Read Kok Borok ESEKIEL 39 Bible Online

ESEKIEL 39 - Kok Borok bible

ESEKIEL 39

¹Subraiyung Kaitor hai hwnwi sa kha, “Borokni bwsa, Gokno kók diyari sa di. Nai di, Mesek tei Tubalni bugra Gok ang nini ari se.

²Ang bono uphil rwui bwskang salsibai bwkhago Israilni hachugo tlangnai.

³Hakhe ang bini yaksi yakni badukhungno tei yagra yakni chakhlano yakni chokhrai rwnai.

⁴Gok tei bini sengkrakrok tei bini palrok Israilni hachugo klaiwi thwi bainai tei ang bórokni kwthwino toksarok tei bolongni yabrwirokno chá rwnai.

⁵Bórok panthoro thwiwi klainai, ang Subraiyung Kaitor o kók sa-o.”

⁶Ang Magogo hór rohornai tei twijlang rukungo tong kwchang tongnairokni thani-o hórjlai rohornai, hakhe Ang se Subraiyung hwnwi bórok saui mannai.

⁷Ani Israil bororokni bisingo ani mung kwtharno si rwnai tei ani mung kwtharno dera rw glak, hakhe dopharok ang se Subraiyung Israilni kwthar Kaitor hwnwi saui mannai.

⁸Subraiyung Kaitor hai hwnwi sa-o, “Nai di, ang samani sal abo kubui’-no phaiwi sók phainai.

⁹Israilni kamiyungrogo tong bainairok nongkhorwi thángwi kwbángma sílai-pathamrokno hóro sóknani bagwi thum laiwi phuirok, badukhungrok, chakhlarok, koslurok tei mukurrok bai khe bórok bisisni jora hór mwchẃngwi mannai.

¹⁰Hakhe bórok tei panthoro bol thumnani nang glak tei bolongo bo buphang tannani nang glak. Tamni hwn ba bórok bórokni da-sengno sókjaknai bol khlainai. Bórokno tanthar-súthar khe sekpronairokno bórok tanthar-súthar khe sek phinai,” hwnwi Subraiyung Kaitor sa-o.

¹¹Subraiyung hai hwnwi sa kha, “A salo, ang Gokno Israil ha-o twijlangni salka bwkhak berainairokni harungno phobnani ha rw anw. Gok tei bini sengkrakrok aro phobjak bainai. Abo Gokni sengkrakrokni harung hwnjaknai.

¹²Hakhe sap-sutra khlainani bagwi Israilrok bórokno phobnani talsni nang anw.

¹³Hani joto borok bórokno phobnai tei ang kwplai wngmani salo bórok omoni bagwi bórok bórom khlaijaknai,” hwnwi Subraiyung Kaitor sa-o.

¹⁴Talsnini ulo ha-o mang kwthwi klaiwi tongnairokno rutugwi phobnani bagwi borok chongjaknai, hakhe bórok hano sap-sutra khlainai.

¹⁵Hakhe simalwng hakhor khurnairok phai abórokno Gokni sengkrakrokni harungo phobwi manna tẃi, bórok ha gwnangwi kitingwi nai phuru khoroksa swk borokni bekreng nuk khe, bórok aro mari bui klangnai.

¹⁶Aro kamiyung khungsa sengkrakrokni mungwi tongo. Abo hai khe bórok hano sap-sutra khlainai.

¹⁷Subraiyung Kaitor hai hwnwi sa-o, “Thwiblang borok, bebak tokrok tei yabrwirokno, ang bórokni bagwi yapharmung panda khlaimani phainani bagwi ring di, abo Israilni hachugo belai yapharmung panda kotor wngnai, bórok aro phaiwi bahan cháui mannai tei thẃi nungwi mannai.

¹⁸Bórok phan gwnangrokni bahan cháui mannai tei hani tẃiphangrokni bwthẃi nungwi mannai, bórok mera bwsarok, merarok, punrok tei bupham gwnang beresrok hai khe ratharjak bainai.

¹⁹Ang bórokni bagwi tiyar khlaimani yapharmung panda-o tokrok tei yabrwirok ok pung ya sak bupham cháui mannai tei bórok kangmani hamya sak bwthẃi nungwi mannai.

²⁰Ani songphango bórok cháui mansak korairok, korai kasanairok, phan gwnangrok tei sengkrakrokno cháui mannai. Ang phan kwrak Subraiyung omono sa-o.”

²¹Subraiyung hai hwnwi sa kha, “Ang dopharokno ani chẃngsacha phunuknai tei ang bórokni saka-o yak rwui buj thummano bebak dopharok nuknai.

²²Aphuruni simi khe Israilrok, ang se Subraiyung bórokni Kaitor hwnwi saui mannai.”

²³Israilrok ani thani-o sumsok khlaimani bagwi buini ha-o khaui tlangjak bai kha hwnwi dopharok saui mannai. Hakhe ani mwkhang uphilwi bórokni arirokni yago bórokno yaphar kha tei bórok choba-o butharjak bai kha.

²⁴Ang se bórokni manthai sumsok tei sichi-lala tongmani tẃi’-no bórokno rw kha tei bórokni aroni ani mwkhang uphil kha.

²⁵Abo bai’-no Subraiyung Kaitor hai hwnwi sa-o, “Ang tabuk Jakobno phiyógwi tubunai tei Israilni bebak bororokno khairoknai tei ang ani mung kwtharno narwknai.

²⁶Bórok khoroksa phano sikiri-sokoro khlainai kwrwi khe bórokni ha-o tong kwchang tong phuru-o khe bórok ani thani-o hamya tei lachimasingcha samung khlaimarokno pogwi tháng bainai.

²⁷Ang kwthar hwnwi kwbángma dopharokno phunuknani bagwi ang ani bororokno bórokni arirok tongma buini hani kiphilwi tubunai.

²⁸Hakhe ani bororok ang se Subraiyung bórokni Kaitor hwnwi saui mannai, tamni hwn ba ang se bórokno buini ha-o khaui rohor kha, tabuk bórokno thumwi bórokni ha-o kiphil rwui tubu kha, khoroksano phano karwi kabu li ya.

²⁹Ang ani pholano Israilrokni saka-o lukhlaiwi rwnai tei ang bórokni aroni ani mwkhang uphil glak hwnwi Subraiyung Kaitor sa-o.”