Read Kok Borok ESEKIEL 42 Bible Online

ESEKIEL 42 - Kok Borok bible

ESEKIEL 42

¹Hakhe bo ano phatarni nokhla-o tlangwi, salsibai bwkhak noktharni nokhlani tei babaisa bwkhak, abo salsibai bwkhakni nokni tei babaisa bwkhago klai-o.

²Salsibai bwkhago tongnai nok kosong lokmani muk sara tei kebeng lokmani mukbachi ká-o.

³Babaisa khe bisingni nokhla muknwichi abo noktharni gana-o tei kaisa khe phatarni lama bwkhak naharjak, abo kaitham tola-o khe theka-theka yakhili snamjak.

⁴Nokni bwskango bisingo thángmani lama tongo abo kebeng uarmani mukchi tei kosong lokmani khe muk sara, abórokni duglam khe salsibai bwkhago se.

⁵Sakani nok khe kwcharni tei khámani nokni slái khochor kugo, tamni hwn ba theka-theka yakhili snamjakmani bai abórokni slái kisa kwchalo tonjak kha.

⁶Khotolrok sakani nogo máng se, abórok khámani nok hai khe tei kwcharni hai khe thongla bai sungchajak kwrwi.

⁷Phatarni khotol bai baksa khe deual snamjak abo mukbachi ká-o.

⁸Phatarni khotolrok khe kosongo mukbachi tei noktharni tei babaisa bwkhakni khe muk sara ká-o.

⁹O khotolni tola-o salka bwkhak kaisa phatar bwkhak duglam tongo, a duglam tẃi khe bisingo habo.

¹⁰Noktharni salgrabai bwkhago, saltháng bwkhakni nok bai chal tha ya aro khungsa nok tongo tei aboni khotolrok tongo.

¹¹Abo khotolrokni bwskango salgrabai bwkhakni hai khe kaisa lama tongo. Abo kosong bai kebeng lokmani baksano tei naithokma kaisa duglam bo baksano.

¹²Salsibaini khotolo hapma duglamo salka bwkhago kaisa duglam chokdeual kwrwng lai thani-o tongo.

¹³Bo ano hai hwnwi sa kha, “Salgrabaini tei salsibaini o khotol khungnw-nwi’-no kwthar máng se, aro’-no ochairok Subraiyungni bwskango kwthar kuk yapharmung yapharma a kwthar chámungno chánai; tamni hwn ba kwthar kuk bwthái bwchlwi yapharma, sumsokni yapharmarokno tei samung cha yani yapharmarokno oro tonnai, tamni hwn khe o khotol wng kha kwthar kuk.

¹⁴Ochairok kwthar khotolo hap khe Subraiyungno mon phuru rírok chummano phataro thángna phuru khe aro khotol kwtharo’-no klangwi ma thángo. Bórok kubun rírokno chumui se bororok tongmani-o ma thángo.”

¹⁵A borok nokthar bisingo su baiwi pái khe bo ano salka bwkhakni duglam tẃi tlangwi phatarno su rw phi kha.

¹⁶Bo sujaknai buduk bai khe salka bwkhakno su kha, abo muk ba-ra wng kha.

¹⁷Hakhe bo uphilwi salsibai bwkhakno su phi kha, abo muk ba-ra ká-o.

¹⁸Hakhe bo salgrabai bwkhago su kha, abo muk ba-ra ká-o.

¹⁹Hakhe bo saltháng bwkhago su kha, abo muk ba-ra ká-o.

²⁰Bo babaibrwino su kha abono kitingwi chokdeual tongo abo kosong muk ba-ra tei kebeng muk ba-ra ká-o, hakhe abo kwthar bai bánglano swkago.