Read Kok Borok ESEKIEL 37 Bible Online

ESEKIEL 37 - Kok Borok bible

ESEKIEL 37

¹Subraiyungni yak ani saka-o, bini phola ano tlangwi bekreng kupulung tongmani harungo ano ton rw kha.

²Bo ano harungo kiting rw kha, nai di, ang oro kwbángma bekreng nuk kha, abórok belai kwran.

³Bo ano hai hwnwi sa kha, “Borokni bwsa, omo bekrengrok thangwi de man phino?” “O Subraiyung Kaitor, nwng simi se saui mano!” hwnwi ang sa kha.

⁴Bo haino hai sa phi kha, “O bekrengrokno kók diyari sa di, o bekreng kwranrokno Subraiyungni kókno khna di hwnwi sa di.”

⁵Subraiyung Kaitor o bekrengrokno hai hwnwi sa-o, “Nai di, ang norokni bisingo rangma rwnai tei norok kwthang wngnai.

⁶Ang norokno phanrok tei bahanrok rwnai tei bukur bai kholopnai tei norokni thani-o ani rangma rwnai tei norok kwthang wngnai. Hakhe ang se Subraiyung hwnwi norok saui mannai.”

⁷Hakhe ang dagijakmani hai khe kók diyari sa kha, ang kók diyari sa phuru khe, ang keche-keche khorang khna kha bekreng bai tei kaisa bekreng chwrap lai kha.

⁸Ang naiwi ba, bekrengrok phan tei bahanrok bai kupulung wng kha tei bukur bai kholopjak kha, hwn ba bórokni bisingo rangma kwrwi kho.

⁹Hakhe bo ano hai hwnwi sa kha, “Thwiblang borok, nwng rangmano kók diyari sa di, Subraiyung Kaitor hai hwnwi sa-o, ‘O nokbar, nwng babaibrwi bwkhakni phai di tei o kwthwirokno thangna bagwi rangma rw di.’ ”

¹⁰Hakhe ang bo dagimani hai khe kók diyari sa kha tei bórokni bisingo rangma phai kha, bórok kwthang wng kha tei bórokni yakung bai bacha bai kha. Aro kwbángma sengkrakrok wng kha.

¹¹Hakhe Kaitor ano hai hwnwi sa kha, “Borokni bwsa, Israil bororok o bekrengrok hai se. Nai di, bórok sa lai-o bórokni bekrengrok ranwi tháng kha tei thangwi mannani chong li ya tei bwskango bo mungsa kwrwi kha.

¹²Hakhe ani Israil bororokno hai hwnwi kók diyari sa di,” Subraiyung Kaitor hai hwnwi sa-o, “Nai di, ang norokni mangkhor phiyoknai tei norokni mangkhorni norokno sochanai tei ang norokno Israil ha-o kiphil rwui tubunai.

¹³Ang norokni mangkhorno phiyok phuru khe tei norokno mangkhorni socha phuru khe, ang se Subraiyung hwnwi norok saui mannai.

¹⁴Ang, ani pholano bórokni bisingo tonnai tei norok kwthang wngnai tei ang norokni ha-o tong rwnai. Hakhe ang Subraiyung o kók sa-o tei abono khlai kha, hwnwi saui mannai; abo Subraiyung sa-o.”

¹⁵Subraiyung ano hai hwnwi sa kha,

¹⁶“O boroksa, buphangni dang kongsa naui aro hai hwnwi swi di, ‘Ha Judani bagwi.’ Aboni yagulo khe tei kongsa dang naui aro khe ‘Josepni bagwi (Ephraimni raidang) tei Israil tei bini bororokni bagwi.’

¹⁷Hakhe nini yago dang kongsa khe nukjakna tẃi a dang kongnwino buchuk bai buchuk khe thepa di.

¹⁸Nini bororok nono ‘Omorok tamo hwnmani abo chwngno phunuk ya da?’ Abo tamo hwnwi sẃng khe,

¹⁹bórokno sa di, Subraiyung Kaitor hai hwnwi sa-o: Nai di, ang Josepni dangno (Ephraimni yakni) tei bini bororok nini aroni naui páina nai tong kha; hakhe tei kongsa Judarokni dang bai thepaui kongnwino kongsa khlaiwi ani yago romnai.

²⁰“Dang kongnwino nini yago romwi tong di, hakhe bororok abono nuk bai thung,

²¹hakhe bórokno sa di, Subraiyung Kaitor hai hwnwi sa-o: Nai di, ang ani Israil bororokno bórok tongwi baimani dopharokni buthup khe thumwi bórokni ha-o kiphil rwui tubunai;

²²ang bórokno o hani Israilni hachugo kaisa dopha snamnai tei khoroksa habugra se bórokni saka habugra wngnai, bórok tei kainwi dopha wng glak tei kainwi ha bo wng glak.

²³Bórok tei mwtairok bai dera rwjak glak tei sumsok bai hamya-o klai glak. Tamo khe ang bórokno bebak bórok sumsok klaimani bórokno sap-sutra khlainai, bórok ani borok wngnai tei Ang bórokni Kaitor wngnai.

²⁴“Ani seleng Daud hai khe bórokni habugra wngnai. Bórokni khoroksano mwrwknai wngnai. Bórok ani raidarok tei dagimarokno kaham khe tẃinai.

²⁵Bórok ani seleng Jakobno rwmani ha-o tei bórokni chuchusong tong langmani ha-o ma tong bainai. Bórok bwsarok tei bwsani bwsarok aro mol brúm brúm tong bainai. Ani seleng Daud hai khoroksa bórokni bugra mol brúm brúm wngnai.

²⁶Ang bórok bai kaisa tong kwchangni bagwi kók kha lainai, abo mol brúm brúmni bagwi wngnai. Ang bórokno hamari rwnai tei bórok er lainai tei bórokni ha-o ani nokthar mol brúm brúmni bagwi tonnai.

²⁷Ang bórok bai tongnai tei ang bórokni Kaitor wngnai tei bórok ani borok wngnai.

²⁸Ani Noktharno bórokni bisingo mol brúm brúm, ton kha, ang se Subraiyung Israilno ani borok snamnani bagwi chong kha hwnwi dopharok saui mannai.”