Read Kok Borok ESEKIEL 43 Bible Online

ESEKIEL 43 - Kok Borok bible

ESEKIEL 43

¹Aboni ulo a borok ano salka phaisingo naharjak duglamo tubu kha.

²Nai di, Israilni Kaitorni chẃngsachano ang salka bwkhakni phaimani nuk kha. Bini khorang twi kwbángma kutukmani khorang hai tei bini chẃngsacha bai ha kwchẃngma wng kha.

³Bo Jerusalemno sokomorna hwnwi phai phuru-o nukmani hai khe se ang omono nuk kha tei twima Kebar rukungo nukmani hai se, hakhe ang ha-o naikhlaiwi mwkhang bomson kha.

⁴Subraiyungni chẃngsacha salka bwkhak naharjak duglam tẃi khe bisingo habwi tháng kha.

⁵Subraiyungni phola ano tisaui tlangwi bisingni khotolo tubu kha tei nokthar bisingo Subraiyungni chẃngsacha bai kupulung wng kha.

⁶A borok ani gana-o bachaui tong phuru-o noktharni khoroksa borok ano kók saui tongmano khna kha.

⁷Bo ano hai hwnwi sa kha, “Borokni bwsa, omo se ani achukthayung tei ani yakung bera thai. Ani Israil bororok bai ang mol brúm brúm oro tongnai. Ani Israil bororok eba bórokni habugrarok kubun mwtairokno khulumui tei bórok habugrarokni mang kwthwino oro phobwi ani kwthar mungno tei dera rw glak.

⁸Habugrarok ani duglam gana-o bórokni duglam tei ani duglamni thonglani gana-o bórok duglamni thonglano tono, kaisa deual simi se ang bai bórok kebeng laijak. Bórok samung hamyarok kwbángma khlaiwi ani mung kwtharno dera rw kha, hakhe ang joliui bórokno ma sokomor kha.

⁹Tabuk bórok kubun mwtairokno khulumma mwthaknai tei habugrarokni kwthwi mangno ang bai hakchalo ma nornai, hakhe se ang bórok bai mol brúm brúm tongnai.”

¹⁰Subraiyung hai hwnwi teibo sa kha, “Borokni bwsa nwng khe Israilrokno nokthar tei aboni chongjakmarokno sa di tei kaham khe nai di. Bórok sumsokni samungrok bai lachi rw di.

¹¹Hakhe bórok aswk samung khlaimarokno lachi khe, noktharni bagwi chongmarokno bórokno swbaiwi sa di: abo bahai khe khlaijak, phataro nongkhormani, bisingo hapmani, aboni goron tei aroni raidarok tei kerongrokno bórokno saui khna rw di, bórokni bwskango abono swiwi di, hakhe bórok bebak raidarok tei kerongrokno kaham khe tẃiwi mannai.

¹²Omono noktharni raida. Bebak amchoi kitingwi hachukni bokhorok jora belai khe kwthar.”

¹³Sujaknai buduk bai khe háyáno sumani omo hai. Abo muksa kuchuk tei muksa kebeng tei aboni gana kitingwi sentimitar kainwichiba a háyá kuchuk.

¹⁴Sakani simi yaphang jora muknwi ká-o tei kebeng khe muksa, bethep kotoini simi bethep kotor jora muknwi kuchuk tei kebeng khe muksa.

¹⁵Tei sakani háyá khe mukbrwi tei háyá saka phaising naharjak mukbrwi ká-o aro tei muksa kuchuk tei busup subrwi.

¹⁶Tei háyá kosong bai kebengo mukchinwi tei busup subrwino baksa wngnai.

¹⁷Bethep rwmani abo kebeng kosong baksa wngnai, mukchibrwi kosong tei mukchibrwi kebeng tei bugurungo khe khulasa wng anw, abo kitingwi muksa wng anw, aboni yakálam khe salka bwkhak naharjak wngnai.

¹⁸Subraiyung ano hai hwnwi sa kha, “Borokni bwsa, Subraiyung Kaitor hai hwnwi sa-o, sógwi yapharmung yapharmani tei aboni saka-o thẃi sarnani bagwi o háyáno tangjakmani salo omo hai háyáni bagwi raida wngnai,

¹⁹Subraiyung Kaitor hai hwnwi sa-o, ‘Nwng Jadok bosongni Lebi bosongrokni ochairok ano monnani bagwi ani bwskango phainairokno sumsokni bagwi musuk chwla masa yaphar di.’

²⁰Nwng aro thẃino kisa naui háyáni bokorong kong brwi-o tei busup subrwi-o, betheprokni busu-o lukhlai rwui háyáno súchaui sumsok kwrwi khlai di.

²¹Nwng a sumsokni bagwi yapharmani musuk chwlano tlangwi abono noktharni phataro kwrẃngsa chongwi tonjago tlangwi sógwi ma rwnai.

²²Tei nwng salnwini salo sumsokni bagwi khait kwrwi punjua masa naui ma yapharnai, musuk chwla bai khe súchamani hai kheno háyáno ma súcha di.

²³Nwng abono súcha baiwi pái khe khait kwrwi musuk chwla masa tei gutni mera bwsa masa khait kwrwino ma yapharnai.

²⁴Nwng abórokno Subraiyungni bwskango ma yapharnai tei ochairok abórokni saka-o sóm sarwi abórokno Subraiyungni bagwi sógwi yapharmung yapharnai.

²⁵Abo hai khe hati barsa sal brúm nwng sumsokni bagwi pun masa ma yapharnai tei khait kwrwi musuk chwla masa tei gutni mera bwsa masa ma yapharnai.

²⁶Nokha salsni bórok háyáno ma súchanai tei kwthar ma khlainai tei sakno kwthar khe ma yapharnai.

²⁷A salrok lái khe salchar salni simi khe ochairok háyá saka-o norokni sógwi yapharmungrok tei khakchang yapharmungrokno yapharnai, hakhe ang norokno yachaknai hwnwi Subraiyung Kaitor sa-o.”