Read Kok Borok ESEKIEL 4 Bible Online

ESEKIEL 4 - Kok Borok bible

ESEKIEL 4

¹Kaitor hai hwnwi sa kha, “Nwng, o borokni sajla, it dulsa naui nini bwskango kái di, Jerusalem kamiyungni marino rigwi aro phunuk di.

²Abono sengkrakrok bai kiting di bono kebengwi batham snam di, bono kebengwi lahar snam di, kwrwng sengkrakrokni bagwi nokrok tang di, abono kitingwi chokdeual swbaijaknai sorni manwirokno bedok bai si di.

³Kaisa sorni mairang na di, kamiyung bai nini kwcharo kaisa sorni chokdeual hai khe ton di, kamiyung bwkhago mwkhang khlai di, abo segwi najakmani hai khe phunuk di. Abo hai kheno Israil dophani bagwi mari wngnai.

⁴“Hakhe nwng nini yaksi bwkhak rokoui tong di, ang nini saka-o Israil dophani sátokma klai rwnai, nwng aro rokoui tongmani sal bai baksa nwng bórokni sátokmano ma rujunai.

⁵Tamni hwn ba, ang 390 salno bórokni sátokma bisi bai baksa snamnai, nwng aswk kwdwk Israil dophani sátokma ma rujunai.

⁶Abo pái khe nwng tei uáisa yagra bwkhak ma roko phinai tei Juda dophani sátokma ma rujunai; nokha sal 40 jora bisi sani bagwi salsa khe sátokma ma rujunai.

⁷Nwng Jerusalem sekjakma bwkhak naisik di, nini yago mungsa kwrwi khe, nwng kamiyungni bagwi kók diyari sa di.

⁸Nai di, ang nono khaui ton anw, kamiyung sekjagwi pái ya sak babaisani tei babaisa uphilwi man glak.

⁹“Tabuk nwng kisa gom, barli, kosoi, dal, maichlamrok naui kaisa manwi-o ton di tei abórok bai auan snam di. Nwng nokha 390 sal jora rokoui tong phuru nwng abono chá di.

¹⁰Nwng salo 230 gram chámung se ma chánai tei salo uáisano ma chánai.

¹¹Tei nwng salo uáisa khe khuriknwi se twi ma nungnai.

¹²Nwng borokni bikhi kwran bai hór phnangwi a hóro’-no gomni auangno sógwi bórokni bwskango ma chánai.”

¹³Subraiyung hai hwnwi sa kha, “Abo hai khe Israil bororokno ang buini ha-o béngkhlaiwi rohormani a ha-o ta chá di hwnmano abo hai khe ma chánai.”

¹⁴Hakhe ang hai hwnwi sa kha, “O Subraiyung Kaitor, ang uáisa phano derama-o klai ya kho, ang chwrai phuruni simi tabuksak jora sak sak thwimani tei yabrwirok bai butharjakmarokno uáisa phano chá trwng ya kho tei kusum chámung ani búkhúgo hap ya kho.”

¹⁵“Nai di, ang nono borok bikhino sláiwi musuk bikhi rwnai, a hóro nwng auang snamwi ma chánai.”

¹⁶Bo ano teibo hai hwnwi sa kha, “Borokni sajla, nai di, ang Jerusalemni chámungno mwthaknai, bórok kiri twtwi chámung ma chánai tei bwkha khamwi twi ma nungnai.

¹⁷Bórok chámung-nungmungrok biyal wngnai hwnwi se ang abo hai khlainai, khoroksa bai tei khoroksa cher lai man ya wngnai, bórokni sumsokni bagwi bórokni chámung hai’-no páiwi tháng bainai.”