Read Kok Borok ESEKIEL 5 Bible Online

ESEKIEL 5 - Kok Borok bible

ESEKIEL 5

¹“Nwng, o borokni sajla, seng kubuk kongsa na di; abo bai nini bwkhnai tei khochai ra di tei abono rwtaui nai di tei banta kwtham khlai di.

²Thupsano kamiyung sekjakmani pái phuru khe hór bai kamiyung bai baksa sók di. Tei thupsano naui kamiyung kupulung khe seng bai tan di tei thupsano khe kamiyung kupulung khe sarwi rw di. Ang abono ani seng bai riphriknai.

³Nwng aroni bwkhnai kisa naui nini rí buchugo khaui na di.

⁴Tei nwng aroni kisa na phi rwi abórokno hóro khiklaiwi sógwi pái di; aroni khe bebak Israil dopharokni thani hór koproinai.”

⁵Subraiyung Kaitor hai hwnwi sa-o: Omo Jerusalem; ang bono kwnwi kwcharo songchamani tei kubun dopharok bono kitingwi tong bai-o.

⁶Tamo khe Jerusalem samung hamya khlaiwi ani dagimano kebeng kha, kubun dopharokni slái se hamya wng kuk kha, bono kitingwi tong bainai dopharokni slái se kók khna ya wng kuk kha.

⁷Aboni bagwino Subraiyung Kaitor hai hwnwi sa-o: Jerusalem ani dagimano nor kha tei ani raidano tẃiwi tong li ya. Nono kitingwi tong bainai dopharokni slái se natha wng kuk kha tei ani raida tẃi tong li ya ani dagimano khna li ya, hwn ba kubun dopharok tong tẃi se tong lai si-o.

⁸Aboni bagwino Subraiyung Kaitor hai hwnwi sa-o: Nai di, o Jerusalem ang kubun dopharokni bwskango nono buj thumnai.

⁹Nwng aswk samung hamya khlaimani bagwi ang abo hai majra rwnai, abo hai samungno khlainai tei ulo abo hai khwbo khlai glak.

¹⁰Aboni bagwi’-no norokni bisingo Jerusalemni buma bupharok bwsarokno ma chá anw tei bwsarok buma bupharokno ma chá anw, ang norokno buj thumnai tei kwthang tongnairokno piring-poroi khlainai.

¹¹Aboni bagwi ang kwthang tong sak, Subraiyung Kaitor hai hwnwi sa-o, “Takjak mwtairok bai tei bebak tongmung hamya bai ani háyárokno dera rwmani bagwi ang nono khairokma kwrwi khe tanwi páinai, nono narwk glak.

¹²Thupthamni thupsa bororok hamya klaiwi ma thwi bainai tei ma chá ya ma nung ya khe ma thwi bainai; tei thupsa khe chokdeualni phataro seng bai tantharjak bainai tei thupsa khe nokbar bai khe oroi-poroi khlaijak bainai tei seng bórokno rwktharnai.

¹³“Abo hai khe ani jolima mwthaknai tei ani jolima bórokni saka-o klai rwui ang bwkha ham sinai. Hakhe ang Subraiyung bórokno abo hai samano saui man bainai, tamni hwn ba ang belai khe bórokno joli kha.

¹⁴Norokni gana tẃi lái thángnai bororokni bwskango mwnwimung tei norokno kitingjak dopharokni thani-o sejamung wng rwnai tei lukurok bai chal rwnai.

¹⁵Ang nono joliui buj thummano nugwi nono kitingwi tong bainai dopharok belai khe ma kiri bainai, nwng bórok bai kara thwngjaknai. Ang Subraiyung o kókno sa-o.

¹⁶Ang nini thani-o chakhla kok tẃi khe asari rohorwi sátoknai aboni bagwi nwng[4] komornai tei nini chámungrokbo mwthakjaknai,

¹⁷aboni bagwi ang nono kebengwi asari tei bolongni yabrwirokno rohornai tei bórok nini bwsarokno butharnai, kulum kwsa tei tekto rohorwi tei nini saka-o kebengnai arirokni seng tisa rwnai. Ang Subraiyung o kókno sa-o.”