Read Kok Borok ESEKIEL 48 Bible Online

ESEKIEL 48 - Kok Borok bible

ESEKIEL 48

¹A borok se bosongrokni bumung mareui tisajakmani: Salsibaini bwskang bwkhak Dan banta kaisa mannai, abo Hetlon lamani tẃi khe Lebohamat jora: Hajar-enon tei salsibaini ari Damaskosni simi Lebohamat jora abo salkabaini khaksa jora tei salthángbaini khaksa jora ha ari wng lainai.

²Aser banta kaisa mannai, aboni ari khe Danni salkabaini simi salthángbai jora.

³Naptali banta kaisa mannai, aboni ha ari hwn khe Aserni salkabaini simi salthángbai jora.

⁴Manase banta kaisa mannai, aboni ha ari khe Naptalini salkabaini simi salthángbai jora.

⁵Ephraim banta kaisa mannai, aboni ha ari hwn khe Manaseni salkabaini simi salthángbai jora.

⁶Ruben banta kaisa mannai, bini ha ari hwn khe Ephraimni salkabaini simi salthángbai jora.

⁷Judaisarok banta kaisa mannai bini ha ari hwn khe Rubenni salkabaini simi salthángbai jora.

⁸Judairokni amchoi bai nang laijak salkabaini simi salthángbai jora 25,000 muk kebeng tei abo bai baksa khe kosong kaisa bosongno banta rwjakmani bai baksa khagwi narwk di. Nokthar aro’-no wngnai.

⁹Nwng Subraiyungni bagwi banta khagwi narwkmani abo kosongo 25,000 muk tei kebengo 20,000 muk ma wngnai.

¹⁰Abo kwthar banta wngnai ochairokni banta salsibai-o muk 25,000 tei muk 10,000 kebeng salthángbai-o muk 10,000 kebeng salkabai-o tei muk 25,000 kebeng salgrabai-o tei Subraiyungni noktharni bagwi khe kwcharo wngnai.

¹¹Omo khe Jadok bosongni ochairokni banta wngnai, bórok ani kók khnaui Israil bororok bai baksa Lebirok kiphilwi thángmani hai khe tháng ya gwja.

¹²Abo Lebirokni banta gana-o bórokni bagwi, Judarokni khe kwthar bantani mannai, abo kwthar kuk wngnai.

¹³Ochairokni banta gana’-ono Lebirokbo, Judarokbo banta mannai, abo kosongo 25,000 muk tei 10,000 muk khe kebengo wngnai.

¹⁴Bórok o saiwi najak ha bantano phalwibo man glak tei sláiwibo man glak tei buini arobo tlangwi man glak. Tamni hwn ba abo kwthar tei Subraiyungni se.

¹⁵Tei bara tong rwkmani ha khe 5,000 muk kebeng tei 25,000 muk kosongo, abo kwthar buya, joto borokni bagwi wngnai. Aro bórok tongwi mannai. Aboni kwcharo se kamiyung ma wngnai.

¹⁶Abo hai se busup subrwi wngnai: salsibai-o muk 4,500, salgrabai-o muk 4,500, salka-o muk 4,500 tei salthángo muk 4,500 ma wngnai.

¹⁷Kamiyung kwchar phiyokjak jora ma tongnai; salsibai-o muk 250 salgrabai-o, muk 250, salka-o muk 250 tei salthángo muk 250 ma wngnai.

¹⁸Ha bára tong rwkmani khe salka-o muk 10,000, salthángo muk 10,000. Abo kwthar ha gana-o ma wngnai. Abo kamiyungo tongnairok tangwi chajaknai ha wngnai.

¹⁹Kamiyungo tongnairok hwn kheno, Israilni bebak bosongrok a ha-o samung tangwi cháui mannai.

²⁰Nwng banta khe khakmani bebak abo 25,000 khak brwi’-ono ma wngnai, abo kwthar tei kamiyungni bagwi wngnai.

²¹Tei kwthar bantani babainwnwi-o ha banta tong rwkmani khe abo tẃiphangni’-no wngnai. Abo kwthar bantani salka bwkhago muk 25,000 pholokjak tei saltháng bwkhak khe 25,000 salthángni ha ari jora, abo kaisa bosong mannani bai baksa, abo hai khe tẃiphangni wngnai. Kwthar bantani kwcharo nokthar ma wngnai.

²²Lebirokni banta tei kamiyungni banta kwcharo tẃiphangni bagwi banta ma wngnai. Tei tẃiphangni banta khe Juda tei Benjaminni amchoi kwcharo ma wngnai.

²³Tei karjagwi tong rwknai bosongrokni khe omo hai: Benjamin banta kaisa mannai, abo salkabaini simi salthángbai jora kholopjak wngnai.

²⁴Simion khe banta kaisa mannai, aboni ari khe Benjaminni salkabaini simi salthángbai jora wngnai.

²⁵Isakar banta kaisa mannai, bini ha ari khe Simionni salkabaini simi salthángbai jora wngnai.

²⁶Jebulun banta kaisa mannai, bini ha ari khe Isakarni salkabaini simi salthángbai jora wngnai.

²⁷Gad banta kaisa mannai, bini ha ari khe Jebulunni salkabaini simi salthángbai jora wngnai.

²⁸Gadni salsibaini ha ari khe Tamarni salgrabaini simi Meriba Kadesni twi jora wngnai tei Ijipni Uadini simi twijlang kotor jora kwrwngjak.

²⁹O hano’-no nwng Israil bosongrokni thani bórokni manthai bantano banta khe ma rwnai tei omorokno bórokni banta wngnai hwnwi, Subraiyung Kaitor sakhlai-o.

³⁰Omorok se kamiyungni nongkhorjaknai duglamrok wngnai; salsibai bwkhak 4,500 muk ma wngnai,

³¹duglam lamtham Rubenni duglam, Judani duglam tei Lebini duglam kamiyungni duglamrok Israilni bosongrokni mung bai se wngnai.

³²Salka bwkhago, 4,500 muk ma wngnai, duglam lamtham Josepni duglam, Benjaminni duglam, Danni duglam.

³³Salgrabai bwkhago 4,500 muk ma wngnai, duglam lam tham, Simionni duglam, Isakarni duglam, Jebulunni duglam.

³⁴Salthángbai-o, 4,500 muk ma wngnai duglam lamtham, Gadni duglam, Aserni duglam, Naptalini duglam.

³⁵Kamiyung bebagwi lokmani khe 18,000 muk ma wngnai. Tabukni simi kamiyungni mung, “Subraiyung oro tongo”[31] wngnai.