Read Kok Borok ESEKIEL 47 Bible Online

ESEKIEL 47 - Kok Borok bible

ESEKIEL 47

¹Hakhe bo ano kiphil rwui noktharni duglamo tubu kha, nai di, duglam khama tẃi twi phaiwi salka bwkhak, nokthar naharjak phaising riyor kha. Noktharni salgrabai tẃi phaiwi háyáni salgrabai bwkhak riyor kha.

²Bo ano salsibai bwkhakni duglam tẃi phataro tubu kha tei salka bwkhak naharjak phatarni duglamo kiting rwui tlang kha; tei twi khe salgrabai bwkhak riyorwi phai kha.

³Bini yago sujaknai tẃiwi salka bwkhak toksaui thángwi muksasai su kha tei bo ano twi tẃi tlang kha; a twi khe ani yakorai jora thuk kha.

⁴Bo teibo muksasai su phi kha, bo ano twi tẃi tlang kha ani yáskú jora twi kuthuk. Bo hai’-no hai muksasai su phi kha, twi ani bwchang jora kuthuk wng kha.

⁵Bo hai’-no hai muksasai su phi kha, abo twima kuthukma wng kha, ang bárwi man li ya. Abo twi thukmani twi yók ya khe tei twi bárwi se man li ya.

⁶Bo ano hai hwnwi sa kha, “Nwng omorokno kaham khe da nuk kha?” Hakhe bo ano twima rukungo tlang kha.

⁷Aro ang sok phai khe aro twima rukungni ang babainwi-o’-no buphangrok kwbángma nuk kha.

⁸Bo ano hai hwnwi sa kha: O twi, salka bwkhak ha twi riyorwi Jordan harungo thángwi twijlangni twi-o abo klai khe abo twi kaham se wng phi-o.

⁹Twima riyorwi klaimani’-ono bebak twi-o tongnairok thang bai anw tei aro árok kwbángma wngnai; twisani twi twijlango klai khe twi kaham wngnai, hakhe twi-o tongnairok thangnai.

¹⁰A romnairok twijlang rukungo tongnai, Engedini simi Englaim jora cheirok phwrannani tei swngthairok wngnai, aro twijlang kotormani á hai khe podrepot árok tongnai.

¹¹Tamni hwn ba pukhirirok tei twiduni twirok kaham wng glak. Abórok kwprapma wngwi tongnai.

¹²Babainwnwi twima rukungo podrepot chájaknai bwthái buphangrok achainai. Abórokni bwláirok hoi glak tei bórokni bwtháirok kwrai glak, hwn ba tal brúm aro bwthái kaham kaham tháinai, tamni hwn ba abórokni bagwi noktharni twi riyorwi phai-o. Abórokni bwtháino cháui mannai tei abórokni bwláirok bai khe bororokni hamyarok hamnai.

¹³Subraiyung Kaitor hai hwnwi sa-o: Omo se ha ari norok chinwi Israilni bosongrokni bisingo ha banta khe ma na lainai. Josep khe banta kainwi mannai.

¹⁴Norok abono baksa khe banta khe na lai di, ang norokni chuchusongni thani o hano rwnani bagwi swmai tang kha. O hano norok manthai klai-o.

¹⁵Omo hai se ha ari wngnai: salsibai bwkhago twijlang kotorni simi Hetlono thángmani lama tẃi khe Lebohamat tei Jedad[30] jora.

¹⁶Berotha tei Sibraim (abo Damaskos bai Hamat amchoini kwcharo klai-o) tei Tikon jora (abo Hauran ha ari gana-o klai-o.)

¹⁷Hakhe salsibaini bwkhakni ha ari khe twijlangni simi Enon kamiyung jora, abo salsibaini ha ari Damaskos tei Hamat jora. Abono salsibaini ari wngnai.

¹⁸Salka bwkhakni ha ari hwn khe, Hajar-enonni simi Haran bai Damaskosni kwchar tei Jordan tẃi khe Giliad bai ha Israilni kwchar tei salkani twijlangni khe Tamar jora. Abo salka bwkhakni ha ari wngnai.

¹⁹Salgrabaini ha ari hwn khe, Tamarni simi Meriba Kades jora teibo ha Ijipni twisa tẃi khe twijlang kotor jora. Abo salgrabaini ha ari wngnai.

²⁰Salthángbaini ha ari hwn khe twijlang kotorni simi tei khaksa bwkhak Lebohamato hapmani jora. Abo salthángbaini ha ari wngnai.

²¹Hakhe norok Israilni bosong tongmani tẃi’-no ha banta khe ma nanai.

²²Norok sakni bagwi tei buini hani norokni bisingo tongnairok tei aro achainai chwrairokbo banta mannai. Bórokno norokni Israilrok hai khe ma chongnai, Israilrok bai baksa bórokbo ha banta ma thwknai.

²³Buini hani borok matheno bo tongmani bosongrok bai baksa bini banta ma thwknai, hwnwi Subraiyung Kaitor sa-o.