Read Kok Borok ESEKIEL 35 Bible Online

ESEKIEL 35 - Kok Borok bible

ESEKIEL 35

¹Subraiyung ano hai hwnwi sa kha,

²“Borokni bwsa Idom bwkhak naharwi kók diyari sa di,

³Subraiyung Kaitor hai hwnwi sa-o hwnwi bórokno sa di: Nai di, ang nini ari, Idomni hachukrok! Ang nono kebengwi ani yak pholoknai. Ang nono borok bukcha tei chúk ya khlainai.

⁴Ang nini kamiyungrokno kwbai khe klangnai tei nwng borok bukcha wngnai. Hakhe ang se Subraiyung hwnwi norok saui mannai.”

⁵Nwng Israil bai kwrwngwi ari wngmani Israilrok ur nangwi tongmani jora-o tei bórokni sumsokni bagwi sátokma manẃi tong phuru buthar rw kha.

⁶Abo bai, ang kwthang tong sak, Subraiyung Kaitor hai hwnwi sa-o, “Ang nono butharnai abo nono rwkphrenai, nwng borok butharwi cha ya[21] khlai kha, abo bai thwimung nono rwktharnai.

⁷Ang Idomni hathái kamino borok bukcha khlainai tei ayang tẃi himnairokno bebak butharnai.

⁸Nini hachuk kupulung borokni mang kwthwi pungnai, choba-o butharjaknairokni mangrok nini hatháirogo tei hachukrogo klai tongnai.

⁹Ang nono borok bukcha khlai suknai. Nini kamiyungrogo tei kebo phano tong phai glak. Hakhe ang se Subraiyung hwnwi norok saui mannai.”

¹⁰“Ang Subraiyung Israil tei Judia bai tong phano nwng ‘O ha kainwini bororok tei bórokni ha nini yapha-o klainai tei nini wngnai’ hwnwi sa-o.

¹¹Hakhe ang kwthang tong sak Subraiyung Kaitor sa-o, ‘Nwng jolima, nini risi tei ani bororokno naislermani hai’-no ang nono yagul sunai. Norok bórokno khlaima hai’-no angbo norokno sátok kha hwnwi saui mannai.

¹²Hakhe norok Israilni hachukrokno bórok bukcha khlaijak kha tei abórokno chwngno monoknani yapharjak kha, hwnwi kul laimani kókno Subraiyung khna kha hwnwi norok saui mannai.’

¹³Norok ano kebengwi sak sakno torjagwi kók kwbáng sa laima ang khna kha.”

¹⁴Subraiyung Kaitor hai hwnwi sa-o, “Ang nono aswk khe borok bukcha khlainai swngcharni jotono abono khnaui tongthoknai.

¹⁵Norok Israilrokno komorma nugwi tongthokmani hai khe angbo norokno abo hai khlainai. Seir hachukrok tei bebak Idom borok bukcha wngnai. Hakhe ang se Subraiyung hwnwi norok saui mannai.”