Read Kok Borok ESEKIEL 44 Bible Online

ESEKIEL 44 - Kok Borok bible

ESEKIEL 44

¹Hakhe bo ano noktharni salka-o phatarni duglamo tlang kha. A duglam kholopjak kha.

²Subraiyung ano hai hwnwi sa kha: O duglam kholopjak kheno tongnai, abo phiyokjak glak, borok khoroksa phano abo tẃi ma hap glak, tamni hwn ba Subraiyung Israilni Kaitor o duglam tẃi hap kha. Abo bai omo kholopjagwino tongnai.

³Habugra simi se Subraiyungni bwskango chánani bagwi aro achuknai. Bo o duglamni nuka tẃi khe bisingo hapnai tei o lama tẃi’-no phataro thángnai.

⁴Hakhe bo ano salsibai bwkhakni duglam tẃi noktharni bwskango tubu kha tei ang nuk kha, Subraiyungni chẃngsacha bai nokthar kupulung wng kha, hakhe ang mwkhang ma bomkhlai kha.

⁵Subraiyung ano hai hwnwi sa kha, “Borokni bwsa ang nono Subraiyungni noktharni raidarok tei kerongrokni kók samano kaham khe nini mokol kaichomwinai di tei kaham khe nini khunju bai khna di, kaham khe muitu khlaiwi narwk di, sabo saborok o noktharo habwi mannai tei saborok habwi man glak.”

⁶Tei kebengnai Israil núkhungni bororokno hai hwnwi saui di, “Subraiyung Kaitor hai hwnwi sa-o, o Israilrok, norok aswk selengmasingcha samung hamya khlaimani thak si di.”

⁷Norok buini hani bororokno tei bwkha-o tei bahano sakur rajak yarokno ani noktharo ton rwui tei ani noktharni kwtharno dera rw kha, norok ano chámung bupham tei thẃirok yaphar kha. Norok bebak samung hamya khlaiwi ani swmaino swbai kha.

⁸Norok ani yapharma manwi kwtharrokno kaham khe nai li ya, hwn ba norok buini hani bororokno se ani nokthar nainai chong lai kha.

⁹Abo bai Subraiyung Kaitor hai hwnwi sa-o, “Israil bororokni bisingo tong bainai buini hani bororok bwkha tei bahan o sakur rajakyarok, buini hani borok khoroksa phano ani noktharo habwi man glak.”

¹⁰Phiya ba Israilrok ani lamano koróui tei ano yakarwi kubun mwtairokni thani-o tháng bai phuru-o ang bai hakchalo thángnai, aphuru khe Lebirok bórokni majrano ma ruju bainai.

¹¹Bórok ani noktharo monnai, nokthar tei duglamrokni barja wngnai, bororokni wngwi bórok sógwi yapharmung tei ratharwi yapharmarokno ratharnai tei bororokni wngwi monnani bagwi bórokni bwskango bachanai tei monnai.

¹²Tamni hwn khe bórok bórokni takjak mwtairokni bwskango monwi Israilrokno sumsogo khiklai kha tei cha ya khlaiwi Israil bosongno kebengnai wng kha. Abo bai’-no ang Subraiyung Kaitor swmai tangwi hai hwnwi sa-o, bórok sátokma mannai.

¹³Bórok ochai wngwi ano monnani gana-o phaiwi man glak, eba bórok ani manwi kwtharrokni gana-o tei ani manwi kwthar kukni gana-o phaiwi man glak. Bórokni lachimano bórok’-no ma rujunai, tamni hwn ba bórok samung hamya khlai kha.

¹⁴Hai phano ang bórokno noktharni bebak samungo tei khlaithai samungrokno khlainani bagwi chongnai.

¹⁵Subraiyung Kaitor hai hwnwi sa-o, “Jadok bosongni ani Noktharni barja tongnai Lebini ochairok Israilrok ano yakarwi lama koróui tháng bai phuru-o, bórok ano monnani bagwi gana-o phainai tei thẃi bai bupham ano yapharnai, hwnwi Subraiyung Kaitor sa-o.

¹⁶Bórok simi ani noktharo hapnai tei ani songphang gana-o phaiwi ano monnai tei ani berma barjano ma tẃinai.”

¹⁷Bórok duglam tẃi khe bisingni khotolo hap phuru khe tei nokthar bisingo samung khlai phuru lilonni rí ma kannai, bórokni sago buikhumuni rírok ma ton glak.

¹⁸Bórokni bokhorogo lilonni rí bai khorok ma sornai tei lilonni rí ma kannai tei bórok bwchango mungsa ma kha glak.

¹⁹Lukurok tongmani phataro bórok thángna phuru khe bórok chummani rírokno khugwi nok kwthar bisingo ma klangnai tei bórok kubun rírokno ma chumnai, lukurokni hamya wng ya tẃi khe bórokni rí kwtharrok bai lukurokni thani-o tháng yaui tei kubun rírok bai ma thángnai.

²⁰Ochairok bórokni bokhorokbo ma siljak glak bwkhnai bo kolok khe ma tong glak, bórok bokhorokni bwkhnai ra rwui ma tonnai.

²¹Ochai bisingni khotolo hap phuru khe arak nungwi man glak.

²²Bórok randijwk brwi bai eba kak laijak bwrwi bai káijak man glak, hwn ba Israilni bwrwi sikla khoroksa bai se káijak mannai eba khe ochaini bihik randijwk bai káijak mannai.

²³Ochairok ani bororokno buboba kwthar buboba kwthar ya abo ma phrwngnai tei buboba sap-sutra buboba sap-sutra ya abo ma phunuknai.

²⁴Mungsa swkno tẃiwi kók báng lai khe ochairok buj ma khlainai tei bórok ani raida-o tongma hai khe buj ma khlainai. Bórok bebak ani raidarokno tei kerongo tongmani hai terrok ma khlainai tei bórok ani Sabatno kwthar ma khlainai.

²⁵Ochairok borokni mang kwthwirokno tangwi sakno kwthar ya ma khlai glak; tamo khe buma eba bupha, sajwk eba sajla takhuk eba khe sikla hanokno tangwi kwthar ya wngwi mano.

²⁶Bo sak kwthar wng khe bórok bini bagwi nokha salsni ma lekhanai, aboni ulo se bo kwthar wng phinai.

²⁷Bo nokthar bisingo samung tangnani bagwi bisingni khotol kwtharo hap phuru khe, bo kwthar wngnani bagwi sumsok yapharmung ma yapharnai, hwnwi Subraiyung Kaitor sa-o.

²⁸Ochairok mungsa ha banta man glak, ang se bórokni banta. Norok Israilrokni bisingo bórokno mungsa manthai ma rw glak, ang se bórokni manthai.

²⁹Bórok mairok yapharma, sumsok yapharma, samung cha yani bagwi yapharmarokno ma chánai tei Israilrokni bisingo ano yapharmani bebakno bórokni wngnai.

³⁰Bebak bwtháini tháikrarok tei norokni bebak manwi yapharma manwirok, bebakno ochairokni máng wngnai. Norok mai kwtal chámano ochairokno ma rw granai, abo hai khlai khe nini núkhungo hamari sók phainai.

³¹Ochairok tok eba yabrwirok sak sak thwimani eba yabrwirok bai uátharjak muino ma chá glak.