Read Kok Borok ESEKIEL 33 Bible Online

ESEKIEL 33 - Kok Borok bible

ESEKIEL 33

¹Subraiyung ano hai hwnwi sa kha:

²Bororokni sajla nini borokni bwsarokno sa di, bórokno hai hwnwi sa di: Ang ha-o choba phnang phuru khe, hani lukurok bórokni bisingni tei bórokni amchoini khoroksano romwi tlangwi bórokni bagwi mwrwknai khlai di.

³Bo sengno ha-o phaimani nuhur khe, bo totro tamwi bororokno hus khlai rw-o.

⁴Hakhe borok khoroksa swk totro tamma khorang khnaui hus khlai rwmano sak nang ya hwn khe; seng bini saka-o klai phai khe, bini thẃi bini saka’-ono klainai.

⁵Bo totro khorang khnamani le khna kha hai phano hus wng li ya; bini thẃi bini saka’-ono klainai. Phiya ba hus khlaimano khna khe bo thwinani yakni yóknai.

⁶Hai phano mwrwknai sengkrakrokno phaimani nuhurwi suda lukurokno hus khlaina bagwi totro tam ya hwn khe tei seng phaiwi bórokni bisingni khoroksa swkni langmano tlang khe, a borok bini sumsokni bagwi tlangwi thángjaknai, tamo khe ang a butharjaknaini thẃini majrano mwrwknaino bernai.

⁷Hakhe o borokni sajla, ang nono Israil dopharokni bagwi mwrwknai chong kha, aboni bagwi nwng ani khukni kókno khna di tei nwng bórokno ani wngwi hus khe rw di.

⁸Ang borok hamya khoroksano, o borok hamya nwng sói thwinai tei nwng ma thwinai hwnwi sa phano bini lamani kiphil ya hwn khe, bini sumsokni bagwi bo ma thwinai tei bo thwimani majrano ang nono se bernai.

⁹Phiya ba nwng borok hamyano bini lama hamyani kiphil di hwnwi saui suda bo kiphil ya hwn khe, bo bini sumsokni bagwi thwinai tamo khe nwng sak khe mwthangjaknai.

¹⁰Aboni bagwino, o borokni sajla, Israilni bororokno sa di; nwng hai hwnwi sa di, tumungno chini samung cha yarok tei sumsokrok chini saka’-ono klainai hwn khe, chwng bórokni bagwi se lengrung nangjak hakhe chwng bahai khe thangnai?

¹¹Bórokno sa di, Subraiyung Kaitor hai hwnwi sa-o, “Ang kwthang tong sak borok hamyarok thwimano ang chajak ya, tamo khe sumsok gwnang borok bo khá kiphilwi mwthangjak thung, o Israilrok norok samung hamya khlaima thak di, tamo wngwi norok thwinai?”

¹²Aboni bagwi borokni sajla nwng nini borokrokno hai hwnwi sa di, “Borok kaham sumsok khlai khe, bini samung kaham khlaima bai bono mwthangwi man ya, eba borok hamya samung hamya yakar khe bo majra berjak glak tei borok kaham phano sumsok khlai khe bo mwthangjak glak.

¹³Ang borok kahamno thangnai hwnwi sa phano, bo swkango samung kaham klaimani bai’-no thangnai hwnwi chongwi sumsok khlai khe, bini aswk samung kaham khlaimarokno ang muitu khlai glak, bini sumsok bai’-no bo ma thwinai.

¹⁴Ang borok hamyano nwng ma thwinai hwnwi sa phano, bo sumsok yakarwi sói tei samung kaham khlai phi khe,

¹⁵bo lakai namano tei khokmano kiphilwi rw phi khe, bo sumsok khlaima yakarwi lama kahamo him phi khe, bo sói thangnai, thwi glak.”

¹⁶Bini agini sumsok khlaimarokno muitu khlaijak glak, bo thangnai tamni hwn ba bo sói tei samung kaham khlai kha.

¹⁷Phiya ba nini bororok, “Subraiyungni lama se cha ya” hwnwi sa lai-o, yang le bórokni lama se cha ya.

¹⁸Borok kaham bini samung kaham tangma yakarwi sumsogo gwdal khe, bo aboni bagwi ma thwinai.

¹⁹Tamo khe borok hamya bini samung hamya tangma yakarwi sói tei samung kaham tang khe bo abo bai’-no thangnai.

²⁰Phiya ba nwng khe hai hwnwi sa-o, “Subraiyungni lama cha ya” o Israilsarok, ang norokno norokni samung khlaima tẃi’-no buj thumnai!

²¹Nokha bisi nwichibani tal chini sal bani salo Jerusalemni baksa yógwi phaiwi kamiyung segwi najak kha hwnwi ano sa phai kha.

²²O borok phaimani swkango’-no sanja-o Subraiyungni phan ani thani-o sók phai kha, phungo bórok phaimani swkango’-no ani búkhúkno phiyogwi rw kha. Ang tei siring siring tongwi man li ya.

²³Subraiyung ano hai hwnwi sa kha:

²⁴Borokni sajla, Israil hani kamiyung kwbai-o tong bainairok sa lai-o, Abraham khoroksa’-no o ha-o tongmani, phiya ba chwng borok kwbángma tongo, o ha chwngno rwjak kha.

²⁵Aboni bagwi Subraiyung Kaitor hai hwnwi sa-o hwnwi bórokno sa di, nwng thẃi gwnang khe bahan chá-o, norok norokni takjak mwtairokno khulumo tei borok ratharo; hakhe da norok o hano mannai?

²⁶Norok sakni seng bai se khom-khom wngjago. Norok khoroksa tei khoroksa nok arini hiksong bai thu lai chá lai khe sakno dera rw-o; hai khe da norok o hano mannai?

²⁷Subraiyung Kaitor hai hwnwi sa-o hwnwi bórokno sa di, “Kamiyung kwbai-o tong bainai bororok seng bai butharjak bainai. Panthoro tongnairok khe bolongni yabrwirok bai uátharjak bainai. Nok kwrak tei hagurung bisingo tongnairok khe bemuk hamya manjagwi thwi bainai.

²⁸Ang o hano sokomornai tei bukcha khlainai, hakhe bini kung chukmano pái rwnai; Israilni hachukrok aswk khe borok bukcha wngnai tei khoroksa phano ayang tẃi him glak.

²⁹Ang bórok sumsok khlaimani bagwi o hano katswi borok bukcha khlai kha hakhe ang se Subraiyung hwnwi bórok saui mannai.”

³⁰Bórokni bwsa, nwng khe nini bororok kamiyungni chokdeual ganarogo tei nokni duglamrogo khoroksa tei khoroksano hai hwnwi sanai, “Phai di, Subraiyung tamo sa khna lai anw.”

³¹Hakhe bórok bororok phai tẃi khe nini thani phainai tei nini bwskango ani bororok achuk tẃi khe achuk lainai, bórok nwng samani kókno bo khunju bai khnanai tamo khe abo hai khe tong glak; tamni hwn ba bórok búkhúk bai hamjak mungni kókrok sa phano bwkha-o khe khámaimung máng se wngnai.

³²Nwng bórokni thani khoroksa khnathok hamjakmung rwchapmung rwchapnai hai se, khnathok tammung bai khe rwchapnaini khorang hai; tamni hwn ba bórok nwng samano khw le khna-o, tamo khe abo hai khe tong ya.

³³O kókrok nang phai phuru khe; bórokni bisingo khoroksa diyari tongo hwnwi saui mannai.