Read Kok Borok ESEKIEL 34 Bible Online

ESEKIEL 34 - Kok Borok bible

ESEKIEL 34

¹Subraiyung ano hai hwnwi sa kha:

²O borokni bwsa, Israilni tẃiphangrokno kók diyari sa di, Subraiyung Kaitor hai hwnwi sa-o hwnwi bórokno sa di: Norok sakno simi nai lai-o tei merarokno khe chá rwmani kwrwi.

³Norok abuktwi chá-o, buikhumuni rí chumo, mera bupham gwnangno butharwi chá-o, phiya ba norok merarokno chá rwma kwrwi.

⁴Norok kebelrokno phan chuba rw li ya, kulum-kwsarokno naikini khlai li ya, kwsa chaui lengjakrokni kwsano khaui rw li ya, lama korójakrokno kiphil rwui tubu ya, kwmajakrokno rutuk ya, phiya norok bórokno phan bai khe muphunna nai-o.

⁵Mera mwrwknai kwrwini bagwi bórok oroi-poroi wng bai kha tei bolongni yabrwirok bórokno romwi chá kha.

⁶Ani merarok hathái kuchukrogo tei hachukrogo himgurung tong bai kha, bórok ha bai kupulung oroi-poroi wng bai kha, khoroksa phano bórokno rutugwi kariui tubunai kwrwi kha.

⁷“Aboni bagwino norok mera mwrwknairok Subraiyungni kókno khna di.

⁸Ang Subraiyung Kaitor, ani langma bai swmai tangwi sa-o mwrwknai kwrwi wngmani bagwi ani merarok bolongni yabrwirok bai choprojaknai wng kha tei bórokni chámung se wng si-o; ani mera mwrwknairok ani merano rutuk lai li ya, tamo khe merarokno mwrwgwi chá rw yaui bórok simi se chá lai tong si-o;

⁹hakhe norok mera mwrwknairok Subraiyungni kókno khna di.”

¹⁰Subraiyung Kaitor hai hwnwi sa-o, “Ang norokni ari se. Ang ani merarokno norokni yakni segwi tlangnai tei norok bórokni mwrwknai wngwi man glak tei norok sak saknobo naiwi man glak, ang ani merarokno norokni búkhúkni segwi tlangnai tei norok cháui man glak.”

¹¹Subraiyung Kaitor hai hwnwi sa-o, “Nai di, ang sak baithangno ani merarokno rutugwi karinai tei bórokno mwrwknai.

¹²Merarokni bisingo baksa kwmaui tong khe mera mwrwknai bini merano rutukmani hai khe angbo ani merarokno rutugwi karinai tei bórok nokha hamya tei mwnakmani salo bebak ha-o oroi-poroi wngmano ang kiphil rwui tubu bainai.

¹³Ang bórokno buini hani tubu-ui thumsa khe thumnai tei bórokni sakni ha-o bórokno tubunai. Ang bórokno Israilni hachukrogo tei twisa kwthangrogo tlangwi jabra kahamo chá rwnai.

¹⁴Ang bórokno hachuk kahamo tei harungo tei Israil hani jabra kwkhrang tongmarogo tlangwi mwrwgwi chá rwnai tei bórok aro kaham khe rokoui tongwi mannai.

¹⁵Ang sak baithang’-no ani o merarokno mwrwknai tei bórokno lengla rwnai hwnwi Subraiyung Kaitor hai hwnwi sa-o.”

¹⁶Ang kwmajakno rutuknai, lama koróui tongnaino kiphilwi tubunai, dukhu manjakrokni kwsano khachobwi rwnai, ang kebelrokno phan rwui rak rwnai, phan gwnang tei sak kahamrokno sokomornai; ang bórokno sói khe buj thumnai.

¹⁷Hakhe ani merarok, Subraiyung Kaitor hai hwnwi sa-o, “Nai di, ang norokno buj khlainai, kaham bai hamya tei merarok bai punrokno swkaknai.

¹⁸Norok jabra kaham ma cháui asi yókjak ya gwja; norok chá yaui khibiui kabumano khe kádulwi kabu-o, norok twi kwchẃng nungwi ulo khe abono rumu rwui kabu-o.

¹⁹Ani merarok norok kádulmani jabrano ma chánai tei norok twi rumu rwmano ma nungnai.”

²⁰Abo bai, Subraiyung Kaitor bórokno hai hwnwi sa-o, “Nai di, ang sak baithang’-no mera kuphung bai mera keramno buj khlainai.

²¹Tamni hwn ba norok bórokno babaisa khe norwi rohor kha tei norokni bokorong bai chúk yarokno oroi-poroi wng ya sak khaiwi rohor kha.

²²Ang ani merarokno mwthangnai, bórok tei bui bai chájak glak, ang mera bai merano buj khlainai.

²³Ang bórokno naikolwi mwrwkna bagwi ani seleng Daudno chongnai, bo baithang bórokno naikolwi mwrwknai.”

²⁴Ang, Subraiyung norokni Kaitor wngnai tei ani seleng Daud hai bórokni bugra wngnai, ang Subraiyung o kók sa-o.

²⁵“Ang bórok bai tong kwchang tongna kók kha lainai tei hani bebak bolongni kirimasingcha yabrwirokno swkwmanai, hakhe ani merarok panthoro kwchang kwchang khe tongwi mannai tei bolongo thu-ui mannai.

²⁶Ang bórokno hamari rwnai tei ani kwthar hathái[20] kiting tong rwnai. Ang aro bórokno jora phuru-o uatwi rohorwi hamari rwnai.

²⁷Buphangrok bwthái tháinai tei panthoro mai tháinai, bórokni ha-o tong kwchang tongwi mannai, ang bórok khajagwi tongmano khengwi bórokno seleng snamnairokni yakni phiyók khe ang se Subraiyung hwnwi bórok saui mannai.

²⁸Buini dopharok bórokno mechen phai glak tei bolongni yabrwirok bai chájak glak. Bórok kiri-kóró kwrwi khe tongwi mannai, kebo bórokno sikiriui man glak.

²⁹Ang bórokno ha kaham rwnai tei bórok ha-o ok khuiwi ma tong glak. Buini dophani bororok bórokno kusu khe nuk glak.

³⁰Ang Subraiyung bórokni Kaitor, bórok bai tongo tei Israilrok ani borok hwnwi saui mannai hwnwi Subraiyung Kaitor sa-o.

³¹Norok ani mera, ang mwrwkmani merarok, ang norokni Kaitor, hwnwi Subraiyung Kaitor sa-o.”