Read Kok Borok ESEKIEL 46 Bible Online

ESEKIEL 46 - Kok Borok bible

ESEKIEL 46

¹Subraiyung Kaitor hai hwnwi sa-o, “Salka bwkhago naharjak bisini khotolni duglam saldokni tang salo kholobwi ma tonnai, phiya ba sabatni salo tei tal kwtalni panda phuru abo phiyogwi rwjaknai.

²Tẃiphang khe phatarni nokhlani bisingni khotolo habwi duglamni thong gana-o bachanai. Tei ochairok khe bini sógwi yapharmungno yapharnai. Bo duglam gana-o khulumui nongkhorwi thángnai hwn ba duglam khe sanja wng ya sak kholopjak glak.

³Hani bororok khe Subraiyungno duglam bwskango Sabat salrogo tei tal kwtalni pandarogo khulum lainai.”

⁴Sabat salo tẃiphang Subraiyungni thani sógwi yapharnani bagwi khait kwrwi mera mak dok tei masa mera bwsa ma rwnai.

⁵Mera bwsa masa bai baksa bo epha kaisa maichlam ma yapharnai tei mera bai baksa bo yapharna muchungma haino yapharnai tei abórok bai baksa thokbo yapharnai.

⁶Tal kwtalni panda-o bo musuk chwla bwsa masa, mera makdok tei mera bwsa masa khait kwrwirokno ma yapharnai.

⁷Musuk chwla masa tei mera bwsa masa bai baksa bisisni kwchar maichlambo yapharnai tei mera masa bai baksa tẃiphang yapharnani muchung tẃi’-no yapharnai tei kaisa ephani bagwi litar kwtham thokbo ma yapharnai.

⁸Tẃiphang bisingo hap khe nuka tẃi ma hapnai tei nongkhorwi tháng phurubo abo tẃi’-no ma tháng phinai.

⁹Hani bororok pandani jora-o Subraiyungno khulumnani phai khe, Subraiyungno khulumnani bagwi salsibaini duglam tẃi hap khe, salgrabaini duglam tẃi nongkhorwi ma thángnai tei salgrabaini duglam tẃi hapnai khe salsibaini duglam tẃi nongkhorwi ma thángnai, khoroksa phano bo hapmani duglam tẃi nongkhorwi ma tháng glak, hwn ba bo kepleng se bwskang naharwi ma thángnai.

¹⁰Bórok bisingo habwi tháng khe tẃiphangbo borok bai baksa ma thángnai, bórok nongkhorwi tháng khe bo’-bo nongkhorwi ma thángnai.

¹¹Panda-o tei chongjak jora-o maichlam yapharmung bai khe musuk chwla bwsa masa epha kaisa tei mera bwsa bai epha kaisa, mera bwsa bai khe chukmani jora tẃi khe thok epha kaisa ma yapharnai.

¹²“Tẃiphang Subraiyungni thani-o baithang muchungwi yapharnani, sógwi yapharmung phano eba khe khakchangma yapharmung phano nai khe, salka bwkhak naharjak duglamno bini bagwi phiyogwi rwjaknai, bo Sabat salo khlaimani hai khe bo sógwi yapharmung eba khe khakchang yapharmung yapharwi mannai. Hakhe bo nongkhorwi thángnai, bo nongkhorwi tháng bai khe duglam kholopjak phinai.”

¹³Subraiyung hai hwnwi sa kha, “Phung brúm bo bisi kaisani mera bwsa khait kwrwino Subraiyungni thani-o sal brúm sógwi ma yapharnai.

¹⁴Bo phung brúm maichlam yapharmung ma yapharnai epha kaidok kwchar tei olib thok auan buljak kwtham kwchar ma yapharnai. Omo raida thak phlai ya khe sógwi yapharjaknai.

¹⁵Abo hai khe mera, mai tei thok yapharmung sal brúm phungo thak ya khe sógwi ma yapharnai.”

¹⁶Subraiyung Kaitor hai hwnwi sa-o, “Tẃiphang bini tongmani hano, bini sajla khoroksa swkno rw kha hwn khe, abo bini sajlani’-no wngnai, abo’-no buphani aroni manthai banta manma klainai.

¹⁷Tamni hwn ba tẃiphang bini hano khoroksa swk bini selengno rw kha hwn khe abo bisi kaisani ulo kiphilma jora sók phai khe tẃiphangni’-no wng phinai, bini sajla khoroksa se ha banta mannai.

¹⁸Tẃiphang borok khoroksa swknino phano ha segwi naui man glak, bini tongmani hano se bini bwslasongno manthai banta khe ma rwnai, hakhe khoroksa phano ani borok bo bai kusupjak yana tẃi omo hai ma wngnai.”

¹⁹Hakhe bo aro salsibai bwkhak naharjak salgrani duglam ganani lama tẃi ano tubu kha. Aro ochairokni bagwi kwthar khotolrok tongo, a khotolrok tẃi ang aro saltháng bwkhak páithago kaisa khotolno phunuk kha.

²⁰Bo ano hai hwnwi sa kha, “Oro ochairok cha ya yapharmani tei sumsok yapharmano ruknai tei aro bórok mai yapharmani tei bórok mai yapharmano sóknai, hakhe kwthar manwi phataro tlangjak yana tẃi tei bororokno hamya khlai yana tẃi omo hai ma khlainai.”

²¹Hakhe bo ano phataro tubu kha tei bo ano noksu subrwi-o tlangwi,

²²nok busuni khotol bwsano phunuk kha, abo muk kosong khe brwichi tei kebengo khe mukthamchi, abórok kaibrwi’-no tor laimani baksa.

²³Bisingo khe khotol matheno holongni chokdeual bai kitingjak, bethepni tola-o thapa kitingwi snamjak.

²⁴Hakhe bo ano hai hwnwi sa kha, “Omorok sóngma nokrok oro noktharo samung tangnairok bororok yapharmano ma ruknai.”