Read Kok Borok ESEKIEL 38 Bible Online

ESEKIEL 38 - Kok Borok bible

ESEKIEL 38

¹Subraiyung ano hai hwnwi sa kha,

²“Borokni bwsa, nwng Gokno kebeng di, Magogni ha-o, bo wng kha Mesek tei Tubalni bugra; bini bagwi kók diyari sa di.”

³Bono hai hwnwi sa di, Subraiyung hai hwnwi sa-o, ang nono kebengjak, o Gok nwng Mesek bai Tubalni habugra.

⁴Ang nono kiphil rwnai tei nini búkhúgo bichingrok tonnai tei nono bai nini bebak sengkrakrokno sopreui tubunai. Nini sengkrakrok, korairok tei korai kasanairok, abórok bebak chobani chummung chumjak máng, joto sengkrakrok phuirok tei sengrok kupulung tẃi laijak.

⁵Parsia, Sudan tei Libyani bororok bórok bai pal tongo, bórok joto phuirok tei khorok thupmarok tong bai-o.

⁶Gomer tei Bet Togarma hani salsibai bwkhago tongnai joto chobani bororok norok bai pal tongo tei abo hai khe kubun dophani bororokbo tongo.

⁷Bo tei bebak bini sengkrakrok bini kók tẃi tiyar khe tong thung hwnwi bono saui di.

⁸Nono chobani manwirok nanani ringjak anw. Thinangni bisirogo chobani tẃi khe phiyókjak hano nwng nangnai, a ha-o kwbángma dophani kwbángma bororok kuthumma a Israilni hathái-o, abo bisi kwbángma bukcha tongmani. Bórok dopharokni aroni tubujakmani tei bórok tabuk aro kwchang khe tongo.

⁹Nwng tei bebak nini sengkrakrok tei nwng bai baksa kwbángma dopharok yapri swkangwi nokbar hai khe thángnai; nwng a hano chumui kobol tẃi khe kobolnai.

¹⁰“Subraiyung Kaitor hai hwnwi sa-o: a salo nini bwkha-o omo hai chongjaknai tei nwng kaisa hamya chapnai.

¹¹Nwng hai hwnwi sanai, ‘Ang chokdeual kwrwi kamirokno seknai; tong kwchang tongnairokno swpraknai tei uansugwi man ya bororokno bo swpraknai, bórok bebakno deual kwrwi tei duglam kwrwi tei koton kwrwi-o tong bai-o.’

¹²Salsa kwbai khe tongmani kamiyungrogo bororok tong laimano nwng tanthar-súthar khlai baiwi segwi tlang bainai. Bórok kubun dopharokni kuthum laiwi tabuk mal-matarok núkhungni manwi-khwnwirok gwnang wng bai kha tei bórok tabuk ha kwcharo tong lai-o.

¹³Seba bai Dadanni bororok tei Tarsisni bepar thwngnairok tei kamirogo tongnairok norokno hai hwnwi sẃngnai, ‘Norok segwi nanani bagwi de phai? Sekmani manwirok, rangchak, rukphai, mal-matarok, manwi-khwnwirokno tlangnani bagwi nini sengkrakrokno thum kha de?’

¹⁴“Aboni bagwino borokni bwsa, Subraiyung Kaitor hai hwnwi sa-o, hwnwi Gokno kók diyari sa di, ‘Ani Israil bororok tong kwchang tong phuru, nwng tungphlanai.’

¹⁵Jotono korai saka-o kasa laijak khe nwng tei nini bororok salsibai bwkhakni nini thani phai anw.

¹⁶Nokbar kotor ha kolobwi phaimani hai khe nwng ani Israil borokni saka-o phai anw. Aboni ulni salrogo ang nono ani hano segwi mannai, hakhe Gok nini bising tẃi ani kwthar tongmungno bórokno phunuk khe dopharok ano saui mannai.

¹⁷Subraiyung Kaitor hai hwnwi sa-o: Nwng wng kha ang sal kwbángma swkang ani selengrok, Israilni diyarirokni khúk tẃi khe bwskangni salo Israilrokno choproknai tubunai hwnwi kók diyari samani abo se.”

¹⁸Subraiyung Kaitor hai hwnwi sa-o, “Gok Israilno sek phai phuru khe, ang belai jolinai.

¹⁹Ang belai khe joliui sakhlai-o, a salo Israil ha-o bangla kotor wngnai.

²⁰Bebak árok, tokrok, yabrwirok, malnairok ha saka-o tongnai bebak bororok ano kiriui ma kwlwi bainai. Hachukrok kuagwi klainai, holong kuchukrok báiwi klainai tei bebak chokdeualrok báiwi klai bainai.

²¹Ang Gokno podrepot sikirimung bai khe sikirinai hwnwi Subraiyung Kaitor sa-o. Borok matheno tei khoroksa bini takhukno kebengwi seng tisanai.

²²Ang bono bemuk hamya tei thẃi kochok rwma bai khe sátoknai. Bini bwkhago tongnai kwbángma dopharok bini sengkrakrok tei bini saka-o kwbángma kothorrok, hórjlai tei gwndwkni uatwi lukhlai rohornai.

²³Hakhe ang bebak dopharokno ang se kotor tei kwthar hwnwi phunuknai. Hakhe ang se Subraiyung hwnwi bórok saui mannai.”