Read Kok Borok ESEKIEL 45 Bible Online

ESEKIEL 45 - Kok Borok bible

ESEKIEL 45

¹Norok ha banta na lai phuru khe, Subraiyungni bagwi kwthar banta kaisa ma narwknai. Abo kosong lokmani muknwichiba-sai tei kebengo muknwichi-sai ma wngnai. Aboni kitingwi bebak ari jora kwthar wngnai.

²Aboni bisingo busup subrwi khe muk ba-ra, muk ba-ra khe noktharni bagwi wngnai tei aboni phataro mukbachi khe nokhla kitingwi ma tongnai.

³Kwthar amchoini bisingo nwng kaisa muknwichiba-sai kosong tei mukchi-sai kebeng nokthar tei khotol kwthar kuk ma tonnai.

⁴Abo ha-o kwthar kuk wngnai tei abo noktharo Subraiyungno monnai ochairokni wngnai, aro bórokni nok wngnai tei nokthar bo tongnai.

⁵Tei kaisa khe muknwichiba-sai kosong tei mukchisai kebeng noktharo samung tangnai Lebirokni bagwi wngnai tei bórok tongnani bagwi[28] nwichi khotol wngnai.

⁶Kwthar thai gana-o tei kaisa muknwichiba-sai kosong tei ba-rasai kebengo khe abo joto Israilrokni bagwi wngnai.

⁷Kwthar hwnwi chongjakma harokni bere kwrẃngnwi-o tẃiphangrokni bagwi ha banta wngnai. Saltháng bwkhak khe salthángni ha ari jora tei salka bwkhago khe salkani ha ari jora, abo lokmani khe Israilni bosongrokno rwmani bai baksa ma loknai.

⁸Abo swk se Israil-o tẃiphangni ha ma wngnai. Hakhe bo ani bororokno tei kusup yana tẃi khe tei bebak ha khe Israilni bebak bosongrok thwgwi mannai.

⁹Subraiyung Kaitor hai hwnwi sa-o: O Israilni tẃiphangrok! norok ur phnangma tei buino kusupma thak si di, chamani tei sói samung khlai si di. Ani bororokno manthai seplemani thak si di, hwnwi Subraiyung Kaitor sa-o.

¹⁰Norok sói khe ma sunai tei ma rwtanai.

¹¹Epha kaisa bai bath kaisa thansa wngnai, bath kaisa khe ephani chi-o kaisa wngnai tei epha kaisa khe homerni chi-o kaisa wngnai; homer khe sói sujaknai wngnai.

¹²Kaisa sekel[29] bai baksa khe 20 gera ká-o. 20 sekel 25 sekel tei 15 sekel bebagwi kaisa mina bai baksa.

¹³Abo hai khe se norok yapharmung ma yapharnai. Gomni khe homer banta dokni bisingo bantasa barlini khe homer banta dokchini bisingo bantasa,

¹⁴olib thokni khe omo swk banta dokchini bisingo banta sa. Kor khe homer hai 10 bath chago.

¹⁵Israilrok núkhungni mera gutni mak nwirani bisingo mera masa bororokni sumsok súchana bagwi ma yapharnai. Norok maichlam yapharmung, sógwi yapharmung, khakchang yapharmung ma yapharnai, abo Subraiyung Kaitor sa-o.

¹⁶Hani joto bororok o yapharmungno Israilni tẃiphangni thani-o ma rwnai.

¹⁷Tẃiphangni samung khe sógwi yapharmung maichlam yapharmung arak yapharmung ma rwnai, bebak Israil dopharokni bagwi tal kwtalni tero Sabatni panda tei kubun terrogobo sumsok yapharmungni bagwi, sógwi yapharmungni bagwi, khakchangma yapharmungni bagwi, Israilrokni sumsok súchana bagwi ma rwnai.

¹⁸Subraiyung Kaitor hai hwnwi sa-o, “Nwng tal yaphangni puilani salo khait kwrwi musuk chwla bwsa masa ratharwi noktharno kwthar ma khlainai.”

¹⁹Ochai sumsok yapharmani kisa thẃino tlangwi noktharni duglamni thonglarogo tei háyáni busup subrwi-o tei bisingni khotolni duglamni thongla-o phulwi ma rwnai.

²⁰Nwng salsnini salo khoroksa swk saui man ya twtwi eba koróui sumsok khlai khe omo hai’-no ma khlainai, hakhe nwng noktharno kwthar ma khlainai.

²¹Tal yaphangni salchibrwini salo nwng yókma terni panda ma khlainai tei nokha salsni jora auang bángla cháui ma tongnai.

²²A salo tẃiphang bini sak tei bebak bororokni wngwi sumsok yapharmungni bagwi musuk chwla bwsa masa ma yapharnai.

²³Nokha salsnini sal jora Subraiyungni thani sógwi yapharmungni bagwi khait kwrwi mak sni musuk chwla bwsarok tei mak sni mera bwsarok ma rwnai. Tei sumsok yapharmungni bagwi sal brúm punjua masa khe ma rwnai.

²⁴Bo masa musuk chwla bwsa tei masa mera yapharma-o epha kaisa maichlam tei hin kaisa thok ma rwnai.

²⁵Nokha talsni talni, sal chibani salo tei pandani nokha salsnini salo bo sumsok yapharmung, sógwi yapharmung tei maichlam yapharmung tei thok ma rwnai.