aro tong bainai bebakno buthar bai khe, ang se Subraiyung hwnwi bórok saui mannai.

¹⁶Omo hai khe se bórok bini bagwi kapsimang kap lainai; dopharokni bwrwirokbo Ijipni bagwi abo ai khe’-no kapsimang kap lainai; Ijip bai bini bororokbo hai khe’-no bwthái kholwi kap lainai hwnwi Subraiyung Kaitor sakhlai-o.

¹⁷Bisichinwini Talni salchibani salo, Subraiyung ano hai hwnwi sa kha,

¹⁸borokni sajla, Ijipni borok kwbángmarokni bagwi kap di, bórokno phan gwnang dopharok bai baksa hakhoro khiklai rohor di, bono tei bwsajwksongno mung gwnang dopharok bai baksa kwthwirokni ha-o rwui rohor di.

¹⁹Bórokno sa di, o Ijip norok buini dopharokni slái de naithok? I’nhi! Nongkhorwi thagwi sakur rajak yarok bai baksa thu-ui tongwi di.

²⁰Bórok choba-o seng bai[19] butharjaknairok bai baksa khlainai; bo tei bini bororok seng bai butharjakna bagwi yapharjak.

²¹Phan gwnangrokni bere kwrak kuk tẃiphangrok tei bórokno chubanairok morke-o tongwi bono sa lainai; bórok hakhoro ma klai bai kha, seng bai butharjaknai sakur rajak yarok bai baksa khe thu lai ma tong kha.

²²Asiriyabo bini bebak sengkrakrok bai aro’-no; seng bai butharjak bainairokni mangkhorrokbo bórokni mangkhorno kitingjak.

²³Bórokni mangkhor khe hakhor kuthuk kuk se. Tei bini palrok bini mangkhorno kiting laijak, bórok bebakno seng bai butharjaknairok máng, bórokno kwthangrokni ha-o sikiri-o.

²⁴Elam aro’-no bini sengkrakrokni mangkhor bono kitingjak, bórok joto choba-o butharjak bai kha, bórok sakur rajak ya khe kwthwini ha-o tháng lai kha, kwthang tongnairokno bórok sikiri kha, bórok hakhoro tongnairok bai baksa lachimung manẃi tong kha.

²⁵Elam choba-o thwinairok bai baksa mokholjak kha, bini sengkrakrokni mangkhorbo bini mangkhorno kitingjak, bórok joto sakur rajak ya mángno, joto choba-o butharjak bai kha, bórok kwthang phuru sikiri laimani phiya tabuk khe kwthwirokni ha-o tongnairok bai baksa lachimung man kha, butharjaknairok bai baksa khe ma tong kha.

²⁶Mesek bai Tubal aro-o tei bórokni bebak bororokbo aro’-no, bórokni mangkhorrok bono kitingjak. Bórok salsa kwthangrokni ha-o sikiri phano, bórok sakur rajak ya máng’-no, bebakno choba-o butharjak bai kha.

²⁷Bórok choba-o butharjaknai sakur rajak yarok bai baksa khe phobjak ya, bórok sakni chobani manwirok hakhoro tháng bai kha tei bórokni sengrok khorogo kobong laijak tamo khe bórokni samung hamyarok bórokni bekrengo klainai tamni hwn khe kwthangrokni ha-o bo sikiri kha.

²⁸I’n nwng sakur rajak yarok bai baksa butharjaknai tei seng bai butharjaknairok bai baksa ma phobjaknai.

²⁹Aro Idombo bini habugrarok tei tẃiphangrok bórok salsa phan gwnang buino sak nang ya sengkrak tongmani tabuk khe bórok choba-o butharjaknai a sakur rajak yarok bai baksa khe kwthwirokni ha-o mokholjagwi ma tongwi kha.

³⁰Salsibai bwkhakni tẃiphangrok tei Sidonrokbo aro o salsa bórok phan gwnang wngwi buino sikiri kha, hai phano tabuk bórok sakur rajak khe choba-o butharjaknairok bai baksa lachimung manẃi hakhoro ma tháng kha tei hakhoro thángnairok bai baksa’-no bórokni lachimungno ma hor kha.

³¹Ijipni habugra Pharao tei bini sengkrakrok choba-o butharjaknairokno nuk khe bini butharjak bainai a bororok bai sengkrakrokni bwkha kwchangjaknai, hwnwi Subraiyung Kaitor sa-o.

³²Tamni hwn khe kwthang tongnairokni ha-o ang kiri rwnai tei bo bebak seng bai butharjak bainai sakur rajak yarok bai baksa, Pharao tei bini bororok bai baksa ma mokholjaknai, hwnwi Subraiyung Kaitor sa-o.