Read Kok Borok ESEKIEL 6 Bible Online

ESEKIEL 6 - Kok Borok bible

ESEKIEL 6

¹Subraiyung ano hai hwnwi sa kha:

²Borokni sajla, nini mwkhang Israilni hachuk bwkhak naharwi kók diyari sa di,

³tei sa di, Israilni hachugo, Subraiyung Kaitorni kókno khna di, Subraiyung Kaitor hachukrok, hatháirok tei harungrokno hai hwnwi sa-o, nai di, ang nini thani seng rohorwi bororok khulummani kuchuk kuchukrokno sokomornai.

⁴Nini háyárok swbaijaknai tei nini satrai sókmanirok swbaijaknai; bebak bororokno mwtai mangni bwskango butharjak bainai.

⁵Ang mwtai háyáni bwskango Israilni bororokni kwthwi mangno klai rwui tonnai tei háyárok kitingwi bekreng máng klai tongnai.

⁶Norok tongmani kamiyungrok tei háyárok sokomorjak bainai, hakhe bebak háyárok tei takjak mwtairok phindrik-phandrak khe sukhrupjak bainai; bórokni satrai sókmani háyárok swbaijaknai tei bórokni samungrok hu-ui páijaknai.

⁷Tei bororok tantharjak bainai, hakhe norok ang’-no Subraiyung hwnwi saui mannai.

⁸Tamo khe ang baksano kwthang khe yakarwi klangnai tei norokno kubun dopharokni bisingo piring-poroi khlai bainai.

⁹Hakhe norok khaui tlangjakmani ha-o tong twtwi baksa ano muitu ma khlai bainai tei bórok poito kwrwi wngwi ano yakarwi takjak mwtaino khulumma bai, bórok samung hamya khlaimani bai, ang bórokno birman rw kha hwnwi bórok saui man bainai. Bórok ang selengmani samung hamyano khlaimani bagwi sak sakno selengjak bainai.

¹⁰Tei ang’-no Subraiyung hwnwi bórok saui mannai. Tei ang bórokno sátokmani le abo ahaino ya hwnwi bórok saui mannai.

¹¹Subraiyung Kaitor hai hwnwi sa-o, yapha khorop di tei nini yakungno songra di, Israilrok aswk samung hamya khlaimani bagwi kap di, bórok seng, asari tei bok nangwi ma thwi bainai.

¹²Hakchalo tongnai bemuk hamya bai manjagwi thwinai, samo tongnai seng bai ma thwinai, kwthang tong rwknairok khe asari bai ma thwinai. Abo hai khe ani jolima bórokni saka-o klai rwnai.

¹³Hakhe háyárok kitingwi tei hathái kuchuk hachuk sakarogo nwng ang’-no Subraiyung hwnwi saui mannai, bwlái kwkhrang buphang yaphango tei uk buphang yaphango tei bebak bórokni mwtairokno motom sógwi yaphar thani bórokni mang kwthwirok klaiwi tongnai.

¹⁴Tei ang kebengwi ani yak phologwi bórokno sátoknai tei bórokni hano bukcha khlainai, au, ang bebak bórokni tongthairokno hasinglwngni simi Dibla jora bukcha khlainai. Hakhe bórok ang’-no Subraiyung hwnwi saui man bainai.