Read Kok Borok ESEKIEL 40 Bible Online

ESEKIEL 40 - Kok Borok bible

ESEKIEL 40

¹Chwng buini ha-o khajagwi tlangjakmani nokha bisi nwichibani tal yaphangni salchini salo tei Jerusalem sekjakmani nokha bisi chibrwini ulo, Subraiyungni yak ani saka-o ton kha; tei bo ano aro tlangwi tháng kha.

²Imang-mukthango Kaitor ano Israil ha-o tlangwi kaisa hathái hachuk saka-o tonwi rwi kha. Ang aro salgrabai-o kamiyung hai khe nuk kha.

³Bo ano aro tubu kha tei aro ang khoroksa borok pitol hai chẃngsajak nuk kha tei bini yago sujaknai buduk kaisa tongo tei kaisa sujaknai bokongbo tongo tei bo duglamo bachajak.

⁴Hakhe a borok ano hai hwnwi sa kha, “Borokni sajla, nini mokol bai naisigwi nai di tei khunju kaichomwi khna di tei ang nono phunukmarokno kaham khe chongwi nai di; ang nono abórokno phunuknani bagwi se oro tubu-o. Nwng bebak nukmanirokno Israilrokno sakhlai di.”

⁵Ang nuk kha, aro Noktharno kitingwi phataro chokdeual rwjak tongo. A borokni yago kongsa mitar kaithamni sujaknai bokong tongo; tei sujaknaino naui chokdeualno su kha. Abo kebengo mitar kaitham tei uarmani mitar kaitham tei chukmani mitar kaitham ká-o.

⁶Bo salka bwkhago naharjak duglam tẃi bisingo habwi kha tei kálam tẃi saka-o kasaui tháng kha. Tei saka-o sógwi duglamno su-ui nai kha, abo uarmani mitar kaitham tei kaisabo haino uarmani mitar kaitham ká-o.

⁷Duglamni bebak mwrwkma khotol kebengo mitar kaitham tei kosongbo mitar kaitham; duglamni khotol bai tei khotol mitar kaitham kwchar chal lai-o; duglamni hapma khotolrok bebakno kebeng tei kuar baksa, mitar kaitham khe uaro tei mitar kwnwi tei khaksa khe deual rwja tongo. Abo Noktharno naharjak.

⁸Hakhe bo a bisingni hapmani duglamni uarmanobo su kha; abo mitar kaitham ká-o.

⁹Hakhe bo duglamni khotolno su kha abo uarma mitar kaibrwi ká-o tei aboni duglam thonglarok khe mitar kaisa rwja-o. A duglamni mwkhang nokthar bwkhak khe naharjak.

¹⁰Salka bwkhakni duglam gana-o khotol kaitham tongmani bebakno tormani baksa tei kaitham khe tei babaisa bwkhak abórokbo bebakno baksano toro; duglamni thonglarokbo yasa bai tei yasa baksa baksano.

¹¹Hakhe bo hapma duglamno kebeng su kha, abo kaidok tei khaksa mitar ká-o tei lokma simi khe kaiba mitar ká-o.

¹²Mwrwkmani khotol bwskango bukcha, abo chalmani yasa-o chiba sentimitar tei yasa’-obo sentimitar chiba ká-o. Tei yasani khotol bwsa mitar kaitham tei yasanibo mitar kaitham.

¹³Hakhe bo kaisa khotolni uklokni[23] simi tei kaisa khotolni uklokni duglam jora su-ui nai kha, abo mitar chinwi tei khaksa ká-o.

¹⁴Khotol phatarni nokhla páichuk jora sógwi kha, duglamni thongla su-ui nai kha abo mitar kaichi[24] ká-o.

¹⁵Bwskangni hapma duglamni simi phatarni khotol tei bisingni duglam jora nwichiba mitar ká-o.

¹⁶A khotol brúmno phatar phaising bwsa bwsa khe tailamrok tongo tei khotol bai khotol kwcharobo tailamrok tongo, bisingni chokdeualo thonglarok tongo abo khajuri buphangno kosol khe tankhugwi snamjak.

¹⁷Hakhe bo ano duglam tẃi nokhla-o tubu kha, nai di, aro himjaknai lama-o thamchi khotol tongo, aboni bwskango kitingwi himjaknai lama tongo.

¹⁸Himmani lama duglamni bara bachingo abo duglam lokma jora’-no lama khlaijak; omo wng kha kahamni himma lama.

¹⁹Hakhe bo bisingni nokhlani simi phatar tei bisingni nokhla jora su-ui nai kha abo mitar kaibachi[25] ká-o. A borok kainwi duglam chal laimano su-ui nai kha, abo salka bwkhak mitar bachi ká-o tei salsi bwkhakbo aswkno ká-o.

²⁰Hakhe bo phatarni nokhla-o thángmani salsibai bwkhakni duglamno kebeng tei kuar su-ui nai kha.

²¹Lama babainwi-o mwrwkmani khotol kaitham kaitham khe tongo, aboni khotolrok salka bwkhakni duglam bai baksa tor bai-o, abo lokmani mitar kainwichiba tei sentimitar kairachuku phiya kebeng khe mitar kaichitham tei sentimitar sasai ká-o.

²²Khotolni tailamrok, khajuri buphang hai khe tankhugwi snamjakrok salka bwkhakni duglam hai. Kálam kaisni duglam jora kwrwngjak. Hapmani khotol khe nokhla phaising naharjak.

²³Salsibaini duglami twi khe tei kaisa duglam abo bisingni nokhla jora sógwi-o abo salkabai-o tongmani haino, salka bwkhak. Bo duglam kaisa bai tei kaisa duglamno su-ui nai kha abo mitar kaibachi ká-o.

²⁴Aboni ulo bo ano salgrabai bwkhak tlang kha, salsi bwkhak naharjak tei kaisa duglam nuk kha, bo duglam tei thonglano su kha, abórokbo kubunrok bai baksano.

²⁵Aro kitingwi kubunrokni haino tailamrok tongo duglam kosong lokmani khe mitar nwichiba tei kebeng uarmani khe mitar kaichinwi kwchar ká-o.

²⁶Aro kálam kaisni duglam jora kwrwngjak tongo, hapmani a khotol kotor khe lama tei nokhla phaising naharjak. Aboni chokdeual bai lama tankhugwi khajuri buphang hai snamjak.

²⁷Aro bisingni nokhla’-obo salgrabai bwkhak naharjak duglam tongo; bisingni duglamni simi salgrabaini phatarni a duglam jora mitar kaibachi wng kha.

²⁸Hakhe bo ano salgrabaini duglam tẃi khe bisingni nokhla-o tubu kha, bo salgrabaini duglamno su kha, abo kubun duglamrok bai baksano wngo.

²⁹Aroni duglamni mwrwkmani khotolrok, kitingjak bisingni khotolrok tei kubunrok bai baksano lokma khe mitar nwichiba tei uarma khe mitar kaichinwi kwchar.

³⁰Aroni hapmani khotol abo kosong lokmani khe mitar nwichiba tei kebeng lokmani khe mitar kaichinwi kwchar wngo.

³¹Aroni hapma duglamni khotol kotor khe phatarni nokhla bwkhak naharjak, tankhugwi khajuri buphang hai khe aroni thongla snamjak tei kálam kaichar duglam jora tongo.

³²Hakhe bo ano salka bwkhak naharjak bisingni khotolo tubu kha; tei bo duglamno su kha, abo tei kubunrok bai baksano wngo.

³³Aroni mwrwkma khotol, khotol kotor tei bisingni khotolrokno su kha, abórok bebak tei kubunrok bai baksa mángno. Aro kitingwi lama tei tailamrok tongo. Abo kosong lokmani khe mitar nwichiba tei kebeng uarmani khe mitar kaichinwi kwchar wngo.

³⁴Khotol kotor khe phatarni nokhla bwkhak naharjak. Aro tankhugwi khajuri buphang hai thongla snamjak. Kálam kaichar duglam jora tongo.

³⁵Hakhe bo ano salgrabaini duglamo tubu kha, bo abono su kha abo tei kubunrok bai baksa wngo.

³⁶Aro mwrwkmani khotolrok, duglamni thonglarok naithok khe snamjak, bisingni khotol, khotol kotor tei kitingwi tailamrok tong bai-o, abo kosong lokmani mitar nwichiba tei kebeng uarmani mitar kaichinwi kwchar wngo.

³⁷Khotol kotor phatarni nokhla bwkhak naharjak. Yang yang tankhugwi khajuri buphang hai khe snamjak tei kálam kaichar duglam jora tongo.

³⁸Aro duglamni thonglani samo hapmani duglamo kaisa khotol tongo, aro sógwi yapharmano twi bai sújago.

³⁹Aroni khotol kotoro hapma duglamo kainwi kainwi khe songphang tongo. Aro babaisa-o kainwi tei babaisa-o kainwi aro’-no sógwi yapharmarokni sumsokni yapharmani tei samung hamyani bagwi yapharmani muirokno ratharjago

⁴⁰Nokni phatar bwkhakni khotolo abo salsibaini hapma duglam jora sógwi-o, aro kainwi songphang tei yasa bwkhakbo kainwi songphang tongo.

⁴¹Aro hapma duglamo kaibrwi songphang tongo tei kaibrwi khe tei babaisa bwkhak; bebagwi kaichar songphang tongo; bórok aro yapharmungrok rathar lai-o.

⁴²Aro holong bwlapni rajak songphang kaibrwi snamjak sógwi yapharnani bagwi tonjak, abo sentimitar kaibachi kuchuk, sentimitar kaisnichidok saka-o subrwi khe snamjak, yapharmung ratharjaknai manwirokno tei sógwi yapharmarokno aro tono.

⁴³Bisingo khe bichingrok muksa kolok khe kitingwi thepajak; yapharmani muihanrokno aro songphango tono.

⁴⁴Bisingni phatarni khotolrok khe rwchapnairokni bagwi, bisingni nokhla-o khotol kainwi tongo, kaisa salsibai duglam gana-o salgrabai bwkhak naharjak tei kaisa khe salgrabai duglam gana-o salsibai bwkhak naharjak.

⁴⁵Hakhe bo ano hai hwnwi sa kha, “Salgrabai bwkhak naharjak khotol khe noktharo samung tangnani barja manjak ochairokni bagwi se.

⁴⁶Salsibai bwkhak naharjak khotol khe háyá-o samung tangnai ochairokni bagwi. Omorok bebak ochai Jadok bosongni se, bórok simi se Lebirokni bisingo Subraiyungno monnani bagwi bini bwskango phaiwi mano.”

⁴⁷Hakhe bo bisingni Noktharni nokhlano su kha, abo kebengo mitar kaibachi tei kosongbo mitar kaibachi ká-o tei busup subrwi tei háyá khe Noktharni bwskango.

⁴⁸Hakhe bo ano noktharo hapmani khotolo tubu kha, bo aroni hapmano su-ui nai kha, abo mitar kainwi kwchar ká-o abo kebeng khe mitar kaisni[26] ká-o tei babainwi bwkhago khotol kaisa kwchar mitar ká-o.

⁴⁹Kálam duglam jora thángjak, nokhla kosong lokmani mitar kaichi tei kebeng lokmani mitar kaidok, duglam hapmani-o kainwi thongla, babaisa-o kongsa tei babaisa-o kongsa khe tongo.