Read Kok Borok ESEKIEL 41 Bible Online

ESEKIEL 41 - Kok Borok bible

ESEKIEL 41

¹Hakhe bo ano noktharni khotol bisingo tubu kha tei duglamni babainwini thonglano su-ui nai kha, babainwini thonglano mitar kwtham[27] ká-o, noktharni uarma aswkno.

²Abo hapmani lama kebeng mitar kaiba wngo, hapma duglamni khotol mitar kwnwi kwchar, babainwini khotol mitar kwnwi kwchar ká-o, bisingni khotol khe mitar kainwichi ká-o tei kebeng khe mitar kaichi ká-o.

³Hakhe bo bisingno thángwi duglamni thonglarokno su kha, abo kologo mitar kaisa tei kebengo khe mitar kaitham wngo tei bisingno khotol rwjamani mitar kaitham kwchar ká-o.

⁴Bo khotolni kosongno su-ui nai kha abo mitar kaichi tei nokthar láiwi uarmabo mitar kaichi. Hakhe bo ano hai hwnwi sa kha, “Omo wng kha jotoni slái kwthar kuk.”

⁵Hakhe bo noktharni chokdeualno su-ui nai kha, abo rwjamani kwtham mitar ká-o, nokthar kitingwi khotol bwsarok tongo, abo kebeng lokmani kwnwi mitar wngo.

⁶O gana sederjak nokni khotolrokni nok kaitham kaisa saka tei kaisa khe malaktham ká-o, kaisa kaisa-o thamchi khe khotol tongo. noktharni phatarni deual khe tolani slái rwja wng ya, hakhe khotolrok yóngmal kwrwino kwchaui tongwi mano, tamo khe noktharo le khajak wng ya.

⁷Tei omo hai kheno noktharni chokdeualno phataro tongwi naharwi nai khe, saka jora rwjamani baksa kheno nukjago, noktharni phatarni deual tẃi khe phatarni khotolrogo kainwi kuar khe kálam snamjak, hakhe tolani khotolni kwcharo tei sakani khotolrogo thángwi mano.

⁸Ang teibo nuk kha, noktharno kitingwi’-no nokhla tongo, abo kebengo kaisa kwchar mitar, khotolni thong chukmani kwtham mitar ká-o.

⁹O khotolni phatarni deual rwjamani khe, kwnwi kwchar mitar ká-o tei noktharni yang yangni bára nokhla khe kwnwi kwchar mitar ká-o.

¹⁰Tei a abórokni kwcharo noktharno kitingwini khotolrokni deual rwjamani kebeng khe mitar kaichi ká-o.

¹¹Bara bachingni khotolrok haino phiyokjak, duglam kaisa khe salsibai bwkhak tei kaisa khe salgrabai bwkhak yang yangni a bukcha tongma khe mitar kaichi ká-o.

¹²Nokthar bwkhak naharjak salthángbaini nok kosong lokmani mitar brwichiba ká-o tei kebengo khe mitar thamchiba ká-o, nokni deual rwjamani bebak kitingwi mitar kainwi kwchar wngo.

¹³Hakhe a borok noktharno tei nokhlano su kha, abo mitar kaibachi kolok, noktharni uklokni simi chokdeual jora mitar kaibachi ká-o.

¹⁴Noktharni salka bwkhakni kebeng tei nokhla khe mitar kaibachi ká-o.

¹⁵Hakhe bo nokhlani bwkhak naharjak saltháng phaisingni nokno tei chokdeualni babainwino su-ui nai kha, abo mitar kaibachi ká-o. Noktharni habwi manjak gramani khotol, kwthar khotol tei kwthar kuk khotol. Noktharo hapmani khotol. Kwthar khotol tei jotoni slái kwthar kuk khotol.

¹⁶Abórok bebak tailamrok buphang bai snamjak. Abono karwi hani simi tailam jora nokthar kitingwi buphang bai snamjak. A tailamrokno kholobwi mano.

¹⁷Noktharni bisingni deual, abo duglamrokni slái kuchuk tei tankhugwi bwthái snamwi rwjak.

¹⁸Abo cherub tei khajuri buphang hai snamjak tei cherub bai cherubni kwcharo khajuri buphang, cherub thwgwino mwkhang kainwi khe tongo.

¹⁹Babaisa borokni mwkhang khe khajuri buphang phaising naharjak tei babaisa bwkhago khe singhoni mwkhang khajuri buphang phaising naharjak. Nokthar kitingwi abo hai khe snamwi rwjak.

²⁰Hani simi dugarni saka jora cherub tei khajuri buphang snamjak.

²¹Duglamni thonglarok bebak kebeng bai kosong baksano. A kwtharni duglamni thonglarok khak brwi. Kwthar kuk khotolo hapmani bwskango kaisa.

²²Buphangni háyáno kosol tongo. Abo muktham kuchuk, kosong muknwi tei kebeng muknwi, aboni noksuni thongla, aboni yakung tei aboni nugul bebak buphangni snamjak. Bo ano hai hwnwi sa kha, “Omo Subraiyungni bwskango tongmani songphang se.”

²³Nokthar bai kwthar khotolni kainwi duglam tongo. Duglam kaisa abo kwthar khotolo sógwi rw-o tei kaisa duglam khe kwthar kuk khotolo sógwi rw-o.

²⁴A duglam kainwi kholopjaknai gwnang uang-sa khe kwcharo phiyogwi mano.

²⁵A kwthar nokni dugarrok khe cherub tei khajuri buphang bai mangtang snamjak bai khopjak, abo hai khe’-no deualrogo snamjak; nogo hapmani duglamo khe buphangni kholopjaknai gwnang.

²⁶A nokni yang yango tailamrok tongo tei deualrok bebago’-no khajuri buphang snamjak.