Read Kok Borok ESEKIEL 36 Bible Online

ESEKIEL 36 - Kok Borok bible

ESEKIEL 36

¹Subraiyung hai hwnwi sa kha, “Borokni bwsa, Israilni hachukrokno kók diyari bai Subraiyungni kókno khna di hwnwi sa di.”

²Subraiyung Kaitor hai hwnwi sa-o, Israilni arirok tongthogwi tabuk agini hatháirok chini se wng kha, hwn lai-o.

³Abo bai Subraiyung Kaitor hai sa-o hwnwi kók diyari sa di, buini dopharok phaiwi tanthar-sútharwi borok bukcha khlai kha tei Israilno kók hamya sa lai kha.

⁴Hakhe o Israilni hapung hatháirok ani kókno khna di, hathái kuchukrok, hapungrok, halap haruakrok, ha bukcharok, norokno kitingwi gerepsaui phaiwi norokno sekpronai tei mwnwinai dopharokni kamiyungrok ang Subraiyung Kaitor hai hwnwi sa-o;

⁵Hakhe Subraiyung Kaitor tei kubun dopharokno tei bebak Idomno belai joliui o kók sa-o, bórok tongthogwi tei selengwi ani hano segwi na lai kha.

⁶Aboni bagwi Israilni hano kók diyari sa di, hachukrokno, hatháirokno, twisarokno tei harungrokno Subraiyung Kaitor samani kókno saui di; nai di, Ang belai khe joliui o kók sa-o, kubun dopharok norok mwkhang sókmani bagwi,

⁷Subraiyung Kaitor swmai tangwi sa-o norokno kitingwi tong bainai dopharoknobo ang kulnai.

⁸Hwn ba Israilni hachukrogo ani borok Israilrokni bagwi buphang bwláirok rotomwi bwthái ma thái phinai. Tamni hwn ba norok daktino nogo ma kiphil bainai.

⁹Tamni hwn ba nai di, ang norokni bwkhago tongo, ang norokno ha kiphilwi rwnai tei aro norok bwchlwi ma sarnai.

¹⁰Ang norokni bosongno er rwnai. Norok joto Israilrok, kamiyungrok borok kupulung wngnai tei nok kwbairok tangjak phinai.

¹¹Ang borok tei mal-matarokno er rwnai, norok swkangni slái borok báng kuknai, swkang phuruni hai khe’-no ang norokno tong rwnai, ang swkang phuruni slái teibo norokni bagwi samung kaham khlainai, hakhe ang se Subraiyung hwnwi norok saui mannai.

¹²Ani Israil bororok ang norokni ha-o kiphilwi tubunai, abo norokni ha uansuknai tei norokni chwrairok khe ma chá yaui tong glak.

¹³Subraiyung Kaitor hai hwnwi sa-o, “Bororok sa lai-o norok borok chá-o tei dophani chwrairokno norok khogo.

¹⁴Abo bai norok tei borok cháui man glak tei nini dopharokno chwrairok kwrwi khlai man glak, hwnwi Subraiyung Kaitor sa-o.”

¹⁵Dopharok bai hamya hwnjakma tei khnana nang glak tei nwng bororok bai mwkhang sókjak ya wngnai tei nwng dopharokno kebengwi man glak, hwnwi Subraiyung Kaitor sa-o.

¹⁶Subraiyung ano hai hwnwi sa kha:

¹⁷Borokni bwsa, Israilrok bórokni ha-o tong phuru-o, bórokni tongmani chámani bai abono dera rw-o, bórokni tongmung le khoroksa bwrwi rí súmani jora-o[22] sak kusum wngmani hai se.

¹⁸Hakhe bórok ha-o borok butharmani bagwi tei mwtairok bai bórok deramani bagwi ani jolima bórokni saka-o rohor kha.

¹⁹Bórok tongmani tei samung tangmani tẃi ang bórokno buj thumwi ang bórokno buini ha-o piring-poroi khlaiwi rohor kha.

²⁰Bórok buini ha-o sók phai khe, bórok ani mung kwtharno dera rw kha, tamni hwn ba bororok hai hwnwi sa lai-o, “Omorok Subraiyungni borok se hai phano bórokni hani nongkhorwi ma tháng bai kha.”

²¹Tamni hwn ba ani mung kwtharni bagwi Ang ma chá kha, Israilrok thángma-o’-no mwkhang sók kha.

²²Abo bai Subraiyung Kaitor hai sa-o hwnwi Israilrokno sa di, “Ang khlaina naimani hwn khe norok Israilrokni bagwi ya, norok buini ha-o thángwi ani mungno dera rwmani ani mung kwtharni bagwi se.

²³Norok dopharokni thani-o mung hamya rohormani, Ang dopharokni thani-o ani mung kotor kwtharno phunuknai, hakhe bórok ang se Subraiyung hwnwi saui mannai hwnwi Subraiyung Kaitor sa-o, ang norokni bising tẃi ani mung kwtharno bórokno phunuknai.

²⁴Ang norokno bebak dopharokni tei harokni thumwi tlangwi norokni ha-o kiphil rwui tubunai.

²⁵Ang norokni saka-o twi kwthar sarwi norokni mwtairokni tei norokno dera rwmarokni kwthar khlai suknai.

²⁶Ang norokno bwkha kwtal bai uansukmung kwtal rwnai. Ang norokni bwkha holong haino tlangnai tei norokno kók nanai bwkha rwnai.

²⁷Ang ani pholano norokni bisingo tonwi ani raidarok tei dagimarok tẃi khe him rwnai.

²⁸Hakhe ang norokni chuchusongni thani-o yapharmani ha-o norok tongwi mannai, norok ani borok wngnai tei ang khe norokni Kaitor wngnai.

²⁹Ang norokno dera rwnaini yakni phiyóknai, ang mai-khul kwbángma thái rwnai tei norokni saka-o asari klai glak.

³⁰Ang norokni bwthái buphangrogo tei panthoro kwbángma bwthái báng rwnai, hakhe norokno dopharokni thani-o mwkhang sókmani bagwi tei asari wng glak.

³¹Hakhe norokni samung hamyarok norok muitu mannai. Norokni sumsok tei hamyarok bai’-no tekto ma wngjak bainai.

³²Israil, ang omorok norokni bagwi khlai ya, norok kaham khe saui man di, hwnwi Subraiyung Kaitor sa-o.”

³³Subraiyung Kaitor hai hwnwi sa-o, “Ang norokno bebak norokni sumsokni kwthar khlai phuru, ang norokno norokni kamiyungo tong rwnai tei kamiyung kwbairokno norok ma tang phinai.

³⁴Borok norokni panthor tẃi himnairok ha bukcha klaiwi tongmani ang mairok káiwi rw phinai.

³⁵Bororok ma sa lainai, ‘O ha-o salsa bukcha klai tongmani, tabuk Eden tháiblwng hai se wng kha tei kamiyung yakarjak bukcha tei kwbai khe tongmani tabuk borok kupulung wngwi nok kaham kwrakmarok tangjak kha.

³⁶Hakhe gana-o tong bainai dopharok Ang Subraiyung se kamiyung kwbairokno tang phi kha tei ha bukcharogo tei uáisa bwchlwi kái phi kha, ang Subraiyung o kók sa-o tei ang abo hai khlai phinai.’ ”

³⁷Subraiyung Kaitor hai hwnwi sa-o, “Ang Israilrokno tei uáisa chubachu san rwnai tei ang bórokno mera gut hai khe er rwnai.

³⁸Kamiyungrok tabuk bukcha klaiwi tong phano Jerusalemo yapharmung panda phuru-o merarok yapharjaknani bagwi kupulung tongmani hai khe kamiyungrok borok bai kupulung wngnai. Hakhe ang se Subraiyung hwnwi bórok saui mannai.”